Namibia
This article was added by the user . TheWorldNews is not responsible for the content of the platform.

A hulitha moshiponga shoshihauto sho a kambadhala okuhenuka eyinda mopate

Onkalo yookalyamupombo taya langele aaniihauto pakutula omayinda moopate oya faalele omwenyo gwomulumentu ngoka kwa li ta kambadhala okuhenuka omayinda, sha ningwa koongulasha dhOsoondaha mOndangwa.

Omulumentu gwomimvo 24 ngoka a li ta hingi otuukala okwa mana oondjenda mbala konima sho oshihauto she sha galangata pethimbo a li ta kambadhala okuhenuka omamanya ngoka ga li ga tegwa mopate tayi adhika momudhingoloko gwaNdjondjo, mOndangwa.

“Opo a yande okwi idhenga momamanya ngoka, okwa tokola opo e ga henuke naashoka oshe eta a nyengwe okukondolola oshihauto she nosha galangata,” osho olopota yopolisi ya popi ngaaka.

Nakusa okwa hololwa kutya oye Sakeus Pandu Shuuya nokwa yambukile kOshigambo moshitopolwa shaShikoto.

Nakusa otaku hokololwa kutya moshihauto oye awike a li mo.

Onkalo yaantu taya tulile yakwawo omayinda moopate pethimbo lyokongulohi otaku hokololwa tayi indjipala, nokwa konekiwa kutya omukalo ngoka ohagu longithwa kookalyamupombo mboka haya kambadhala okuthikameka iihauto pamukalo ngoka opo ye ya yuge iinima yawo.
OMAKWATONKONGA

Moshiningwanima sha yooloka, kakadhona gwomimvo 12 otaku hokololwa a kwatwonkonga molukanda lwedhina Osauyemwa talu adhika moRundu, sha ningwa mehuliloshiwike lya zi ko.

Pauyelele wa gandjwa kukomanda ta kwathele gwoshitopolwa shaKavango Uuzilo, omupevikomufala Lucia Kahuure, omufekelwa ngoka oku na omimvo 26 nokwa tulwa nale miipandeko.

Kahuure okwa popi kutya oshiningwanima shoka osha ningilwa megumbo komatango lwopotundi 19h00, sho taku hokololwa omufekelwa a yi miihulo nokanona.

Monkundana onkwawo yekwatonkonga, kakadhona gwomimvo 17, ngoka e na uunkundi wopamadhiladhilo otaku hokololwa a kwatwonkonga pethimbo a li a ka teka omeya pokapomba komomukunda sha ningilwa momukunda Okafitu Kakahala moshitopolwa shaMusati.

Oshiningwanima shoka otaku hokololwa sha ningwa komatango gOsoondaha lwopotundi 17h00.

Omukwatakanithi gwomakonakono giimbuluma moshitopolwa shaMusati, omupevikomufala Malakia Simaho okwa popi kutya omufekelwa ina tulwa natango miipandeko ashike okushiwike kopolisi.

OOMBUMBO

Pokati mpoka, aafekelwa yaali oya tulwa miipandeko sho taku hokololwa ya li taya kambadhala okugandja oombumbo kaanambelewa yomayakulo gopoongamba niifuta yokongulu yehangano lyedhina Namra.

Aafekelwa mboka, omulumentu gwomuChina nomukiintu gwomuAngola, oya tulwa miipandeko oshiwike shika notaku hokololwa ya ningi onkambadhala yokugandja oombumbo dhoshimaliwa shooN$50 000 komunambelewa gwoNamra.

Omupopiliko gwoNamra, Steven Ndorokaze, okwa popi kutya omulumentu okwa tulwa miipandeko mOmaandaha poombelewa dhaNamra mOvenduka omanga omukiintu okwa tulwa miipandeko mEtiyali poombelewa dhokomisi yokukondjitha uulingilingi moshilongo yo-Anti-Corruption Commission (ACC).

“Oombumbo ndhoka okwa li tashi gandjwa nelalakano opo iinima yongushu yoomiliyona N$6 yi mangululwe [kuNamra] yo yi gandjwe kehangano [lyedhina itaali tumbulwa], sho iinima mbyoka kwa li ya kwatwa po,” osho Ndorokaze a popi ngaaka..