Namibia
This article was added by the user . TheWorldNews is not responsible for the content of the platform.

Aayendi yokoompadhi ye ehamekelwa miiponga yiihauto moSwakopo

Iponga yiihauto ya yooloka mbyoka ya ningwa mehuliloshiwike lya zi ko komukulofuta oya thigi aayendi yokoompadhi ye ehamekwa noonkondo omanga yamwe nokuli oya taambelwa moombete.

Iiponga mbyoka otaku hokololwa ye etithwa kuuhasha osho wo okuhinga omanga omuntu e li kohi yondhungo.

Moshiningwanima shotango, shoka sha ningilwa komeho gositola yedhina Fruit and Veg mepandaanda lyaMandume Ndemufayo, otaku hokololwa omuhingi gwoshihauto a fadhukapo konima yoshiningwanima. Oshiningwanima shoka osha ningwa koongulasha dhOlyomakaya lwopotundi 03h30, notaku hokololwa kutya Rolenie Fransa (38) oye a ningi oshihakanwa shoshihauto shoka kaashi shiwike.

“Nakuninga oshihakanwa okwi itsuwika komukwashigwana ngoka a li te ende po, sho a dhimbulula omuntu a lala pevi a kanitha oonkondo, nokwa tseyithile opolisi mbala,” osho omupiliko gwopolisi yoshitopolwa shErongo, Ileni Shapumba a popi ngaaka.

Okwa gwedha po kutya Fransa okwa taambelwa moombete dhoshipangelo shaSwakopo nokwe ehamekwa momutse, ashike otaku hokololwa kutya mongashingeyi okuli monkalo tayi nuwa omeya.

Sean Naude ngoka oye gumwe gwomwaamboka ya thiki tango pehala lyoshiningwanima okugandja ekwatho lyotango, okwa popi kutya Fransa oye mu adha a lala mokati kopate, a kanitha oonkondo, nokwa li ta zi ombinzi noonkondo momutse.

Moshiningwanima sha ningwa mEtitano, oshihauto shoMercedes-Benz otaku hokololwa shi idhenge mumwe notuukala yoGolf sha ningilwa pomatsakaneno goopate pokati kepandaanda lyaWaterberg naMandume Ndemufayo sha ningwa lwopotundi 22h40.

“Omuhingi gwoMercedes-Benz otaku hokololwa a ndopa okuthikama pomatsakaneno goopate, naashoka oshe eta oGolf yi pwedhe nokugwa ko kopate noyi idhenge maayendi yokoompadhi yaali mboka ya li olwaamba nopate,” osho Shapumba a hokolola ngaaka.

Aayendi yokoompadhi, Boy Wilhelem (20) naKaycee Somses (22) oya falwa meendelelo koshipangelo nokwa li ye ehamekwa noonkondo.

Wilhelem otaku hokololwa e li monkalo ya nayipala moshipangelo shaWelwitschia Private School moWalvis Bay, omanga Somses okwe ehamekwa noonkondo ashike okuli monkalo tayi nuwa omeya nota mono uuhaku moshipangelo shepangelo shaSwakopo.

Omufaalelwa ngoka a li moGolf, Bjorn Orr(24), otaku hokololwa e ehamekelwa mo, ashike okuli nawa nota mono uuhaku moshipangelo shepangelo shaSwakopo.

Pauyelele wa zi kuShapumba, aahingi ayehe yiihauto mbyoka otaku hokololwa ya li kohi yondhungo noya tulwa miipandeko shoka she eta ya holoke mompangu yamangestrata gwaSwakopo, mOmaandaha.

Omuhingi gwoMercedes-Benz, Markus Napandulwe, okwa patululilwa oshipotha shokuhinga nuuhasha osho wo okuhinga e li kohi yondhungo, nokwa shunwa mondholongo.

Omuhingi, gwoGolf, Shaun Mphahleni, okwa patululilwa oshipotha shokuhinga nuuhasha nokwa pewa oboloha yooN$4 000 – nonande Mphahleni okwa li a nwa, otaku hokololwa kutya kali a pitilila ondjele yomavolu ngoka gu uthwa komuntu a hinge.

Omakonakono gopolisi otaga pula komeho.