Views: 4
ដោយៈ មុនរ័ត្ន / ភ្នំពេញៈ លោកវេជ្ជបណ្ឌិត ស៊ឹម ស៊ូយេង អនុប្រធានប្រតិបត្តិ សមាគមTYDA ទទួលបន្ទុកបេសកកម្មសាលារៀន បានមានប្រសាសន៍ថាៈ លោក ហ៊ុន ម៉ាណែត និង លោកស្រី ពេជ ចន្ទមុន្នី ប្រធាន អនុប្រធាន ក្រុមប្រឹក្សាភិបាល តែងតែយកចិត្តទុកដាក់យ៉ាងខ្លាំង ក្នុងការថែទាំសុខមាលភាពរបស់ប្រជាពលរដ្ឋ និយាយជារួម និងនិយាយដោយឡែក លោកទាំងពីរ បានយកចិត្តទុកដាក់ ចំពោះសុខមាលក្មួយៗ សិស្សានុសិស្ស ដែលជាទំពាំងស្នងឫស្សី។
លោកវេជ្ជបណ្ឌិត ស៊ឹម ស៊ូយេង បានបន្ថែមទៀតថាៈ ការថែទាំសុខភាពបឋម និងសុខភាពមាត់ធ្មេញ មានសារៈសំខាន់ណាស់ ដែលតម្រូវឱ្យមានចូលរួមទាំងអស់គ្នា ព្រោះនៅពេលដែលសុខភាពមាត់ធ្មេញរឹងមាំ សុខភាពទូទៅ កាន់តែល្អប្រសើរ ហើយរាង្គកាយរឹងមាំ នោះក្មួយៗ មករៀនសូត្របានទៀងទាត់ ដែលនឹងឱ្យលទ្ធផល សិក្សាបានល្អ។
លោកវេជ្ជបណ្ឌិត ក៏បានបញ្ជាក់ថាៈ រហូតមកដល់សព្វថ្ងៃនេះ TYDA មានអាយុ ១០ ឆ្នាំហើយ ដោយមានសមាជិកជាង ៨ពាន់នាក់ ហើយក្នុងរយៈពេល ១០ឆ្នាំនេះ TYDA បានព្យាបាលជំងឺទូទាំងប្រទេស បានជាង ៣៥ ម៉ឺននាក់ ហើយអ្នកជំងឺធ្ងន់ធ្ងរ ចំនួនជាង ៦ពាន់នាក់ ត្រូវបានសមាគម បញ្ចូនមកព្យាបាលបន្ត នៅរាជធានីភ្នំពេញ និងជាមួយដៃគូសហការនានា ក្នុងនោះ អ្នកជំងឺបេះដូងធ្ងន់ធ្ងរ ចំនួន ៥៨នាក់ បានបញ្ចូនមក និង វះកាត់ ដោយជោគជ័យផងដែរ។
លោក ឯក ឃុនឌឿន អភិបាលនៃគណៈអភិបាលខណ្ឌឫស្សីកែវ បានថ្លែងអំណរគុណ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលខិតខំស្វះស្វែង រកវ៉ាក់សាំង មកចាក់ជូនបងប្អូន ប្រជាពលរដ្ឋយើងទាំងអស់គ្នា។ ដោយសារយើង បានចាក់វ៉ាក់សាំងគ្រប់គ្នាៗនេះហើយ ទើបយើងបានជៀសផុតពីកូវីដ ១៩ ដែលផ្តល់ ឱកាសឱ្យយើងបានជួបជុំគ្នាដោយផ្ទាល់ ឡើងវិញ ក៏ដូចជាក្មួយៗ បានត្រឡប់មកសិស្សាវិញ ដែលខុសពីរយៈពេលកាល២ឆ្នាំមុន ដែលជំងឺកូវីដ -១៩ ។ សូមអំពាវនាវ ដល់បងប្អូន ប្រជាពលរដ្ឋ និងក្មួយៗទៅចាក់ វ៉ាក់សាំងដូសជំរុញ តាមការអំពាវនាវ របស់ក្រសួងសុខាភិបាល។
លោក ឯក ឃុនឌឿន ក៏បានផ្ដល់ដំបូន្មានឱ្យក្មួយៗសិស្សានុសិស្ស យកចិត្តទុកដាក់ថែទាំ សុខភាពផ្ទាល់ខ្លួន និងខិតខំរៀនសូត្រ ឱ្យបានពូកែ ចៀសឱ្យឆ្ងាយពីអំពើអបាយមុខ ផ្សេងៗ ដើម្បីក្លាយខ្លួនជាកូនល្អ សិស្សល្អ និងប្រជាពលរដ្ឋល្អ ដើម្បីចូលរួមអភិវឌ្ឍន៍ សង្គមជាតិ។
លោកអភិបាលខណ្ឌ បានគោរពថ្លែងអំណរគុណលោក ហ៊ុន ម៉ាណែត និងលោកស្រី ពេជ ចន្ទមុន្នី ដែលបានបញ្ជូនក្រុមការងារ និងកម្លាំងស្ម័គ្រចិត្ត នៃសមាគមគ្រូពេទ្យ ស្ម័គ្រចិត្តយុវជន សម្តេចតេជោ “TYDA ” ព្យាបាល និងអប់រំសុខភាពមាត់ធ្មេញ សិស្សានុសិស្ស វិទ្យាល័យឫស្សីកែវ និងថ្លែងអំណរគុណ យុវជនសមាគម អ.ម.ត យុវជន ស.ស.យ.ក. សប្បុរសជន លោក លោកស្រី មន្ត្រីសាលាខណ្ឌ លោកនាយកសាលា លោកគ្រូ អ្នកគ្រូ និងផ្នែកដែលពាក់ព័ន្ធ ដែលបានចូលរួមសហការរៀបចំកម្មវិធី ពិនិត្យជំងឺនាថ្ងៃនេះ។
សូមបញ្ជាក់ថា ក្រុមការងារ និងកម្លាំងស្ម័គ្រចិត្តនៃសមាគម TYDA ចំនួន ៨៧ នាក់ បានចុះពិនិត្យព្យាបាលជំងឺមាត់ធ្មេញ ជំងឺទូទៅ និងអប់រំ សុខភាពមាត់ធ្មេញ-សុខភាព ទូទៅ ជូនក្មួយៗសិស្សានុសិស្ស និងលោកគ្រូ អ្នកគ្រូ នៅវិទ្យាល័យឫស្សីកែវ ក្រោមវត្តមានលោក ឯក ឃុនឌឿន អភិបាលនៃគណៈអភិបាល ខណ្ឌឫស្សីកែវ លោក លោកស្រី មន្ត្រីសាលាខណ្ឌ លោកនាយកសាលា លោកគ្រូ អ្នកគ្រូ លោក លោកស្រី និងប្អូនៗ សិស្សានុសិស្ស និងអាណាព្យាបាល សរុប ៤០០ នាក់ និងបាននាំយកមក ជាមួយនូវកញ្ចប់ឃីត សម្រាប់ក្មួយៗ លោកគ្រូអ្នកគ្រូ និងអាណាព្យាបាលផងដែរ ក្នុងនោះ មានសៀវភៅរូបសម្តេច ចំនួន ២ក្បាល ប៊ិច ចំនួន ២ដើម ជែលលាងដៃ ៥ដប ម៉ាស ចំនួន ២០ម៉ាស ច្រាសដុសធ្មេញ ១ និងជូនវិទ្យាល័យឫស្សីកែវ ជែលលាងដៃ ចំនួន១២០ដបធំ និងម៉ាស់ ចំនួន ៥.០០០ ម៉ាស៕ V / N