Views: 3
ដោយៈ ប.ខុន/ភ្នំពេញៈ លោក ញ៉ាញ់ ជាបហ៊ង ប្រធានមន្ទីរធនធានទឹក និងឧតុនិយមខេត្តកំពង់ស្ពឺ បានប្រាប់ឱ្យរស្មីកម្ពុជាដឹងនៅថ្ងៃទី២៩ ខែវិច្ឆិកា ឆ្នាំ២០២២ថា នៅខេត្តកំពង់ស្ពឺក្នុង ខែវិច្ឆិកានេះ មានភ្លៀងធ្លាក់ស្ទើររាល់ថ្ងៃតែមិនរាយប៉ាយគ្រប់កន្លែងទេ និងម្យ៉ាងទាំងទ្វារនៅទំនប់រលាំងជ្រៃ និងទំនប់៧មករា នៅបើក ទើបធ្វើឱ្យស្ទឹងព្រែកត្នោតមិនមានទឹកជំនន់កើតឡើង។ ភ្លៀងធ្លាក់រយៈពេល២៤ម៉ោង ត្រឹមព្រឹកថ្ងៃទី២៩ ខែវិច្ឆិកា មានកម្រិតពី១ដល់៧០មីលីម៉ែត្រ។
ប្រធានមន្ទីរធនធានទឹកខាងលើនិយាយឱ្យដឹងទៀតថានៅថ្ងៃទី២៩ ខែវិច្ឆិកានេះ ទ្វារទឹករលាំងជ្រៃបើកមួយទ្វារកម្ពស់០,៤០ម៉ែត្រ ជាមួយនឹងការបើកឱ្យដំណើរ ការវារីអគ្គិសនីចំនួនបួន។ ទឹកស្ទឹងព្រែកត្នោតនៅរលាំងជ្រៃមានកម្ពស់៧,៣៦ម៉ែត្រ ទាបជាងថ្ងៃទី២៨ ខែវិច្ឆិកា ០,០១ម៉ែត្រ។ ឯស្ថានភាពទឹកភ្លៀងធ្លាក់រយៈពេល២៤ម៉ោងត្រឹមព្រឹកថ្ងៃទី២៩ ខែ វិច្ឆិកា នៅតម្រងសាលាស្រុកសំរោងទង៣៦មីលីម៉ែត្រ នៅតម្រងអូរតារ័ត្ន៧០លីមីម៉ែត្រ នៅស្រុកឧត្តុង្គមានកម្រិត១៨មីលីម៉ែត្រ, នៅស្រុកថ្ពង១៨មីលីម៉ែត្រ និងនៅក្រុងច្បារមន១០មីលីម៉ែត្រ។
លោកចាន់ យុត្ថា អ្នកនាំពាក្យ និងជារដ្ឋលេខាធិការក្រសួងធនធានទឹក និងឧតុនិយមបានប្រាប់ឱ្យរស្មីកម្ពុជាដឹងនៅថ្ងៃទី២៩ ខែវិច្ឆិកាដែរថា ទោះបីជាកន្លងទៅនេះមាន ភ្លៀងធ្លាក់ជាបន្តបន្ទាប់នៅក្នុងភូមិសាស្ត្រខេត្តកំពង់ស្ពឺយ៉ាងណាក៏ដោយក៏ទឹកស្ទឹងព្រែកត្នោតនៅទំនប់៧មករាពេលនេះមិនសញ្ញាណទឹកជំនន់កើតឡើងទេ ដោយសារភ្លៀងធ្លាក់មិនស្មើគ្រប់កន្លែង និងម្យ៉ាងទ្វារទឹកនៅមិនទាន់បិទទើបធ្វើឱ្យទឹកមានហូរតែនៅតាមពោះស្ទឹង ។ នៅទំនប់៧មករាទឹកមានកម្ពស់៤,៩៦ម៉ែត្រ ទឹកហូរលើទំនប់បង្ហៀរ០.១៦ម៉ែត្របើកទ្វារធំដោះទឹកកម្ពស់០,៥០ម៉ែត្រមួយសន្លឹក និងកម្ពស់១,៥០ម៉ែត្រមួយសន្លឹក។
ក្រសួងធនធានទឹក និងឧតុនិយមនៅថ្ងៃទី២៩ ខែវិច្ឆិកា ឆ្នាំ២០២ បានជូនដំណឹងស្តីពីការព្យាករធាតុអាកាស សម្រាប់ពីពីថ្ងៃទី៣០ ខែវិច្ឆិកា ដល់ថ្ងៃទី៦ ខែធ្នូថា ចាប់ពីថ្ងៃទី៣០ ខែវិច្ឆិកា ដល់ថ្ងៃទី២ ខែធ្នូ ព្រះរាជាណាចក្រកម្ពុជាទទួលរងឥទ្ធិពលខ្សោយពីទ្រនុងសម្ពាធខ្ពស់ ។ ពីថ្ងៃទី៣ ដល់ថ្ងៃទី៦ ខែធ្នូ ទទួលរងឥទ្ធិពលពីការប្រសព្វគ្នារវាងជ្រលងនៃសម្ពាធទាបរុញមកពីសមុទ្រចិនខាងត្បូង និងទ្រនុងសម្ពាធខ្ពស់ពីខ្ពង់រាបភាគឦសានបង្កឱ្យមានភ្លៀងធ្លាក់រាយប៉ាយក្នុងកម្រិតពីតិចទៅបង្គួរលាយឡំដោយផ្គរ រន្ទះ។
នៅក្នុងសេចក្តីជូនដំណឹងបានឱ្យដឹងទៀតថាស្ថានភាពអាកាសធាតុដូចខាងលើធ្វើឱ្យតំបន់វាលទំនាបកណ្តាលមានសីតុណ្ហភាពអប្បបរមាពី២២ទៅ២៤អង្សាសេ សីតុណ្ហភាពអតិបរមា មានពី៣០ទៅ៣២អង្សាសេ។ ចាប់ពីថ្ងៃទី៣០ ខែវិច្ឆិកា ដល់ថ្ងៃទី២ ខែធ្នូ អាចមានភ្លៀងធ្លាក់តិចតួច និងពីថ្ងៃទី៣ ដល់ ថ្ងៃទី៦ ខែធ្នូ អាចមានភ្លៀងធ្លាក់នៅក្នុងកម្រិតពីតិចទៅបង្គួរ លាយឡំទៅដោយផ្គរ រន្ទះ។
នៅតំបន់ខ្ពង់រាបមានសីតុណ្ហភាពអប្បបរមាពី២១ ទៅ២៣អអ្សាសេ សីតុណ្ហភាពអតិបរមាមានពី២៩ទៅ៣១អង្សាសេ ។ ចាប់ពីថ្ងៃទី៣០ ខែវិច្ឆិកា ដល់ថ្ងៃទី២ ខែធ្នូ អាចមានភ្លៀងតិចតួច និងពីថ្ងៃទី៣ ដល់៦ខែធ្នូ អាចមានភ្លៀងធ្លាក់ក្នុងកម្រិតពីតិចទៅមធ្យម លាយឡំទៅដោយផ្គរ រន្ទះ។
សម្រាប់តំបន់មាត់សមុទ្រមានសីតុណ្ហភាពអប្បបរមាមានពី២៣ទៅ២៥អអ្សាសេ សីតុណ្ហភាពអតិបរមាមានពី៣០ទៅ៣២អង្សាសេ អាចមានភ្លៀងធ្លាក់ក្នុងកម្រិតពីតិចទៅបង្គួរលាយឡំទៅដោយផ្គរ រន្ទះ៕
