Views: 2
ដោយ៖ សុវណ្ណកុម្ភៈ / ភ្នំពេញ៖ លោក វ៉ាត់ ចំរើន អគ្គលេខាធិការ នៃគណៈកម្មាធិការជាតិ រៀបចំការប្រកួតកីឡាស៊ីហ្គេម ឆ្នាំ២០២ (CAMSOC) បានមានប្រសាសន៍ថាៈ វិញ្ញាសាជាង ៥០០ លើ ៤០ ប្រភេទកីឡា កំពុងត្រូវបានត្រៀមដាក់ឲ្យប្រកួត ក្នុងព្រឹត្តិការណ៍កីឡាអាស៊ីអាគ្នេយ៍ លើកទី៣២ ឆ្នាំ២០២៣ នៅប្រទេសកម្ពុជា។
លោកអគ្គលេខាធិការ CAMSOC បានមានប្រសាសន៍បញ្ជាក់យ៉ាងដូច្នេះ នៅក្រោយកិច្ចប្រជុំ ពិភាក្សាត្រួតពិនិត្យការងារ របស់សហព័ន្ធកីឡាជាតិ និងផ្នែកពាក់ព័ន្ធ ដើម្បីសម្រេចលើវិញ្ញាសា ក្នុងការដាក់បញ្ចូលទៅក្នុង ការប្រកួតកីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា ដែលធ្វើឡើង នៅរសៀល ថ្ងៃទី១១ ខែសីហា ឆ្នាំ២០២២ នាទីស្នាក់ការកណ្ដាល គណៈកម្មាធិការជាតិអូឡាំពិកកម្ពុជា។
លោក វ៉ាត់ ចំរើន បានមានប្រសាសន៍ថាៈ ថ្ងៃនេះ អគ្គលេខាធិការដ្ឋានរបស់ គណៈកម្មាធិការជាតិ CAMSOC បានរៀបចំកិច្ចប្រជុំ ជាមួយសហព័ន្ធកីឡាជាតិ ហើយការរៀបចំនេះ គឺជាដំណើរការនៃផែនការការងារ ដែលដាក់ចេញដោយ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC ក៏ដូចជា លោកបណ្ឌិត ថោង ខុន អនុប្រធានអចិន្ត្រៃយ៍ CAMSOC បានឲ្យយើងធ្វើយ៉ាងណា ឲ្យខាងជំនាញនេះ មានគណៈកម្មាធិការជាតិអូឡាំពិក ក៏ដូចជា លោកអគ្គនាយក អ៊ុក សិទ្ធិជាតិ (អគ្គនាយកកីឡា) ត្រូវធ្វើការជាមួយគ្នា ជាមួយនឹង សហព័ន្ធជាតិ ដើម្បីមើលឃើញ អំពីការវិវឌ្ឍ នៅក្នុងផ្នែកបច្ចេកទេសនិងការរៀបចំ សហព័ន្ធជាតិ ក្នុងការប្រកួតស៊ីហ្គេម ឆ្នាំ២០២៣។
កីឡាចំនួន ៣៩ ប្រភេទ បូករួមទាំងកីឡាសម្ដែង១ប្រភេទ ត្រូវបានអនុម័ត ក្នុងកិច្ចប្រជុំ ក្រុមប្រឹក្សាសហព័ន្ធកីឡាអាស៊ីអាគ្នេយ៍ កាលពីខែកក្កដា ឆ្នាំ២០២២ នៅកម្ពុជា ស្របពេលថ្ងៃនេះ វិញ្ញាសាប្រកួត (Events) ជាង ៥០០ ស្ថិតក្នុងចង្កោមប្រភេទកីឡា ទាំង ៣៩ ត្រូវបានអង្គប្រជុំពិនិត្យ និងសម្រេចបានជាផ្លែផ្កា ដើម្បីត្រៀមដាក់បង្ហាញ ក្នុងកិច្ចប្រជុំសហព័ន្ធកីឡាអាស៊ីអាគ្នេយ៍ នៅសប្ដាហ៍ក្រោយ នាទីក្រុងបាងកក ប្រទេសថៃ។
