Views: 4
ប្រែសម្រួល : កញ្ញាដាលីស (ដេល្លីម៉េល) ៖ នីម៉ាដែលទើបជាពីរបួសវិញបានស្ថិតក្នុងចំណោមអ្នកស៊ុតបញ្ចូលទី ខណៈប្រេស៊ីលបានឡើងទៅវគ្គ ៨ ក្រុមចុងក្រោយនៃព្រឹត្តិការណ៍វើលខាប់ជាមួយនឹងការបំបាក់កូរ៉េខាងត្បូង ៤-១ ដែលឃើញគ្រាប់បាល់ទាំងអស់របស់ពួកគេបានកើតឡើងនៅតង់ទី១។
គូប្រកួតរបស់ពួកគេក្នុងវគ្គ ៨ ក្រុមចុងក្រោយគឺក្រូអាស៊ី ដែលមុននោះបន្តិចយកឈ្នះជប៉ុន ៣-១ ដោយការស៊ុតបាល់ប៉េណាល់ទី បន្ទាប់ពីស្មើគ្នា ១-១ ខណៈអ្នកចាំទី ដូមីនិក លីវ៉ាកូវិក (Dominik Livakovic) បានសង្គ្រោះបាល់បាន៣ដងក្នុងការស៊ុតបាល់១១ម៉ែត្រ។
ការលេងយ៉ាងល្អក្នុងតង់ទីមួយរបស់ប្រេស៊ីលនៅកីឡដ្ឋាន 974 បានចាប់ផ្តើមជាមួយការស៊ុតបញ្ចូលទីនៅនាទីទី ៧ ពីសំណាក់កីឡាករ វីនីសៀស ជូនៀ (Vinicius Junior) ដោយនីម៉ាដែលទើបត្រឡប់មកវិញបន្ទាប់ពីខកខានការប្រកួតពីរលើកមុនដោយសាររបួសកជើង បន្ទាប់មកបានបន្ថែមបាល់ពិន័យ១១ម៉ែត្រនៅ៦នាទីក្រោយមកដោយសល់តែ១គ្រាប់នឹងតាមទាន់កំណត់ត្រារបស់លោកប៉េឡេ។
ការស៊ុតចូលទីបន្ថែមទៀតបានកើតឡើងចេញពីកីឡាកររីឆាលីសុន (នាទី២៩) និងកីឡាករលូកាស ប៉ាក្វេតា (Lucas Paqueta)(នាទី៣៦)ខណៈក្រុមរបស់លោកទីតេបានទទួលជ័យជម្នះជាស្រេចត្រឹមតង់ទីមួយ។
កីឡាករ ផែក សឹងហូ (Paik Seung-ho) បានស៊ុតចូល១គ្រាប់លួងចិត្តឱ្យកូរ៉េខាងត្បូងវិញ ខណៈម៉ោងធម្មតានៅសល់ត្រឹម ១៤ នាទី។
នៅក្នុងការប្រកួតមួយទៀតមុននោះកាលពីថ្ងៃចន្ទនៅកីឡដ្ឋាន Al Janoub ក្រុមជើងឯករងឆ្នាំ ២០១៨ ក្រូអាស៊ីត្រូវបានកីឡាករជប៉ុន ដាយហ្សិន មេដា (Daizen Maeda)ស៊ុតនាំមុខមុននៅនាទីទី ៤៣ មុនពេលក្រូអាស៊ីតាមស្មើវិញតាមរយៈការតែតបាល់បញ្ចូលទីរបស់កីឡាករ អ៊ីវ៉ាន់ ភើរីហ្ស៊ីក (Ivan Perisic) នៅនាទីទី ១០ ក្នុងតង់ទីពីរ។
នៅក្នុងការស៊ុតបាល់១១ម៉ែត្រកាត់សេចក្តី អ្នកចាំទីលីវ៉ាកូវិកបានចាប់ជាប់បាល់ស៊ុតរបស់កីឡាករ តាគូមី មីណាមីណុ (Takumi Minamino) កៅរូ មីតូម៉ា (Kaoru Mitoma) និង ម៉ាយ៉ា យ៉ូស៊ីដា (Maya Yoshida) ខណៈជប៉ុន ដែលមិនធ្លាប់ឡើងដល់វគ្គ ១/៤ ផ្តាច់ព្រ័ត្រនៃវើលខាប់ មិនអាចបង្កការភ្ញាក់ផ្អើលដូចដែលពួកគេបានបំបាក់អាល្លឺម៉ង់និងអេស្ប៉ាញក្នុងវគ្គចែកពូល។
ក្រូអាស៊ីនឹងត្រូវប៉ះប្រេស៊ីលនៅថ្ងៃសុក្រនៅកីឡដ្ឋាន Education City៕
នីម៉ាស៊ុតប៉េណាល់ទីចូលទីកូរ៉េខាងត្បូង
