Views: 3
ប្រែសម្រួល : កញ្ញាដាលីស (The Drive) ៖ យន្តហោះចម្បាំង J-15 របស់ចិន ដែលទំនងធ្វើប្រតិបត្តិការពីនាវាផ្ទុកយន្តហោះ Liaoningត្រូវបានគេមើលឃើញកំពុងហោះរំលងពីលើនាវាពិឃាដក្នុងប្រភេទថ្នាក់ Arleigh Burke របស់កងទ័ពជើងទឹកអាម៉េរិកមួយគ្រឿង នៅក្នុងវីដេអូមួយដែលបង្ហាញនៅលើកញ្ចក់ទូរទស្សន៍រដ្ឋចិន CCTV កាលពីពេលថ្មីៗនេះ។
វីដេអូនេះកើតឡើងភ្លាមៗបន្ទាប់ពីរូបភាពមួយបានបង្ហាញយន្តហោះ J-15 ចំនួន ២៤ គ្រឿងតម្រៀបជួរនៅលើនាវាផ្ទុកយន្តហោះតែមួយ និងខណៈគេមិនច្បាស់ថាកាលបរិច្ឆេទទាំងនេះចេញមកពីពេលណា ការបង្ហាញរូបភាពនេះឥឡូវពិតជាគួរឱ្យចាប់អារម្មណ៍ ដោយសារតែភាពតានតឹងដែលកំពុងកើនឡើងនាពេលបច្ចុប្បន្នរវាងចិននិងអាម៉េរិកជុំវិញកោះតៃវ៉ាន់ក៏ដូចជាការឆ្លុះបញ្ចាំងពីចរិតនៃការពើបប្រទះគ្នាញឹកញាប់ឡើងរវាងកងកម្លាំងអាម៉េរិកនិងចិននៅក្នុងតំបន់អាស៊ីប៉ាស៊ីហ្វិក។
គេក៏មិនច្បាស់ដែរថាតើវីដេអូនៃយន្តហោះ J-15 ហោះរំលងពីលើនាវាពិឃាដរបស់កងទ័ពជើងទឹកអាម៉េរិកមិនស្គាល់អត្តសញ្ញាណមួយនោះ ត្រូវបានថតនៅទីណាប៉ុន្តែមានការសន្និដ្ឋានថាឧបទ្ទវហេតុនេះបានកើតឡើងនៅច្រកសមុទ្រតៃវ៉ាន់ ដែលបំបែកតៃវ៉ាន់ចេញពីចិនដីគោក។ ប្រសិនបើវីដេអូនោះគឺថតចេញពីច្រកសមុទ្រតៃវ៉ាន់ នោះវាទំនងជាការឆ្លើយតបទៅនឹង “ការសម្ញែងកម្លាំង”ដែលនាវាចម្បាំងអាម៉េរិកបានធ្វើនៅទីនោះកាលពីពេលថ្មីៗក៏ដូចជាកន្លែងផ្សេងទៀតនៅក្នុងតំបន់អាស៊ីប៉ាស៊ីហ្វិក។
ជាការពិតណាស់ ច្រកសមុទ្រតៃវ៉ាន់គឺជាកន្លែងនៃសកម្មភាពយោធាដ៏ខ្លាំងក្លានាពេលថ្មីៗនេះដោយប្រទេសចិននិងសហរដ្ឋអាម៉េរិកព្រមទាំងសម្ពន្ធមិត្តរបស់ខ្លួន។ ជាពិសេសដំណើរទស្សនកិច្ចទៅកាន់កោះតៃវ៉ាន់របស់ប្រធានសភាអាម៉េរិក លោកស្រី ណាន់ស៊ី ផេឡូស៊ី នៅដើមខែសីហា បានបង្កឱ្យមានសមយុទ្ធយោធាជាបន្តបន្ទាប់នៅច្រកសមុទ្រតៃវ៉ាន់ ដែលបានបន្តពេញមួយខែ។
ជាមួយគ្នានេះដែរ កាលពីសប្តាហ៍មុន នាវាពិឃាដក្នុងប្រភេទថ្នាក់ Arleigh Burke ឈ្មោះ USS Higgins (DDG-76) និងនាវាចម្បាំងក្នុងប្រភេទថ្នាក់ Halifax ឈ្មោះ HMCS Vancouver របស់កងទ័ពជើងទឹកកាណាដា បានបើកឆ្លងកាត់ច្រកសមុទ្រតៃវ៉ាន់។ នេះគ្រាន់តែជាការឆ្លងកាត់ច្រកសមុទ្រថ្មីៗបំផុតដោយនាវាចម្បាំងរបស់កងទ័ពជើងទឹកអាម៉េរិក ហើយយន្តហោះ J-15 មិនបានហោះរំលងលើនាវាចម្បាំងនេះទេ។ ទោះយ៉ាងណា នាវាពិឃាដរបស់អាម៉េរិកបានធ្វើប្រតិបត្តិការនៅទូទាំងតំបន់នេះជាប្រចាំ រួមទាំងនៅសមុទ្រចិនខាងត្បូងជាទីដែលពួកវាក៏អាចពើបប្រទះនឹងយន្តហោះ J-15 ពីនាវាផ្ទុកយន្តហោះ Liaoning ផងដែរ៕
ទូរទស្សន៍ CCTV បង្ហាញវីដេអូនៃយន្តហោះចម្បាំង J-15 របស់ចិនហោះរំលងលើនាវាពិឃាដមិនស្គាល់ឈ្មោះមួយរបស់អាម៉េរិក