Namibia
This article was added by the user . TheWorldNews is not responsible for the content of the platform.

Ina tsuwilwa pondingosho yandje – Maspiri

mwene gwondunda yomanwino yedhina Maspiri Bar mOvenduka, Lukas Kambo, okwe ekelehi omapopyo golopota yopolisi ndjoka ya tumbula kutya poMasipiri opwa dhipagelwa omuntu mehululoshiwike sho a tsuwa nombele.
Okupitila molopota yopolisi yiiningwanima ya ningwa momukokomoko gwoshiwike lya zi ko, opolisi oya tseyitha kutya mEtitano omulumentu gwomimvo dhopokati okwa tsuwa nombele nolwanima okwa hulitha sha landula oontamanana ndhoka dha tukuka pokati koongundu mbali dhaalumentu poMaspiri.

Ashike Kambo, mOmaandaha okwa zi mokalungu nokulombwela onzonkundaneki ndjika kutya esiku oshiningwanima shoka sha ningwa opo a tokelwa pondingosho ye ashike kapwa li nande olugodhi lwa sha, ngaashi sha tumbulwa molopota yopolisi.
Okwa popi kutya esiku lya landula opo a lombwelwa onkundana kutya popepi nondingosho ye opwa tsuwilwa omuntu, naashoka osha ningwa mepandaanda lyi li konima ano omukaakena gwoometa 150 okuza pondingosho ye.

“Kapu na ngoka a tsuwilwa pondingosho yandje, ashike nena [mOmaandaha] miikundaneki otandi lesha oshiningwanima taku popiwa anuwa sha ningilwa pondingosho yandje,” osho a popi ngaaka.
“Oshe ende ngiini opo omuntu ngoka a tsuwilwa mepandaanda lyi li konima, ashike ngashingeyi opolisi otayi popi kutya osha ningilwa pehala lyondingosho yandje?”

Kambo okwa popi kutya oshinima shoka oshe mu uvitha nayi noonkondo noku na uumbanda wokukanitha ookastoma pondingosho ye.

“Ngaaka enyateko lyedhina lyandje. Aantu mboka haye ya okuyambidhidhe ongeshefa yandje pondingosho yandje itaye ya po we omolwehokololo ndyoka lya puka,” osho a popi ngaaka.

Omupevikomanda gwopolisi yoshitopolwa shaKhomas, komufala Chrispin Mubebo, uunambo okwa yeleke kutya omulumentu ngoka otaku hokololwa a dhipagelwa pokoona yepandaanda lya Eveline Street.
“Ashike nando ongaaka, aantu mboka okwa li taya nu omalovu poMaspiri Bar nomuntu ngoka otaku hokololwa a tsuwilwa pokoona yomapandaanda lyaEveline nolyaJustine,” osho a popi ngaaka.

Olopota yopolisi natango oya popi kutya nakusa okwa tsuwa nombele omanga a li nookuume ke taya nu omalovu poMaspri Bar sha landula oontamana ndhoka kwa li dha tukuka pokati koongundu mbali dhaalumentu omolwekende lyoolita mbali dhomalovu goCastelo [okankogo] ndyoka taku hokololwa lya kanene motaxi yomufekelwa medhipago.

“Otaku hokololwa kutya omufekelwa okwa adhika nombele yokapi osho wo osikulufu, omanga nakusa okwa adhika motuukala yomufekelwa, otaxi yoPolo ontiligane, ndjoka kwa li tayi hingwa kukuume gwa nakusa, pethimbo a li ta kambadhala e mu fale mbala koshipangelo a ka mone uuhaku,” osho olopota yopolisi ya yelitha ngaaka.

Oshiwike sha zi ko, opolisi oya thiminikwa yi gandje ombili kumwene gwehala lyongeshefa yokuyoga iihauto[Bix CarWash] , Benjamin Kambala, sha landula oshiningwanima sheso lyomulumentu gwedhina Brave Kavari (49) ngoka kwa li kwa lopotwa kutya okwa dhipagelwa poBix CarWash.

Molopota ndjoka kwa li ya pitithwa komupevikomufala Kauna Shikwambi, okwa li a tseyitha kutya Kavari, okwa tsuwa nokuhulitha poBix CarWash moKatutura, sha ningwa komatango gOlyomakaya yomasiku 24 Juni, lwopotundi 17h00.
Ashike onkundana ndjoka oya geyitha Kambala noonkondo nokwi indile opo opolisi yi yeleke ehokololo lyawo kutya openi lela pwa ningilwa oshiningwanima shoka, molwashoka pehala lye inapu dhipagelwa omuntu.
“Kapu na omiyonena nenge omadhipago ga ndhindhilikwa pehala lyongeshefa yandje muule woomvula 10 dha piti,” osho a popi ngaaka.

Kambala okwa li nokuli i indile opolisi yi gandje ombili meendelelo yo yi yeleke edhina lyongeshefa ye nongele hasho oteyi katukile onkatu yopaveta, molwashoka ehokololo ndyoka otali vulu oku mu kanithitha ookastoma nuupu.
Shoka oshe eta opolisi yi gandje ombili nokuyelitha kutya oshiningwanima shoka inashi ningilwa poBix CarWash ngaashi kwa li sha lopotwa, ashike osha ningilwa mepandaanda lyedhina Saima A Street, moKatutura ano pehalandjandja tali adhika pokati koBix Carwash nomatala goSingle Quarters.

Shikwambi okwa popi kutya omakonakono gopetameko ogu ulike kutya nakusa Kavari opamwe nomufekelwa, ohaya iyamba okutakamitha iihauto mbyoka tayi ya pehala mpoka nolundji ohaya pewa okathilinga kaaniihauto, nesiku ndyoka okwa li ya Tasmanian nakuume ke shoka sha hulile molugodhi.

Ehala lyoBix CarWash otali adhika olwaamba nomatala goSingle Quarter moKatutura, noli na wo ondunda yomanwino.