Namibia
This article was added by the user . TheWorldNews is not responsible for the content of the platform.

‘Etokolo kalya li pauyuuki’

Omwiilongi-pangi Maria Edward (18) okwa hokolola kutya okuwete etokolo lyokutidhwa mosikola e li ningilwa shaa li pauyuuki, sha landula sho a lalekwa mo moshiputudhilo shedhina Alba Chipamba Training Centre, omolwokavidio hoka taka ingaana kiikundaneki yomakwatathano gopankalathano komalungula – tayi ithanwa TikTok.

Edward okwa popi kutya okwa tidhwa mosikola mOmaandaha koshiputudhilo shuupangi shoka shi na oshitayi mOshikango omolwokavidio hoka ke li komalungula take mu ulike ta ndanisa nokwiimba e li momuzalo gwosikola, netompelo enene ndyoka a lombwelwa oondyoka kutya anuwa mokavidio ota monika ‘a fa e li kohi yondhungo’.

Pauyelele wu li mombapila ndjoka yelaleko moshiputudhilo, noya shainwa komukuluntu gwoshitayi sho-Alba Chipamba Training Centre mOshikango, Aina Kuutondokwa, okwa popi kutya Edward okwa katukilwa onkatu molwashoka okwa li a tindi okwiiyutha komalombwelo ge li mondjila ngoka a pewa kaanambelewa yoshiputudhilo.

“Itandi ya pe ombedhi okudhiladhila kutya oye wete tandi monika [mokavidio] nda fa nda nwa omalovu molwashoka otandi monika nda ndjanga [mokavidio], ashike nando ongaaka kandiwete ya ningile ndje etokolo lyi li pauyuuki,” osho a popi ngaaka.
Okwa gwedha po kutya okwa li a tega opo oshiputudhilo shi mu ithane yo ya kuutumbe oku uva kuye kutya oshe ende ngiini opo okavidio hoka kaye kiikundaneki yopankalathano.

“Okwa li ye na okupulakena kehokololo lyandje opo yu uve okuza kombinga yandje,” osho a popi ngaaka.

Edward okwa popi kutya mOmaandaha Kuutondokwa okwe mu pula kombinga yokavidio hoka. “Nokwa lombwele ndje kutya inandi pumbwa okwiipopila nenge okuyelitha opo ndi yeleke nkene she ende. Onde mu lombwele kutya okavidio hoka okwa li nde ka ningi muFebuluali nokwa li nde ka tula koWhatsApp yongodhi yandje, ishewe inandi ka ninga nelalakano ka monike koshigwana ashihe. Okwa li owala ke na okumonika kaapopepi nenge aantu aashona mboka ye li mongodhi yandje,” osho a popi ngaaka.

Okwa gwedha po kutya okavidio hoka okwe ka ningi pethimbo a li moshihauto sha yinakulu nesiku ndyoka oya adhika ye li mela lyondjila okuza kosikola, nokwa gwedha po kutya okahalasa hoka ta monika a kwata sho ti imbi, omu na onamunate yoCoca-Cola nokwa li owala ta pulakene koongalo moshihauto.

“[Kuutondokwa] Kali nande a hala okupulakena kehokololo lyandje nokwa lombwele ndje kutya onde shi ningi nelalakano opo ndi tseyike sho ndeka tula koTikTok. Onde mu lombwele kutya ngame kandi na epandja koTikTok,” osho a gwedha po ngaaka.

Kuutondokwa otaku hokololwa a popi wo kutya ngele oku ulukile omuntu okavidio hoka, nena omuntu ngoka ota vulu okudhiladhila kutya Edward okwe ka ninga omanga e li kohi yondhungo nenge a longitha iingangamithi.

Edward okwa popi kutya kutya okavio hoka haye mwene e ka tula koTikTok ashike oka tulwa ko kukuume ke.

Ombapila ndjoka yetidho mosikola lyaEdward, oya popi tayi ti: “Omulongwa a tumbulwa pombanda okwa yi kiikundaneki yopankalathano yedhina TikTok ti imbi ongalo e li momuzalo gwosikola, nokuli mo ta monika a fa e li kohi yondhungo.” Ombapila ndjoka oya gwedha po kutya okomitiye yomaihumbato yoshiputudhilo sha-Alba Chipamba Training Centre okwa li ya ningi onkambadhala yokupukulula omunasikola ngoka opo a hwepopale ye i itule mo miilonga ye yosikola ashike inashi kwatha sha.

Sho a kwatathanwa naye, Kuutondokwa, ngoka oye omukuluntu gwoshitayi mOshikango, okwa lombwele onzonkundaneki ndjika
kutya ye okwa landula omilandu adhihe sho a tidha Edward moshiputudhilo, nonkene ita ti ko sha sha gwedhwa po.

“Kandi wete tandi vulu okuyamukula epulo lyoye. Tse otwa landula owala oompango nomilandu. Ngiika dhengela kombelewa onene osho wo kewilikongundu,” osho Kautondokwa a yamukula. Omupopiliko gwehanganokalelipo lyaailongi lyedhina Namibian National Students Organisation (Nanso), Dorthea Nangolo, okwa popi kutya etidho mosikola lyaEdward olya puka.

“Etidho lye kali li nande paveta. Shotango, ina pewa ompito opo a yelithe ishewe katu shi ngele oya longitha ngaa nawa omilandu dhomaihumbato,” osho Nangolo a popi ngaaka.

Nangolo okwa gwedha po kutya okavidio hoka okakwatelwa pehala lyopaumwene, ina ka ningilwa pondingosho nenge pehala lyomanwino.

“Oshitiyali, haye a tula okavidio hoka komalungula. Kuume ke oye e ka tula kiikundaneki yopankalathano komalungula,” osho a popi ngaaka.

Okwa gwedha po kutya iinima ayihe mbyoka otayi ulike kutya ke na nande ompango a pogola nonkene Nanso okuwete kutya Edward kali nande e na okutidhwa moshiputudhilo. Okwa popi kutya Nanso oku na okukwathela Edward opo a mone omukalelipo gwopaveta ku shilipalekwe kutya etidho lye mosikola olya kondjithwa.