Mongolia

This article was added by the user . TheWorldNews is not responsible for the content of the platform.

Хөгжлийн банкны асуудал дээр хүчний байгууллагуудын төлөөллөөс бүрдсэн ажлын хэсэг байгуулж ажиллахаар болжээ

2022-05-04

Хөгжлийн банкны чанаргүй зээлээс нийт 165 тэрбум төгрөгийн өр төлөгджээ.

Цаашид өр барагдуулах ажлыг эрчимжүүлэх, ялангуяа томоохон зээлүүдтэй холбоотой явуулах үйл ажиллагаа, төлөвлөгөөг өнөөдрийн Засгийн газрын хуралдаанаар хэлэлцэн шийдвэрлэжээ.

Хөгжлийн банкны хувьд энэ асуудлыг хөндөх болсон шалтгаан бол 2019 онд Монголбанкнаас Хөгжлийн банкинд хийсэн шалгалтаар нийт 812 тэрбум төгрөгийн зээлийн алдагдлын сан байгуулах акт тавьсан байдаг. Гэвч түүнээс хойш энэхүү актын дагуу тус бакны баланс дээр сан байгуулагдах гүйлгээ хийгдээгүй. Өмнө нь хийж байсан аудит, Монголбанкны шалгалтын дүн мөн зөрүүтэй байдаг. Тэгэхээр цаашид Хөгжлийн банк хуулийн дагуу хэвийн үйл ажиллагаагаа явуулахын тулд эдгээр чанаргүй зээлүүдийг богино хугацаанд төлүүлэх зайлшгүй шаардлага үүссэн юм.

2023 онд төлөгдөх ёстой 1.5 ихнаяд төгрөгийн Евро бонд, 725 тэрбум төгрөгийн Самурай бонд бий. Үүнээс онцгой анхаарах ёстой нь Самурай бонд. Учир нь энэ бол Засгийн газрын баталгаатай юм. Тэгэхээр өнөөдөр Хөгжлийн банкыг дампуурлын ирмэгт авчирсан чанаргүй зээлүүдийг төлүүлж чадахгүй бол энэ өрийг татвар төлөгчдийн мөнгөөр төлөх эрсдэл үүснэ. Тийм учраас Засгийн газар чанаргүй зээлийг богино хугацаанд төлүүлэх ажилд шуурхайлан орсон.

Энэ оны зургадугаар сарын 30 болон арванхоёрдугаар сарын 31-ний хугацаанд бодит үр дүнг гаргах ёстой. Өчигдөр Сангийн яамнаас өгсөн чиглэлийн дагуу чанаргүй зээлийн төлөгдсөн хэмжээгээр Самурай бондын өрийг төлж эхэлж байгаа юм байна. Тэгэхээр энэ онд чанаргүй зээлийн доод тал нь 1/3-ийг төлүүлэх, ирэх онд Самурай бондыг Хөгжлийн банкны чанаргүй зээлийн өр барагдуулалтаар төлүүлж татвар төлөгчдийн мөнгөнд ирэх эрсдэл гаргахгүй байх төлөвлөгөөтэй ажиллаж байгаа гэдгийг Сангийн сайд Б.Жавхлан мэдээллээ.

Мөн ойрын хугацаанд Засгийн газраас чанаргүй зээлийн асуудал дээр ажиллахад хуулийн байгууллагуудын оролцоо чухал бөгөөд шүүхийн шийдвэр гүйцэтгэх байгууллага, шүүх байгууллага, прокурорын байгууллага, ЦЕГ, АТГ гэхчлэн хууль хяналт, хүчний байгууллагуудын оролцоо, хамтын ажиллагаа чухлыг онцоллоо. Тиймээс Хууль зүйн сайдаар ахлуулсан Засгийн газрын харъяа хүчний байгууллагуудын төлөөллүүдийг багтаасан хүчний байгууллагын зайлшгүй оролцоотойгоор өр барагдуулах ажлыг зохион байгуулах үүрэг бүхий ажлын хэсэг байгуулах шийдвэрийг өнөөдрийн хуралдаанаар гаргажээ. Тус ажлын хэсэг нь хэрэг үүсгэн шалгаж байгаа, мөн хүчний байгууллагын оролцоо зайлшгүй шаардлагатай, Хөгжлийн банкны өр барагдуулах чиглэлээр ажиллаж байгаа ажилтнууд шууд оролцох боломжгүй, хуулийн хязгаарлалттай ч цаана нь өр барагдуулах боломжтой асуудлууд дээр ажиллах чиг үүрэгтэй байх юм байна.

2.1 ихнаяд төгрөгийн чанаргүй зээлд 40 аж ахуйн нэгж байна. Тухайлбал, Хөтөл цемент, Кю Эс Си компани нийт 490 тэрбум төгрөг, төрийн өмчит үйлдвэрийн 6 газар буюу тодруулбал, Эгийн гол усан цахилгаан станц 48 тэрбум, Тавантолгой дулааны цахилгаан станц 50 тэрбум, ТОСК-ийн Хөдөлгөөнт төсөл 25 тэрбум, Эрдэнэс Монгол-Таван толгой-Гашуун сухайт авто зам 154 тэрбум, ТОСК Буянт-Ухаа-1 төсөл 76 тэрбум, ТОСК Буянт-Ухаа-2 төсөл 99 тэрбум, нийт 452 тэрбум төгрөг. Тэгэхээр 2.1 ихнаяд төгрөгийн 900 гаруй тэрбум төгрөгийг эдгээр зээл эзэлж байна. Бусад 32 нь хувийн хэвшлийн аж ахуйн нэгжүүдийн чанаргүй зээлүүд гэсэн үг юм. Гэхдээ хувийн, албаны гэж ялгаварлалгүй албадлагын болон бусад шаардлагатай бүхий л арга хэмжээг авч ажиллах юм байна.