Views: 1
ប្រែសម្រួល : កញ្ញាដាលីស (ដេល្លីម៉េល) ៖ អង្គការសុខភាពពិភពលោក (WHO) បានអំពាវនាវកាលពីថ្ងៃពុធទី ១៧ ខែសីហា ឱ្យអ្នកឆ្លងជំងឺអុតស្វាជៀសវាងការធ្វើឱ្យសត្វប៉ះពាល់នឹងវីរុស បន្ទាប់ពីមានករណីដំបូងនៃការចម្លងជំងឺនេះពីមនុស្សទៅឆ្កែ។
ករណីដំបូងនៃការឆ្លងអុតស្វាពីមនុស្សទៅឆ្កែ គឺ រវាងបុរសពីរនាក់និងសត្វឆ្កែប្រផេះពូជអ៊ីតាលីរបស់ពួកគេ ដែលរស់នៅជាមួយគ្នានៅទីក្រុងប៉ារីស ត្រូវបានរាយការណ៍កាលពីសប្តាហ៍មុននៅក្នុងទស្សនាវដ្តីវេជ្ជសាស្ត្រ The Lancet ។
លោកស្រីវេជ្ជបណ្ឌិត រ៉ូសាម៉ុន ឡេវីស (Rosamund Lewis) ជាអ្នកដឹកនាំបច្ចេកទេសរបស់ WHO សម្រាប់ជំងឺអុតស្វា បានប្រាប់អ្នកយកព័ត៌មានថា”នេះគឺជាករណីដំបូងដែលត្រូវបានរាយការណ៍ពីការឆ្លងពីមនុស្សទៅសត្វ…ហើយយើងជឿថាវាជាករណីដំបូងដែលឆ្កែឆ្លងជំងឺនេះ”។
លោកស្រីបាននិយាយថា អ្នកជំនាញបានដឹងពីហានិភ័យតាមទ្រឹស្តី ដែលការឆ្លងបែបនេះអាចកើតឡើង ហើយទីភ្នាក់ងារសុខភាពសាធារណៈនានាបាននិងកំពុងណែនាំអ្នកកើតជំងឺនេះរួចហើយឱ្យ “ដាក់ខ្លួនដាច់ដោយឡែកពីសត្វចិញ្ចឹមរបស់ពួកគេ”។
លើសពីនេះទៀត លោកស្រីបាននិយាយថា “ការគ្រប់គ្រងកាកសំណល់មានសារៈសំខាន់ណាស់” ដើម្បីកាត់បន្ថយហានិភ័យនៃការបំពុលពពួកសត្វកកេរ និងសត្វដទៃទៀតនៅខាងក្រៅផ្ទះ។
លោកស្រីបាននិយាយថា វាមានសារៈសំខាន់ណាស់សម្រាប់មនុស្សក្នុងការ “មានព័ត៌មានអំពីរបៀបការពារសត្វចិញ្ចឹមរបស់ពួកគេ ក៏ដូចជារបៀបគ្រប់គ្រងកាកសំណល់របស់ពួកគេដើម្បីកុំឱ្យសត្វពាហនៈជាទូទៅប៉ះពាល់នឹងវីរុសអុតស្វា”៕
ទីភ្នាក់ងារសុខភាពសាធារណៈនានាបាននិងកំពុងណែនាំអ្នកកើតជំងឺឱ្យ “ដាក់ខ្លួនដាច់ដោយឡែកពីសត្វចិញ្ចឹមរបស់ពួកគេ”