លោកអគ្គលេខាធិការ បានលើកឡើងថាៈ អង្គប្រជុំ បានកំណត់វិញ្ញាសា ដែលត្រូវដាក់ចូល ក្នុងការប្រកួតប្រភេទកីឡានីមួយៗ ដែលត្រូវបានក្រុមប្រឹក្សាកីឡាអាស៊ីអាគ្នេយ៍ បានសម្រេច រួចហើយ។ អ្វីដែលយើងទទួលបាននូវធាតុចូលសំខាន់ៗ ពីគ្រប់ប្រភេទកីឡា ទាំងអស់ ដោយដាក់វិញ្ញាសារបស់ខ្លួន គឺដើម្បីសប្ដាហ៍ក្រោយនេះ គឺជាថ្ងៃដែលប្រជុំ សហព័ន្ធកីឡាអាស៊ីអាគ្នេយ៍ នៅឯទីក្រុងបាងកក។ យើងនឹងបង្ហាញគេអំពី ប្រភេទវិញ្ញាសា ដែលយើងត្រូវបានសម្រេចដាក់ នៅក្នុងស៊ីហ្គេម។ អីចឹង បើយើងបូកទៅគឺជាង ៥០០ វិញ្ញាសា ស្មើនឹងជាង ៥០០ មេដាយ ដែលយើងត្រូវរៀបចំ នៅស៊ីហ្គេម ២០២៣ ។
យើងបានស្គេនគ្រប់ប្រភេទកីឡាទាំងអស់ ឲ្យមានភាពជាក់លាក់ថា វិញ្ញាសាដែលគាត់ បានដាក់នេះ ពិតជាមានយុទ្ធសាស្ត្រច្បាស់លាស់ សម្រាប់ប្រភេទកីឡារបស់ខ្លួន។ គាត់មានយុទ្ធសាស្ត្រ សម្រាប់ស្វែងរកឧត្តមភាព។ គាត់មានយុទ្ធសាស្ត្រ សម្រាប់ស្វែងរកសក្ដានុពល ហើយគាត់មានយុទ្ធសាស្ត្រ ក្នុងការស្វែងរកនូវ ជ័យលាភីរបស់គាត់។ យើងប្រជុំថ្ងៃនេះ យើងលម្អិតអំពីចំណុចតូចៗណា ដែលយើងមិនទាន់យល់គ្នា។ ភាពស្រពេចស្រពិល មិនទាន់យល់ យុទ្ធសាស្ត្រស៊ីជម្រៅ គឺត្រូវបើកកកាយ នៅថ្ងៃនេះ។
សហព័ន្ធទាំងអស់ គឺយើងបានទទួល ហើយនូវគម្រោងផែនការ និងការកំណត់ប្រភេទវិញ្ញាសារបស់គាត់ បានរួចរាល់អស់ហើយ។ យើងនៅសេសសល់តិចតួច។ យើងនឹងបញ្ចប់ នៅថ្ងៃនេះ និងថ្ងៃស្អែក ហើយដើម្បីថ្ងៃច័ន្ទ យើងយកទៅក្នុងកិច្ចប្រជុំ សហព័ន្ធកីឡា អាស៊ីអាគ្នេយ៍ នៅទីក្រុងបាងកក។
លោក វ៉ាត់ ចំរើន បានសង្កត់ធ្ងន់ថាៈ នេះគឺជាជោគជ័យ មួយជំហានទៀត សម្រាប់ការរៀបចំផ្នែកបច្ចេកទេស និងស្វែងរកឧត្តមភាព ក្នុងការប្រកួតកីឡាស៊ីហ្គេម ដោយមានការ ណែនាំបន្ថែម ដល់សហព័ន្ធ ត្រូវយកចិត្តទុកដាក់មើល ការហ្វឹកហាត់របស់កីឡាករ កីឡាការិនី ជម្រើសជាតិ ជំរុញខាងផ្នែកចិត្តសាស្ត្រ ជំរុញខាងផ្នែកការគាំទ្រ ជំរុញខាងផ្នែក ការហ្វឹកហាត់កម្លាំងកាយ ទាំងបច្ចេកទេស ឲ្យបានស្របគ្នា ព្រោះកីឡាករ កីឡាការិនី គឺជាតួឯកនៅក្នុងស៊ីហ្គេម ឆ្នាំ២០២៣។
ដោយគោរពតាមការណែនាំដ៏ខ្ពង់ខ្ពស់ របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC និងលោកបណ្ឌិត ថោង ខុន អនុប្រធានអចិន្ត្រៃយ៍ CAMSOC គឺត្រូវធ្វើយ៉ាងណាឲ្យ មានភាពស្មោះត្រង់ និងមានភាពបរិសុទ្ធថ្លៃថ្នូរ ក្នុងការធ្វើការងារបច្ចេកទេស មិនមែនជា ការរៀបចំ ដោយមិនគោរព បទបញ្ជាការប្រកួត និងគោលការណ៍ Fair Play នោះឡើយ ពោលគឺ ធ្វើយុទ្ធសាស្ត្រ នៅក្នុងបច្ចេកទេស និងក្នុងក្របខណ្ឌនៃ បទបញ្ជាប្រកួត៕/V