Mongolia

This article was added by the user . TheWorldNews is not responsible for the content of the platform.

Зөрчил шалган шийдвэрлэх тухай нэмэлт, өөрчлөлт оруулах төслийн хэлэлцүүлгийн үеэр Х.Нямбаатарын ОНЦЛОН дурдсан ИШЛЭЛҮҮД

2022-05-06

Зөрчил шалган шийдвэрлэх тухай хуульд нэмэлт, өөрчлөлт оруулах тухай хуулийн төслийг өчигдөр /2022.05.05/ УИХ-аар хэлэлцээд анхны хэлэлцүүлэгт бэлтгүүлэхээр шилжүүлсэн. Уг хуулийн төслийг хэлэлцэх эсэхийг хэлэлцэх үеэр ХЗДХ-ийн сайд Х.Нямбаатарын хэлсэн онцлох эшлэлүүдийг хүргэе. -Ардын уран зохиолч Б.Лхагвасүрэнгийн хэлснээр, төрийн ямбаны хувцсан дотор хатуу иртэй сэлэм ч бий, сүүн цагаан сэтгэл хоёр цуг хадгалагдах ёстой. Хатууд хатуу, зөвд зөөлөн хандаж байж төрийн гэмт явдалтай тэмцэх эрхзүйн эсрэг үйлдэлтэй тэмцэх бодлого хэрэгжих учиртай.

-Эхний удаад шууд хүний амь нас, эрүүл мэндэд гэм хор учрахааргүй анхны удаагийн үйлдэл дээр нь сануулаад, цаашид эрх зүйн ухамсар, соёл суух нь Зөрчлийн хуулийн үндсэн зорилго, шинж чанар.

-Төр шууд торгож шийтгэхээс илүүтэй зөвлөдөг, шалган тусладаг, чиглүүлдэг хяналт шалгалтынхаа тогтолцоо, механизмыг ажиллуулъя гэдэг агуулгаар шинэчилсэн найруулгын төслийг оруулж ирсэн.

-Илтэд худал мэдээлэл тараах гэдэг зохицуулалт эрүүгийн хуульд байгаа. Сонгуулийн үеэр худал мэдээлэл тараах гээд бас нэг зохицуулалт эрүүгийн хуульд байгаа. Дээр нь худал мэдээлэл тараахтай холбоотой хуульд нэмэлт, өөрчлөлт оруулах хуулийн төсөл Б.Энхбаяр гишүүн өргөн мэдүүлсэн. Эрүүгийн хуулийн нэмэлт, өөрчлөлтийн төслөөр үүнтэй холбоотой төрөл харилцаануудыг шинээр зохицуулахаар оруулсан байгаа. Энэ бүгдийг нэгтгээд хэлэлцээд явна.

-Саяхан Засгийн газрын хуралдаанаар хүний биометрик мэдээллийг устгах ажлын хэсгийг байгуулсан. Иргэдийн мэдээллийг хадгалж байгаа байгууллагуудаас мэдээллүүдийг хураах ажил хийгдэж байгаа.

-Эрүүгийн болон Зөрчлийн хуулиар цахим орчинд үйлдэгдэж байгаа гэмт хэрэгтэй тэмцэх тэмцлийг чангатгахаар энэ хуулиудын төслийг багц хуулиудын төслөөр оруулж ирсэн.

-Зөрчлийн хуульд байгаа хүүхдийн эрхийн зөрчлүүд ямарваа нэгэн байдлаар тухайн хохирогчид эрүүл мэндийн хувьд шууд хохирол учруулаагүй зөрчлийг Зөрчлийн тухай хуулиар томъёолж өгсөн.

-Монгол Улсын хариуцлагын нэгдсэн тогтолцоо яг одоо ромбо хэлбэртэй болчихсон. Хамгийн доод талын бага талбайтай хэсэгт төрийн хяналт шалгалт явагдаад, хамгийн том талбай эзэлсэн хэсэгт зөрчлийн харилцаа явагдаад, дээш нарийссан хэсэгт эрүүгийн хариуцлага гэсэн тогтолцоотой явж байна. Тэгэхээр үүнийг гурвалжин хэлбэртэй болгоё. Хамгийн их талбайтай хэсэгт төр хяналт шалгалт явуулж, шалгадаг, зөвлөдөг, шалган тусладаг орон зайгаа ихэсгэе. Сануулъя, зөрчлийг нь арилгуулъя, үнэхээр биелүүлэхгүй бол торгууль шийтгэлээ оноодог харилцааг үүсгэе.

-14 хоногийн дотор торгуулиа төлсөн тохиолдолд нийт торгуулийнх нь 50 хувийг чөлөөлөх байдлаар энэ хуулийн төсөлд тусгасан. Торгуулиа төлөөгүй бол төрийн зарим үйлчилгээг хязгаарлах, тухайлбал жолооны үнэмлэхийг нь сунгахгүй, хөдөлгөөнд оролцуулахгүй, гадаад паспорт олгохгүй, сунгахгүй байх, төрийн албаны шалгалтанд оруулахгүй гэх мэт хөшүүргүүдийг оруулж байгаа.

BOLOD.MN