Views: 1
ប្រែសម្រួល : កញ្ញាដាលីស (បាល់ទាត់) ៖ ហូឡង់ត្រូវបើកឆាកវគ្គ១៦ក្រុមចុងក្រោយមុនគេទល់នឹងសហរដ្ឋអាម៉េរិកនៅម៉ោង ២២៖០០ ហើយវាជាប្រកួតមួយដែលពួកគេមានប្រៀបជាង ខណៈអាហ្សង់ទីន ដែលកំពុងឡើងជើងខ្លាំង ត្រូវប៉ះអូស្ត្រាលីនៅវគ្គនេះផងដែរ។
– ហូឡង់ vs សហរដ្ឋអាម៉េរិក
* ហូឡង់មិនដែលចាញ់សោះក្នុងការប្រកួតវើលខាប់ ១០ លើកក្រោមការដឹកនាំរបស់លោក Louis van Gaal ដោយឈ្នះ ៧ លើក។
* ហូឡង់បានឈ្នះ ១៣ នៃការប្រកួតវើលខាប់ ១៩ លើកចុងក្រោយរបស់ពួកគេជាមួយនឹងក្រុមមិនមែនអឺរ៉ុប។
* សហរដ្ឋអាម៉េរិកបានចាញ់ ១៣ លើកក្នុងចំណោម ២៣ ប្រកួតរបស់ពួកគេជាមួយនឹងក្រុមអឺរ៉ុបនៅវើលខាប់។
* ហូឡង់បានឈ្នះ៧លើកពីការប្រកួត៩លើកចុងក្រោយរបស់ពួកគេ។
ការប្រកួតបើកឆាកនៃវើលខាប់វគ្គ ១៦ ក្រុមចុងក្រោយគឺឃើញហូឡង់ត្រូវជួបសហរដ្ឋអាម៉េរិក ខណៈហូឡង់កាន់តែមើលទៅជាក្រុមគួរឱ្យខ្លាចនៅក្នុងដំណាក់កាលចុងក្រោយនៃវើលខាប់។ ខណៈពួកគេបានធ្លាក់ក្នុងដំណាក់កាលនេះនៃយូរ៉ូកាលពីឆ្នាំមុន កំណត់ត្រារបស់ពួកគេបានបង្ហាញថា ពួកគេនឹងមិនទទួលរងនូវជោគវាសនាស្រដៀងគ្នានៅក្នុងប្រទេសកាតានោះទេ។
ហូឡង់មិនស្គាល់ចាញ់សោះក្នុងការប្រកួតវើលខាប់ទាំង១០លើករបស់ពួកគេក្រោមការដឹកនាំរបស់លោក Louis van Gaal (ឈ្នះ៧ ស្មើ៣) ដោយរក្សាបាន Clean Sheet ៥ ដងក្នុងការប្រកួត៦លើកចុងក្រោយ។ ហូឡង់ក៏មិនស្គាល់ចាញ់ក្នុងការប្រកួតវើលខាប់ ១៩ ប្រកួតចុងក្រោយរបស់ពួកគេផងដែរជាមួយនឹងប្រទេសមិនមែនអឺរ៉ុបចាប់តាំងពីចាញ់ប្រេស៊ីល ៣-២ ក្នុងការប្រកួតវគ្គ ១/៤ ផ្តាច់ព្រ័ត្រឆ្នាំ ១៩៩៤ ដោយឈ្នះ ១៣ នៃការប្រកួតទាំងនោះ។
សហរដ្ឋអាម៉េរិកបានទម្លាក់អ៊ីរ៉ង់ដើម្បីឆ្លងផុតពូល B ប៉ុន្តែពួកគេបានបាត់បង់អ្នកស៊ុតបញ្ចូលទី Christian Pulisic ដោយសាររបួសក្នុងជ័យជម្នះនោះ។ Pulisic គឺជាកីឡាករមិនសំខាន់សម្រាប់ក្លិបរបស់គេ ប៉ុន្តែរូបគេមានសារៈសំខាន់សម្រាប់ប្រទេសរបស់គេ។
ខ្សែបម្រើស្លាបរបស់ Chelsea រូបនេះបានចូលរួមដោយផ្ទាល់ក្នុងការស៊ុតបញ្ចូលទីចំនួន ៦ គ្រាប់ក្នុងការបង្ហាញខ្លួនជាអន្តរជាតិចំនួន ៩ លើកចុងក្រោយរបស់គេសម្រាប់សហរដ្ឋអាម៉េរិក រួមទាំងគ្រាប់បាល់ទាំងពីររបស់ពួកគេនៅក្នុងការប្រកួតវើលខាប់លើកនេះ។ សរុបមក រូបគេបានស៊ុតបាល់បញ្ចូលទីច្រើនជាងពីរដង (២២) សម្រាប់សហរដ្ឋអាម៉េរិក ធៀបនឹងកីឡាករផ្សេងទៀតនៅក្នុងក្រុម។ បើគ្មានរូបគេទេ ពួកគេនឹងជួបការលំបាកក្នុងការទម្លុះរនាំងការពារដ៏រឹងមាំរបស់ហូឡង់។
