Namibia
This article was added by the user . TheWorldNews is not responsible for the content of the platform.

‘Elanditho lyoongandu 40 kali shi sha’

Etokolo lya ningwa kUuministili wOmidhingoloko, Omakuti nOmatalelopo okutula mofanditha oongandu 40 miitopolwa shaKavango Uuzilo, Kavango Uuninginino, osho wo Zambezi opo ku kondjithwe omaipumomumwe pokati kiinamwenyo naakwashigwana, olya talika ko osima yowala.

Ndhoka odha popiwa kukansela gwoshikandjohogololo shaRundu kUushayi, Paulus Mbangu.

Okwa popi kutya omwaalu gwoongandu momilonga dhomiitopolwa ya tumbulwa pombanda otagu tengenekelwa po11 000 ngele omwa kuthwa owala oongandu oonshona itashi kandulapo sha.

“Onkene shoka kashi shi sha, molwashoka itashi kwatha sha. Omaponokelo gaantu koongandu otaga tsikile pwaana elunduluko lya sha. Ondiwete tashi kala nawa uuna epangelo lya landitha po oongandu 6 000,” osho kansela a popi ngaaka.

Omasiku ga zi ko omupopiliko guuministili womidhingoloko Romeo Muyunda okwa popi kutya epangelo olya gandja epitikilo opo ku landithwe po oongandu 40 nelalakano lyokushunitha pevi iiningwanima yi indjipala yaakwashigwana taya ponokelwa nokudhipagwa koongandu, unene tuu kiitopolwa ya tumbulwa pombanda.

“Shoka otashi ningwa kwi ikwatelelwa kepopilo ndyoka lya ningwa momutumba gwa ningwa omasiku ga zi ko kombinga yekondololo lyomaipumomumwe pokati kiinamwenyo naakwashigwana, moka uuministili wa pewa omayele opo wu shunithe pevi omwaalu gwoongandu miitopolwa ya gumwa,” osho Muyunda a popi ngaaka.

Okwa popi kutya kutya oya tokola opo ya yule mo oongandu dhi li 40 nelalakano lyokushunitha pevi omwaalu gwoongandu momilonga tadhi adhika miitopolwa ya tumbulwa pombanda noye na etegameno kutya otashi ka kwathela mokushunitha pevi omaponokelo gaakwashigwana niimuna koongandu.

“Iitopolwa yokuumbangalantu-zilo ngaashi shaKavango Uuninginino, shaKavango Uuzilo osho wo shaZambezi oya ndhindhilikwa nonkalo tayi tulitha omutse kepepe yoongandu tadhi ponokele aakalimo osho wo iimuna yawo,” osho Muyunda a popi ngaaka.
Ashike nando ongaaka, Mbangu okwa popi kutya uuministili owa pumbwa okulanditha po etata lyoongandu ndhoka dhi li momilonga molwashoka oongandu ndhoka otadhi mana wo noohi.

Paulus Mbangu

Okwa popi kutya uuministili, melongelokumwe nelelo lyoshitopolwa naya gandje omahala gokumuna oongandu, moka aantu taya kala noofalama dhoongandu nelalakano lyokwi imonena iiyemo nokwe eta po wo oompito dhiilonga komikunkulo dhomilonga.

Kansela gwoshikandjohogololo shaMukwe, ngoka wo oye omunashipundi gwelelo lyoshitopolwa shaKavango Uuzilo, Damian Maghambayi, okwa popi kutya okwa pandula etokolo lya ningwa kuuministili.

Okwa popi kutya onkundana ndjoka ombwanawa okumona kutya epangelo olya kutha ko oongaku monkambadhala yokushonopeka omaipumomumwe pokati kaantu noongandu.

“Otaya tameke nelanditho lyoongandu 40, notwi inekela monakuyiwa otaya ka indjipaleka omwaalu gwoongandu tadhi ka landithwa po,” osho a popi ngaaka.

Okwa popi kutya ngoka ogo owala omukalo tagu vulu okulongithwa opo ku shunithwe pevi uupyakadhi woongandu tadhi ponokele aantu niimuna.

Muyunda okwa popi kutya oongandu ndhoka otadhi ka landithwa po kwaamboka ye na ohokwe tashi ningwa okupitila motendela ndjoka tayi ka pitithwa opo mboka ye na ohokwe ya gandje omaindilo gawo gondando ndjoka ya hala okulanda po oongandu ndhoka.

