Namibia
This article was added by the user . TheWorldNews is not responsible for the content of the platform.

Aafekelwa yatatu ya tulwa miipandeko omwedhi nguka omolwoombumbo

Komisi yokukondjitha uulingilingi moshilongo yedhina Anti-Corruption Commission (ACC) omwedhi nguka oya tula miipandeko aantu yatatu sho taku hokololwa ya li taya kambadhala okulonga uulingilingi wokugandja oombumbo kaanambelewa miikondo ya yooloka.

Oshiningwanima shotango osha ningwa momasiku 10 Juli sho omulumentu gwedhina Wilhelm Gideon (53) a tulwa miipandeko kaanambelewa yoACC pethimbo lyoshikonga shomonanguwi sho a gandja oombumbo dhoshimaliwa shooN$20 000 komupolisi opo a mangulule oshihauto she shoka shi li momake gopolisi.

“Oshihauto shaGideon okwa li sha longithwa okufala iikwamiti mbyoka ya yakwa pokapangelo kepangelo kedhina Odimbwa Health Centre nokwa li tayi falwa poongamba dhaNamibia naAngola. Ashike oshihauto shoka osha kwatwa po kopolisi naanambelewa yatatu yuuhaku oya tulwa miipandeko mekwatathano neyako lyiikwamiti mbyoka,” osho omukanda gwoACC gwa popi ngaaka.


Mao Shuihua

Otaku hokololwa kutya oshiningwanima shoka osha ningwa momasiku 19 Febuluali 2020 poongamba dhAikokola, moshitopolwa shaMusati.

Ashike momasiku 10 Juli, omusamane Gideon okwa yapukile omukonakoni gwoshipotha shoka nokwe mu pe oombumbo dhoshimaliwa shooN$20 000 opo oshihauto she shoka kwa li sha longithwa moshimbuluma, shi mangululwe.

Melongelokumwe naanambelewa yoACC, shoka oshe eta a tulwe miipandeko nolwanima okwa holoka mompangu nokwa monika ondjo. Gideon okwa pewa egeelo lyoomvula 18 konima yekumba, noshimaliwa shoka kwa li a gandja ongoombumbo osha gandjwa po kepangelo.

Oshihauto she oshi li momake gopolisi onguumbangi woshipotha sheyako lyiikwamiti.


Wilhelm Gideon

Moshiningwanima oshitiyali, aakwiilongo yaali oya tulwa miipandeko oshiwike sha zi ko sho taku hokololwa kutya okwa li ya ningi onkambadhala yokugandja oombumbo dhoshimaliwa shooN$50 000 komunambelewa gwehangano lyiifendela yepangelo netonatelo lyopoongamba lyedhina Namibia Revenue Agency (Namra).

Aafekelwa mboka oyo omuChina, Mao Shuihua osho wo omvalele ya Angola, Zita Ngondo noya holoka mompangu yamangestrata gwaVenduka, mEtitatu.

Omupopiliko gwaNamra, Steven Ndorokaze, okwa popi kutya Shuihua okwa tulwa miipandeko mOmaandaha omanga Ngondo okwa tulwa miipandeko mEtiyali.

“Oombumbo ndhoka okwa li tadhi gandjwa nelalakano opo oshimaliwa shoomiliyona N$6 shehangano lyomuChina lyedhina XCMG Namibia Pty (Ltd) shoka sha mangwa po [kuNamra paveta], shi mangululwe,” osho Ndorokaze a popi ngaaka.

Okomisi oya popi kutya Ngondo ota fekelwa okukala oye kwa li ta kundathana nomunambelewa gwaNamra opo a kwathele Shuihua a pewe oshimaliwa she shoka sha mangwa po kuNamra.

Otaku hokololwa kutya oshimaliwa shoka shehangano lyo-XCMG Namibia Pty (Ltd) osha mangwa po kuNamra omolwomakonakono ngoka taga ningwa shi na nomatamaneko guukengeleledhi wiifendela.

Aafekelwa mboka yaali oya tulwa miipandeko okupitila moshikonga shomonanguwi shoka sha ningwa melongelokumwe lyaNamra noACC.

Moshiningwanima sha yooloka, opolisi yoshitopolwa shErongo omwedhi nguka oya tula miipandeko aalumentu yaali mOmbaye taya tamanekelwa uukengeleledhi, ekengelelo lyokuyanda iifuta yokongulu osho wo uukengeleledhi wopashimaliwa, noye shi pokati ko2021 no2023.

Komanda gwiipambele yoshigwana mopolisi yErongo, Ileni Shapumba okwa koleke onkundana ndjoka nokwa popi kutya aafekelwa oyo Fred Matengu (49) osho wo Amon Haukongo (37) notaku hokololwa kutya oya kala taya eta moshilongo iinima shaa li paveta, noya kala taya gandja uuyelele wiifundja kombinga yiifendela yokongulu kaanambelewa yaNamra.

Aafekelwa mboka otaku hokololwa kutya oya holoka nale mompangu yamangestrata gwaMbaye noye li mondjeedhililo. Oshipotha shawo oshu undulilwa komasiku 29 Auguste nomakonakono otaga pula komeho.
Aafekelwa mboka oya taalela oshipotha shoshimaliwa shi li poomiliyona N$14,2.