Views: 6
ប្រែសម្រួលៈបំណង(ដេល្លីម៉េល)៖ នាយករដ្ឋមន្ត្រីថៃលោក ប្រាយុទ្ធ ចាន់អូចា បានបន្តមុខតំណែងផ្លូវការរបស់លោកកាលពីថ្ងៃសុក្រទី៣០កញ្ញាក្រោយពីតុលាការធម្មនុញ្ញនៃប្រទេសសំរេចថាលោកមិនបានកាន់តំណែងនាយករដ្ឋមន្ត្រីហួសកាលកំណត់ប្រាំបីឆ្នាំនៅឡើយទេ។
អតីតមេទ័ពដែលបានចូលកាន់អំណាចក្នុងរដ្ឋប្រហារយោធាឆ្នាំ២០១៤ ត្រូវបានតុលាការបញ្ឈរជើងកាលពីខែមុនបន្ទាប់ពីគណបក្សប្រឆាំងប្តឹងទៅតុលាការធម្មនុញ្ញអោយពិនិត្យមើលថាតើលោកបានកាន់តំណែងហួសកាលកំណត់ដែលមានចែងក្នុងរដ្ឋធម្មនុញ្ញដែរឬអត់។
អាជ្ញាធរក្រុងបាងកកនៅថ្ងៃសុក្រនេះបានត្រៀមជើងការសំរាប់បាតុកម្មណាមួយនៅក្រោយតុលាការចេញការសំរេចនេះ នៅពេលក្រុមតវ៉ាប្រឆាំងជាច្រើនបាននិយាយនៅពេលមុននេះថា ពួកគេនឹងនាំគ្នាចេញមកតាមដងផ្លូវតវ៉ា បើសិនជាប្រាយុទ្ធឈ្នះក្តី។
ចៅក្រុម ពូនយ៉ា អ៊ុតចាកន (Punya Udchacon)បានអាចសាលក្រមថា« តុលាការធម្មនុញ្ញសំរេចដោយសម្លេងភាគច្រើនថា តំណែងនាយករដ្ឋមន្ត្រីរបស់ចុងចម្លើយនៅមិនទាន់ហួសកាលកំណត់ប្រាំបីឆ្នាំនៅឡើយទេ។គណៈរដ្ឋមន្ត្រីនៅក្រោមតំណែងនាយករដ្ឋមន្ត្រីនេះគិតចាប់រាប់ពីថ្ងៃទី០៦ មេសា ឆ្នាំ២០១៧»។
សូមបញ្ជាក់ថា ក្រោមច្បាប់រដ្ឋធម្មនុញ្ញថៃឆ្នាំ២០១៧ នាយករដ្ឋមន្ត្រីណាម្នាក់មិនអាចស្ថិតក្នុងមុខតំណែងនេះហួសប្រាំបីឆ្នាំបានទេ តែពួកអ្នកគាំទ្រនិងប្រឆាំងលោកមិនយល់ស្របគ្នាអំពីពេលចាប់ផ្តើមកាន់មុខតំណែងរបស់លោក។
ការសំរេចនេះរាប់ការកាន់តំណែងរបស់លោកប្រាយុទ្ធចាប់ពីរដ្ឋធម្មនុញ្ញថ្មីចូលជាធរមាន មានន័យថាលោកអាចបន្តនៅក្នុងមុខតំណែងរហូតដល់ឆ្នាំ២០២៥អាស្រ័យលើលទ្ធផលបោះឆ្នោតជាតិនាពេលខាងមុខ។
សេចក្តីថ្លែងការណ៍មួយចេញពីការិយាល័យរបស់ប្រាយុទ្ធនិងត្រូវបានបង្ហោះក្នុងទំព័រហ្វេសប៊ុក បាននិយាយថាលោកប្រាយុទ្ធស្វាគមន៍ការសំរេចក្នុងសម្លេងគាំទ្រ៦ទល់នឹង៣ និងថាលោកនឹងប្រើប្រាស់ពេលនៅសេសសល់ចុងក្រោយក្នុងមុខតំណែងរបស់លោក ដើម្បីជំរុញគំរោងហេដ្ឋារចនាសម្ពន្ធនានា។លោកបានសរសេរថា« ខ្ញុំនឹងខិតខំអស់ពីសមត្ថភាពនិងធ្វើការជាមួយនឹងសមត្ថភាពពេញលេញដើម្បីផ្លាស់ប្តូរប្រទេស»៕
ប្រាយុទ្ធ មុខស្រស់ឡើងវិញក្រោយតុលាការសំរេចអោយលោកបន្តកាន់តំណែង
ក្រោយត្រូវបានបញ្ឈរជើងកាលពីខែសីហា អនុប្រធានរបស់លោក គឺឧបនាយករដ្ឋមន្ត្រី ប្រាវីត វង់ស៊ូវ៉ាន បានចូលកាន់តំណែងនាយករដ្ឋមន្ត្រីចាំផ្ទះជំនួស នៅពេលលោកប្រាយុទ្ធនៅជារដ្ឋមន្ត្រីការពារជាតិ