“Ondando wa hala okulanda [oongandu] otoyi tula mokapakete kotendela ndjoka taka adhika poombonge oonene dhuuministili noshi na okuningwa omanga omasiku 17 Juli po16h30 inaaga pita. Uuyelele womuule kombinga yotendela ndjoka otawu ka pitithwa miifonkundaneki,” osho Muyunda a popi ngaaka.

Okwa popi kutya mboka taya ka landa po oongandu ndhoka nelalakano lyoku dhi landitha po pondje yoshilongo naya kale ye na omukanda gwopaveta okuza kelelo lyetonatelwahala okuza koshilongo hoka taya landitha oongandu ndhoka.

“Eyulo lyoongandu otali ka ningwa kohi yetonatelo lyuuministili, notali ka ningwa noshimaliwa shaangoka tedhi landa po. Okugwedha kwaashoka, iinyangadhalwa ayihe, mwa kwatelwa nokukonakona omikithi osho wo etonatelo tali pumbiwa konima dha kwatwa otashi ka ningwa okuza mondjato yaangoka tedhi landa po.

Aalandi naya ulike uumbangi kutya oye na omahala taga opalele shili okukaleka po oongandu ndhoka,” osho Muyunda a popi ngaaka.

Aakalimo yomiitopolwa ya tumbulwa pombanda olundji ohaya mono iihuna kiiyamakuti ngaashi oondjamba, oondjambameya noongandu ndhoka hadhi ya kutha omwenyo, oku ya monitha iiponga nenge dhi yonagule omaliko gawo.

Omukuluntuwiliki gwaNaWater Abraham Nehemia omasiku ga zi ko okwa popi kutya oshikondo shawo otashi ka dhika po eshina lyokudhinda omeya ndyoka tali ka kala tali gandja omeya kaakwashigwana yomikunda ndhoka dhi li olwaamba nomulonga opo ku shunithwe pevi onkalo yoongandu tadhi ponokele aakwashigwana.

“Nonande oshinima shoka ito vulu oku shi hulita po thilu, molwashoka omagumbo oge li owala omukaakena gwookilometa 50 okuza pomulonga omanga oopomba dhomeya odhi li omukaakena gwookilometa 500 okuza pomulonga.

Onkene aakwashigwana ohaya hogolola okulongitha omeya ngoka ge li popepi nayo nenge ye ga fulukithe opo ya vule oku ga longitha. Ashike etokolo lyetu otali ka kwathela ngaa okuhwepopeka onkalo,” osho a popi ngaaka. Nehemia okwa popi kutya eshina ndyoka lyokudhinda omeya nokwaandjaganeka kaakwashigwana otali ka kala lya kwatela mo ominino dha za koGrootfontein okuya komweelo gwaMururani, osho wo omunino gumwe gwa thinda koKatwitwi moshitopolwa shaKavango Uuniningino, nomunino omutitatu otagu ke enda olwaamba nopate yaDivundu moshitopolwa shaKavango Uuzilo.

Kansela gwoshikandjohogololo shaMashare, Phillip Mavara, omvula ya zi ko okwa li i indile Uuministili wOmidhingoloko, Omakuti nOmatalelopo – mboka wu na oshinakugwanithwa shetonatelo lyiiyamakuti – wu ninge etokolo lyokugandja omikandapitikilo dhuukongo woongandu. Kansela okwa zi mokalungu pethimbo kamatyona gwomimvo 13 gwomomukunda Mupapama moshitopolwa shaKavango Uuzilo, a mana oondjenda sho a ponokelwa nokuyakulwa po kongandu.

Aakwashigwana mboka ye li popepi nomulonga olundji ohaya ningi iihakanwa yoondjambameya noongandu molwashoka oyendji yomuyo ohaya hupile momeya gomulonga ngaashi okuyula oohi, okuteka omeya, okwiiyoga osho wo okuyoga iikutu yawo.
Muyunda okwa popi kutya sigo oompaka uuministili owa kutha moshigandhi oshimaliwa sha konda poomiliyona N$2,3 okufutila po omakanitho ngoka ge etwa po koongandu, okuza owala mo2019.