Mongolia

This article was added by the user . TheWorldNews is not responsible for the content of the platform.

Л.Чинбат захирал морь, мотоцикльгүй байсан учраас машинаар хөөсөн гэв

2023-06-16

Монгол Улсын Хөдөлмөрийн баатар, Гацуурт ХХК-ийн Ерөнхий захирал Л.Чинбат нь Сэлэнгэ аймгийн Цагааннуур сумын нутагт 350 орчим тооны адуу тууж ирснийг малчид болон нутгийн удирдлагууд нь эсэргүүцэж,

улмаар нөхцөл байдал ширүүсч гэмт хэргийн шинжтэй үйлдлүүд гарсныг цахим орчинд цацагдсан бичлэг харуулж байна. Харин үүн дээр "Гацуурт" ХХК-ийн талаас "сөрсөн базаа" хийж эхэлжээ.

Нутгийн удирдлагын зүгээс бэлчээрийн даац хэтэрсэн, мөн Дорнод, Сүхбаатар аймгийн малын халдварт өвний голомттой газруудаар дайрч ирсэн бөгөөд гарал үүслийн бичиггүй гэх адуунуудыг нутагтаа нэвтрүүлэхийг хориглосон тушаал шийдвэрийг гаргасан байж. Энэ дагуу адууг нь оруулахгүй гэсэн малчид руу дайрсан ноцтой асуудал үүссэнийг олон нийт бодит байдлаар нь харсан.

Бичлэгт гарснаар Л.Чинбат нь хуулийн дагуу хэд хэдэн хариуцлага хүлээх нөхцөл бүрдсэн гэх үндэслэл харагдаж байгаа юм. Харин тэрээр малын хулгайчтай тэмцэж, цагдаагийн байгууллагад гомдлоо гаргасан гэх тайлбарыг цахим хуудсандаа бичсэн байв. Энэ талаар албан ёсны тайлбар мэдээллийг хууль хяналтын байгууллагаас өгөөгүй байна.

Өчигдөр /2023.06.15/ цагдаагийн байгууллагаас "Сэлэнгэ аймгийн цагдаагийн газарт 2023 оны 06 дугаар сарын 15-ны өдөр иргэн "У"-аас тус аймгийн Зүүнбүрэн сумын 2 дугаар багт иргэн "Ч" гарал үүслийн бичиггүй адуу мал оруулах гэж иргэдийг автомашинаар дайрах гэж оролдсон гэх дуудлага мэдээлэл бүртгэгдсэн. Цагдаагийн байгууллагаас дуудлага, мэдээллийн дагуу холбогдох ажиллагааг хийн гомдол мэдээллийг бүртгэлд авч шалгалтын ажиллагааг үргэлжлүүлж байна. Сэлэнгэ аймгийн Зүүнбүрэн сумын 2 дугаар багт аймгийн төвөөс тус сум руу Цагдаагийн газрын бүрэлдэхүүн ажиллахаар явсан. Хойшлуулшгүй ажиллагаа дуусаагүй байна" гэсэн мэдээлэл өгсөн юм. Харин прокурор, шүүх байгууллагуудад албан ёсны мэдээлэл, санал ирээгүй байна.

Албан бус эх сурвалжийн мэдээллээр Л.Чинбатын адууг тууж ирсэн Ө.Даваабатар харцагыг ч шалгах сураг дуулдав.

"Гацуурт" ХХК-ийн ажилтнууд болон Цагааннуур сумын 3 дугаар багийн Засаг дарга Б.Ганзоригийн хамт ирсэн малчдын хооронд үүссэн асуудал энэ сарын 14-ний орой эхэлжээ. Компанийн ажилтан М.Цэрэнчимэгийн олон нийтийн сүлжээнд бичсэнээр, тэд тухайн үед зөвшөөрлийн бичгээ хүлээж байх үед багийн Засаг дарга Б.Ганзориг компанийн ажилчид, малчдын хооронд яс хаяж, нутаг усыг нь өвчин зовлонд нирвэгдүүлэх нь гээд адууг нь хөөж тараа хэмээн турхирсан гэнэ. Тиймээс морьтой, мотоцикльтэй, машинтай хүмүүсийг морьгүй, мотоцикльгүй юм чинь машинаар хөөсөн нь Л.Чинбат захирлын аргагүй үйлдэл гэжээ. Мөн Засаг дарга Б.Ганзориг хүн зодож, гарыг нь хугалж, эд хөрөнгийг нь устгасан тухай ч дурдсан байна. Товчхондоо зүгээр байсан хүмүүсийг өдөөн хатгаж, зүгээр байсан адууг хөөж тараасан учраас өөр арга байгаагүй гэнэ.

Ямартай ч Л.Чинбат баатарт холбогдох гомдлыг мөрдөн шалгах ажиллагаа үргэлжилж байгаа бололтой.