អាម៉េរិកក៏ត្រូវជម្នះលើកំណត់ត្រាអន់នៅដំណាក់កាលនេះនៃវើលខាប់ផងដែរ។ សហរដ្ឋអាម៉េរិកបានចាញ់៣ប្រកួតក្នុងចំណោមការប្រកួតវគ្គ ១៦ ក្រុមចុងក្រោយរបស់ពួកគេចំនួន៤ដងក្នុងប្រវត្តិសាស្ត្រវើលខាប់។ ពួកគេក៏មិនដែលឈ្នះផងដែរក្នុងការប្រកួតវើលខាប់ ១១ លើកចុងក្រោយរបស់ពួកគេជាមួយនឹងប្រទេសនៅអឺរ៉ុប។ សរុបមក អាម៉េរិកចាញ់ ១៣ ប្រកួតក្នុងចំណោម ២៣ ប្រកួតជាមួយក្រុមមកពីអឺរ៉ុបនៅវើលខាប់។
កីឡាករ Cody Gakpo បានធ្វើឱ្យហូឡង់នាំមុខមុន ១-០ ក្នុងការប្រកួតទាំង៣លើករបស់ពួកគេនៅវើលខាប់ ហើយឥឡូវនេះរូបគេរកបាន ៥ គ្រាប់ក្នុង ៦ ប្រកួតចុងក្រោយរបស់គេសម្រាប់ជម្រើសជាតិហូឡង់។ ខ្សែប្រយុទ្ធរូបនេះកំពុងឈានជើងឆ្ពោះទៅដណ្តើមពានរង្វាន់ស្បែកជើងមាស បន្ទាប់ពីការចាប់ផ្តើមដ៏អស្ចារ្យរបស់គេ ហើយរូបគេនឹងក្លាយជាកីឡាករ ដែលហូឡង់ពឹងពាក់លើដើម្បីភាពជោគជ័យក្នុងវើលខាប់។
សហរដ្ឋអាម៉េរិកអាចផ្តល់ឱ្យហូឡង់នូវការធ្វើតេស្តិ៍ស្រដៀងគ្នាទៅនឹងអេក្វាឌ័រដែរ ដោយផ្អែកលើរបៀបដែលពួកគេរៀបចំក្រុម ប៉ុន្តែអាម៉េរិកខ្វះប្រយុទ្ធស្រួចដើម្បីឆាឆៅតំបន់ការពាររបស់គូប្រជែង។ ពួកគេរកបានតែ៣គ្រាប់ប៉ុណ្ណោះក្នុងការប្រកួតក្នុងពូលទាំង៣របស់ពួកគេ ដូច្នេះវាងាយនឹងមើលយល់ណាស់ថានេះជាការប្រកួតដ៏តានតឹង តែទោះយ៉ាងណាហូឡង់មានប្រៀបឈ្នះខ្ពស់ជាង។
លទ្ធផលព្យាករណ៍ ហូឡង់ឈ្នះ ១-០។
– អាហ្សង់ទីន vs អូស្ត្រាលី
* អាហ្សង់ទីនបានរបូតគ្រាប់បាល់ត្រឹមតែ៤គ្រាប់ប៉ុណ្ណោះក្នុង១២ប្រកួតក្នុងឆ្នាំ២០២២។
* អាហ្សង់ទីនបានឈ្នះ៧លើកពីការប្រកួត៨លើកចុងក្រោយរបស់ពួកគេដោយមិនរបូតគ្រាប់បាល់។
* កីឡាករ Julian Alvarez បានស៊ុតបញ្ចូលទីទល់នឹងប៉ូឡូញ។
* អាហ្សង់ទីនបានឈ្នះ២ប្រកួតចុងក្រោយរបស់ពួកគេក្នុងលទ្ធផល ២-០។
អាហ្សង់ទីនត្រូវប៉ះអូស្ត្រាលីក្នុងការប្រកួតវើលខាប់វគ្គ ១៦ ក្រុមចុងក្រោយនៅថ្ងៃសៅរ៍នេះ ក្នុងនាមជាក្រុមរំពឹងឈ្នះវើលខាប់ខ្ពស់បំផុតមួយនៅកាតា។
ក្រុមអាម៉េរិកខាងត្បូងនេះបានរងបរាជ័យដ៏គួរឱ្យភ្ញាក់ផ្អើលក្រោមស្នាដៃអារ៉ាប៊ីសាអូឌីតក្នុងការប្រកួតបើកឆាករបស់ពួកគេ ប៉ុន្តែបានងើបឡើងវិញជាមួយនឹងជ័យជម្នះ ២-០ លើម៉ិកស៊ិកនិងប៉ូឡូញ ដើម្បីរក្សាកៅអីទៅវគ្គបន្ត។
