Lesotho
This article was added by the user . TheWorldNews is not responsible for the content of the platform.

Lingaka tsa Moetlo li re Basotho ba lla ka mosebetsi

By Liapeng Raliengoane

BUTHA-BUTHE – Lingaka tsa setso tse kahare ho setereke sa Butha-Buthe li hlalosa ha tlhokahalo ea mosebetsi e le e ka sehlohong eo bakuli ba bona ba llang ka eona.

Leha ho le joalo li re li hlokolosi haholo khahlanong le lefu la Covid-19 le tšoaetso ea HIV ha ba ntse ba thusa bakuli.

Ho ea ka sengoliloeng se bitsoang Melemo ea Lingaka tsa Sesotho ho Basotho e ngotsoeng ke Refiloe Lekhera, Melemo ea lingaka tsa Sesotho ke: ho nooa tse tla etsahala, ho fana ka likeletso, ho bolotsa, ho thiba sefako kapa lipula tse mpe, ho batlisa Basotho thepa e lahlehileng, ho tiisa, ho tharisa matlo, ho phekola le ho thusa ho thola mosebetsi.

Puisanong le Koranta ea Lentsoe la Sechaba, Ngaka ea moetlo ho hlaha motseng oa Manamela, Ngaka Marobele Marobele o itse ba sebetsa hantle katamelong ea litaba tsa tšoaetso ea HIV le Covid-19. A re ka lebollong pele ba amohela moshanyana ea batlang ho phetha metlo, ba hloka a tle le bukana ea bophelo, karete ea boitsebiso, bukana ea kentelo ea Covid-19 le ho isa eena moshanya eo setsing hore a lo hlahloba.

Potsong ea hore na bakuli ba bangata ba tlang ngakeng ho eena ke ba hlokang thuso ea eng, Ngaka Marobele o itse “Basotho ba bangata ba lla ka mosebetsi, ba hloka mosebetsi mme boholo bo tlang mona ke ba batlang thuso ea hore ba fumane mosebetsi.”

Ngaka e nngoe ea setso ho hlaha ‘Muela motseng oa Khatleng Ngaka Teboho Kereisane o itse e le lingaka ba ile ba fuoa thuto ea ho ipaballa le ho baballa bakuli ba bona ka hore motho e mong le e mong a sebelise lehare la hae.

A re bothata bo boholo ke hore ha ba ilo kopa liatlana ho thoe ha li eo litsing tsa bophelo e leng moo ba neng ba ntse ba li fumana teng, ka hoo o se a bile a sebelisa lipolasetiki ha a thusa bakuli. Ngaka Kereisane o itse bothata bona ba liatlana tse siko bo qalile pele Covid-19 e fihla mme  entse e le pharela le ha joale.

Ha a tsoelapele, ngaka –matsetsela o itse e le ngaka ea lebollo baipaballa le ho baballa bophelo ke ho qoba hore litšoaetso tse ncha li be teng ka hore: pele ba bolotsa bashanyana, ba qala litsing tsa bophelo e le ho hlahloba e be ba noang litlhare tsa bophelo bohle, ba fuoa monyetla oa hore ba nne ba li noe ha ba le thabeng.

Ha a liela likhala, Ngaka Kereisane o itse tabatabelo ea hae e kholo e le ngaka ebile e le mobulli, ke hore molao oa lebollo o fete.

Makherenkhoa e mong ho hlaha Tsime Ha Hlasoa Ngaka Kolana Mochache o itse tabeng ea lebollo, ba kopana le mathata a mangata a akhang hore batsoali ha b aba bolelle nnete ka bokulom ba bana ba bona mme sena qetellong se etsa hore bophelo bo lahlehe.

A hlalosa hape hore pele ba amohela bashanyana moetlong oa lebollo, ba labella hore ho tlisoe bukana hape moshanyana ea joalo a ilo etsa liteko setsing sa bophelo. “Re lokisa le setsi sa bophelo haeba re e-na le batho ba kulang mme re sebetsa hantle, ba tlisetsoa meriana ke setsi,” a rialo.

“Leha ho le joalo, ha ke sheba tšebetsong eaka ea bongaka bo lapeng, Basotho ba tlang ho nna ka bongata ke ba reng ba batla mesebetsi, mm eke ithutile hore tlhokahalo ea mesebetsi e ka sehlohong,” Ngaka Mochache a li teka joana.