Namibia
This article was added by the user . TheWorldNews is not responsible for the content of the platform.

Epeko lyoshipotha shaShikongo inali thika natango momake gomutamanekindjayi

Ngashingeyi opwa pita oomwedhi tadhi ihiile puhetatu konima yoshiponga shoshihauto shoka tashi tamanekelwa ondjayi yetanga lyopolisi moshilongo, Joseph Shikongo sho mwa kanene oomwenyo dhaantu yatatu, ashike nando ongaaka epeko lyoshipotha she onkene inaali thika momake gomutamanekindjayi Martha Imalwa.

Omutamanekindjayi Imalwa ngoka e na oshinakugwanithwa shokuninga omatokolo giipotha shi ikwatelela komakonakono ngoka ta pewa, okwa lombwele onzonkundaneki ndjika kutya epeko lyaShikongo inali thika mo mombelewa ye natango mOvenduka.

Ashike nando ongaaka, omupevindjayi gwetanga lyopolisi Elias Mutota okwa lombwele onzonkundaneki ndjika oshiwike shika kutya epeko ndyoka okwa li ye li tumu kombelewa yomupevitamanekindjayi mOndangwa momasiku 30 Juni.

“Epeko olya tuminwa kOndangwa molwashoka oshiningwanima shoka osha ningilwa momudhingoloko gwompangu yamangestrata gwaNdangwa,” osho Mutota a popi ngaaka.

Moonkundathana nonzonkundaneki ndjika mEtiyali, Imalwa okwa popi tati: “Ya pula. Oye li pe lye? Naya kale aluhe haya popi oshili. Ngele olya gandjwa, ngiika oye li gandja kombelewa yomupevi gwandje kOmpangu yoPombanda mOshakati, ashike ngame mwene inandi li mona,” osho a popi ngaaka.

Omupevitamanekindjayi Lucious Matota ngoka ha longele mOmpangu yoPombanda yaShakati okwa lombwele onzonkundaneki ndjika uunambo kutya epeko ndyoka ye ineli mona, molwashoka okuli mefudho pethimbo ndika.

Shikongo ota ningilwa omakonakono ge na sha noshipotha shedhipago lyaashi lyoshiningilawina, nokuhinga nuuhasha sha landula sho oshihauto shoka a li ta hingi sha mono oshiponga sho shi idhenge omutse nomutse notuukala, sha ningilwa mopate, pwIindangungu, moshikandjohogololo shaKaku [moshitopolwa shaShana], momasiku 30 Desemba 2022.

Martha Imalwa

Aantu yatatu mboka ya li motuukala ndjoka ya pumwa kuShikongo oya hulithile poshiponga nomadhina gawo oyo Sofia Natangwe Ananias (22), Frans Pombili Ndengu (27) naStefanus Hafeni Lukas.

Pauyelele wolopota yopolisi konima yoshiningwanima shoka, Shikongo ngoka a li ta hingi oshihauto she shopaumwene shoToyota Hilux shoondunda mbali, okwi idhenge omutse nomutse notuukala yoHyundai ndjoka ya li oonakusa mboka yatatu.

Mutota okwa popi kutya mbala konima yoshiningwanima shoka, oku ulike okangundu kaakonakoni mekwatelo komeho lya komufalakonakoni Nikolaas Kupembona, ngoka oye komanda gwopolisi yoshitopolwa shErongo.

MuMei numvo, omupevindjayi Mutota okwa lombwele onzonkundaneki ndjika kutya epeko lyaShikongo otali kala lya gandjwa momake gombelewa yomutamanekindjayi muJuni.

Ester Ndengu, ngoka oye mumwayina gwa nakusa Frans, okwa popi kutya oku uvithwa nayi ku nkene i ihumbatelwa kopolisi sho kwa li a talelepo oshitaasi shopolisi yaSwakopo oshiwike sha zi ko ta pula mpoka pwa thikama omakonakono goshiningwanima shoka sha faalele omwenyo gwa mumwayina.

Okwa hokolola kutya Mutota okwa li e ya lombwele ya talelepo oshitaasi shopolisi kehe shi li popepi opo ya pule uuyelele kombinga yaampoka pwa thikama omakonakono nonkene okwa li a tokola a ye koshitaasi shopolisi yaSwakopo ta pula komanda gwoshitaasi shoka.

Ester okwa hokolola kutya opamwe namumwayinagona oya yi koshitaasi shopolisi yaSwakopo, ashike peha lyokupewa uuyelele kombinga yomakonakono goshipotha sha mumwayina, aapolisi poshitaasi oya tameke okuthaneka okatse ke, oku mu pula mpoka ha longo, mpoka ha zi osho wo kutya momudhingoloko gwaSwakopo okwa thaneka okuza mo uunake.

“Kandi shi kutya uuyelele mboka oya hala ye ke wu longithe shike. Onda tila, ngele onda ningilwa sha, opolisi oyo yi na oku shi hokolola,” osho a popi ngaaka.

Onzonkundaneki okuza poshitaasi shoka oya popi kutya oya tokola okuthaneka okatse ke koshilongo opo ya koleke ngele oye tuu Ndengu ngoka ta pula uuyelele wa mumwayina.

Onzonkundaneki ndjoka oye ekelehi omapopyo ngoka kutya Ester okwa li a pulwa kutya uunake ta zi mo mondolopa.