Namibia
This article was added by the user . TheWorldNews is not responsible for the content of the platform.

Aantu 50 000 ye li mompumbwe yomikanda dhuukwashigwana moKavango

Aakwashigwana yomoshitopolwa shaKavango Uuzilo noshaKavango Uuninginino oyi indile epangelo li endeleleke omulandu gwoku ya shangitha ya mone omikanda dhuukwashigwana, noya popi nokuli kutya oye wete ombelewa yelelo lyoshitopolwa tayi enditha iinima kashona owina.

Iitopolwa mbyoka iyali yaKavango oya ndhindhilikwa nomwaalu gu li pombanda noonkondo gwaakwashigwana kaaye na omikanda dhuukwashigwana.

Oshitopolwa shaKavango Uuzilo osha ndhindhilikwa naantu ye li 30 036 kaaye na omikanda dhuukwashigwana omanga oshitopolwa shaKavango Uuninginino oshi na aakalimo ye li 21 630 kaaye na omikanda dhuukwashigwana.

Uuyelele womiyalu ndhoka owa gandjwa kUuministili wIikwameni, Omatembu, Egameno nEpopilo lyoshigwana.

Oshitopolwa shaKavango Uuzilo osho shi li pombanda nomwaalu gwaantu mboka kaaye na oodokumente dhuukwashigwana moNamibia, tashi landulwa koshitopolwa shaMusati naakalimo ye li 25 421, nopuutitatu otapu adhika oshitopolwa shaKavango Uuninginino.

Oshitopolwa sha//Kharas osho kwa ndhindhilikwa shi na omwaalu omushona gwaantu kaaye na omikanda dhuukwashigwana, ye li po281.

Kumwe, moshilongo omwa ndhindhilikwa aantu ye li 141 048 kaaye na omikanda dhuukwashigwana.

Ongundu yaakwashigwana mboka kaaye na omikanda dhuukwashigwana miitopolwa yopaali yaKavango, oya ningi ehololomadhiladhilo mEtitano okuholola okwaauvanawa konkalo moka ye li sho kaaye na omikanda dhopashigwana.

Ongundu ndjoka oya gandja omukandanyenyeto gwawo opo gu pewe minista gwiikwameni Albert Kawana, ye a yapukile omukundu ngoka ya taalela.

Omukandanyenyeto ngoka ogwa taambiwa ko, komunashipundi gwokomitiye yewiliko lyoshitopolwa shaKavango Uuzilo, Damian Maghambayi.

Maghambayi okwa lombwele engungo lyaahololimadhiladhilo kutya epangelo olya ndhindhilika nale uupyakadhi waakalimo oyendji kaaye na omikanda dhuukwashigwana miitopolwa mbyoka yopaali, nowi ipyakidhila nomalongekidho gokushilipaleka kutya oya pewa omikanda ndhoka dha simana komuntu kehe.

Omupopiliko gwongundu ndjoka, Patrick Kashera okwa popi kutya aakalimo yomiitopolwa mbyoka yopaali yaKavango ohaya ende iinano iile, oku ka konga omikanda dhuukwashigwana, ashike olundji ohaya shunithwa ko kaanambelewa mboka “kaaye na omikalo” yo ishewe “ohaya kala ya ngunya” mombelewa yiikwameni moRundu.

“Ohashi kala oshidhigu opo uuministili wu tu pe omikanda dhuukwashigwana pethimbo tu li momwenyo, ashike uuna omuntu wa hulitha ihaya kwataakwata okugandja oonzapo dhomaso kwaamboka kaaya li ye na omikanda dhuukwashigwana,” osho a popi ngaaka.

Ongundu ndjoka oya popi kutya oya nongele okwaana uuyuuki mekuto lyaamboka haya longele mombelewa yiikwameni moRundu, noya popi kutya aaniilonga oyendji ngaashi mboka ye li moshimpungu shomaishangitho osho wo shomatembu, kaye shi nande aakalimo nenge oomvalele dhomoKavango.

Kashera, peha lyongundu yawo, okwi indile uuthikepamwe momitungilo dhelelo, opo mu kale mwa tulwa aaniilonga ya za miitopolwa yaKavango, ndele haku kala owala dhi na oohandimwe mboka ya za kiitopolwa yilwe.

Okwa popi kutya okukala kwa taliwa tango nokusimanekwa oonakusa peha lyaantu mboka ye li momwenyo oshinima shoka sha pumbwa okuhulithwa po.

“Uuministili nawu kute aaniilonga oyendji moombelewa adhihe dhomiitopolwa yetu opo ku shunithwe pevi onkalo yokuya momalweendo oku ka konga omayakulo, sho shi hupithe wo okashona komoondjato dhetu,” osho a popi ngaaka.

Kawana, muMaalitsa pethimbo lyoshipopiwa she kombinga yomutengenekwathaneko gwopashimaliwa okwa popi kutya Namibia okwa waimina iilongo yongongahangano yuukumwe yoUnited Nations moshikonga shedhina #IBelong, shoka sha nuninwa okuhulitha po onkalo yokwaana uukwashigwana miilyolongo yoUnited Nations, mo2024.

Okwa popi kutya uuministili we owa tameka nale nokutotha mo nokushangitha aantu mboka kaaye na oodokumente dhuukwashigwana moshilongo.

“Sigo oompaka, aantu ye li 141 048 oya tothwa mo mboka kaaye na uukwashigwana. Omwaalu ngoka ngashingeyi otagu kolekwa nomulandu gwomwaalu gwaakwashigwana. Natango onkene twa tegelela eyamukulo okuza koshitopolwa shaHardap osho wo okuza kiikandjohogololo yimwe. Oveta ompe otayi ka tulwa mniilonga ndjoka tayi ka wilika aantu mboka kaaye na uukwashigwana moNamibia,” osho minista a popi ngaaka.