អូស្ត្រាលីមានលក្ខណៈសម្បត្តិគ្រប់គ្រាន់ជាងដាណឺម៉ាកនិងទុយនេស៊ីដើម្បីឡើងទៅវគ្គបន្តពីពូល D រួមជាមួយនឹងក្រុមម្ចាស់ជើងឯកបារាំង ប៉ុន្តែពួកគេទំនងជាមិនបង្កបញ្ហាដល់ក្រុមអាហ្សង់ទីនដែលលេងស៊ីចង្វាក់គ្នាយ៉ាងល្អនៅថ្ងៃសៅរ៍នេះទេ។
Lionel Messi អាចជាកីឡាករល្បីឈ្មោះសម្រាប់អាហ្សង់ទីន ប៉ុន្តែការពិត ភាពជោគជ័យរបស់ពួកគេត្រូវបានកសាងឡើងដោយផ្អែកលើតំបន់ការពារដ៏រឹងមាំ ហើយពួកគេអាចដណ្តើមបានជ័យជម្នះមួយផ្សេងទៀតដោយគ្មានអ្នកស៊ុតចូលទី ពេលពួកគេប្រកួតប៉ះក្រុមកង់ហ្គូរូនៅកីឡដ្ឋាន Ahmad bin Ali ក្នុងទីក្រុង Al Rayyan។
អាហ្សង់ទីនបានឈ្នះ ៧ ប្រកួតក្នុងចំណោម ៨ ប្រកួតចុងក្រោយរបស់ពួកគេដោយមិនរបូតគ្រាប់បាល់ ហើយ២គ្រាប់ដែលពួកគេបានរបូតទល់នឹង អារ៉ាប៊ីសាអូឌីត គឺគ្រាន់តែជាគ្រាប់ទី ៣ និងទី ៤ ដែលពួកគេបានរបូតក្នុង ១២ ប្រកួតក្នុងឆ្នាំ ២០២២ ប៉ុណ្ណោះ។
អូស្ត្រាលីអាចស៊ុតបាន១គ្រាប់ទល់នឹងបារាំង និងបានយកឈ្នះទាំងក្រុមដាណឺម៉ាកនិងទុយនេស៊ីក្នុងលទ្ធផល ១-០ ដូច្នេះពួកគេបានស៊ុតបញ្ចូលទីក្នុងរាល់ការប្រកួតទាំង៣របស់ពួកគេរហូតមកទល់ពេលនេះ ប៉ុន្តែអាហ្សង់ទីនមានខ្សែការពារល្អបំផុតនៅវើលខាប់ ហើយអាចនឹងកក់កៅអីវគ្គ ១/៤ ផ្តាច់ព្រ័ត្រដោយមិនរបូតគ្រាប់បាល់។
Messi តែងតែមានលទ្ធភាពខ្ពស់ក្នុងការស៊ុតបញ្ចូលទីសម្រាប់អាហ្សង់ទីន បើទោះបីជារូបគេស៊ុតប៉េណាល់ទីមិនចូលទល់នឹងប៉ូឡូញក៏ដោយ ប៉ុន្តែកីឡាករ Julian Alvarez របស់ Manchester City ក៏ទំនងជាបេក្ខជនស៊ុតបញ្ចូលទីឱ្យអាហ្សង់ទីនដែរ។
កីឡាករវ័យ ២២ ឆ្នាំរូបនេះត្រូវបានផ្តល់ឱកាសលេងជម្រើសដំបូងក្នុងវើលខាប់លើកដំបូងរបស់គេទល់នឹងប៉ូឡូញ ហើយបានស៊ុតចូល១គ្រាប់ ដូច្នេះរូបគេគួរតែរក្សាតំណែងក្នុងជម្រើសដំបូងនៅថ្ងៃនេះ។
ជ័យជម្នះ ២-០ ផ្សេងទៀតសម្រាប់អាហ្សង់ទីន គឺជាជម្រើសដ៏ល្អបំផុត។ កូនក្រុមរបស់លោក Lionel Scaloni មានភាពប៉ិនប្រសព្វក្នុងការគ្រប់គ្រងការប្រកួត ហើយពួកគេបានចាប់ផ្តើមជាន់ហ្គ័រមួយទំហឹង បន្ទាប់ពីឈ្នះ ២-០ នៅពីរលើកចុងក្រោយ ហើយរឿងនេះអាចនឹងកើតឡើងម្តងទៀតនៅថ្ងៃសៅរ៍នេះ៕
អាហ្សង់ទីនកំពុងកើនសន្ទុះលេង ហើយអាចនឹងឈ្នះអូស្ត្រាលីក្នុងលទ្ធផល ២-០ សាជាថ្មី
