Namibia
This article was added by the user . TheWorldNews is not responsible for the content of the platform.

Ngoka a li komufala mopolisi a hala Esau a mangululwa mo mongali

Ngoka a li komufala mopolisi Elise Haulyondjaba okwi indile okomisi tayi kondjitha uulingilingi moshilongo yoAnti-Corruption Commission (ACC) yi mangulule mo mondholongo ngoka a li minista gwoohi Benhard Esau, molwashoka oku na iikumungu oyindji yomikanda dhokuyula oohi mbyoka inaa potokonona – unene tuu kombinga yomikanda dhokuyula oohi ndhoka kwa li dha pewa aakondjelimanguluko yokakulumbwati, oPlan.

Okwa hala
Haulyodjamba (75) okwa popi kutya okwa hala wo Esau a za mo mondjeedhililo a kwandjangele oshikumungu she [shaHaulyondjaba ] sho kwa li a thigwa pomutenya kehangano lyoohi lyedhina Gendor Fishing.
Haulyondjaba okwa hokolola kutya okwa li e na mo oshipambuliko shoopelesenda 23 moGendor Fishing, notaku hokololwa ehangano ndyoka lya kana po inaa li mu futa iiyemo mbyoka e na okupewa mo.

Haulyondjaba okwa ningi eindilo ndyoka okupitila montumwafo ndjoka a tumine omukuluntu gwomakonakono goFishrot moACC, Andreas Kanyengela, omwedhi gwa zi ko.

“Ongame Elise Nghiyalasha Haulyondjaba. Otandi indile opo aakonakoni osho wo aatamaneki moshipotha shaangoka a li minista gwoohi Ben Esau ye mu pe oboloha, opo a vule okupotokonona iikumungu mbyoka a thiga poshitaafula inaayi pwa,” osho Haulyondjaba a popi ngaaka.

Haulyondjaba okwa popi kutya ehangano ndyoka lyoohi lya tumbulwa pombanda okwe li waimine mo1999 nokwa li a landa mo iipambuliko yooN$7 000 omumvo ngoka, ashike ina kala we ha mono ko iiyemo ya sha muule woomvula 23.
Okwa popi kutya sho a landa iipambuliko, okwa lombwelwa kutya ehangano ndyoka olyongundu yoSwapo. Ashike nando ongaaka, ngoka a li amushanga gwoSwapo miipambele yopamahupilo Alfeus !Naruseb okwa lombwele onzonkundaneki ndjika omumvo gwa zi ko kutya ehangano ndyoka ye ke li shi.

“Ondiwete kutya epeko lyandje onkene lyi li poshitaafula she nonkene okwa li nda ningi onkambadhala yokupula ko, ashike inandi mona ko eyamukulo lya sha. Onkene oye awike, kapu na omupevi nenge omukuluntuwiliki sho osho nee tandi indile omukonakoni e mu pe oboloha opo a potokonone uupyakadhi wandje wopauhandimwe,” osho a shanga ngaaka.
Haulyondjaba okwa popi kutya okwa hala ompangu ya pulakena kekemo lye. “Otandi indile opo a pewe oboloha opo a kandulepo oshikumungu shika.”


Elise Haulyondjaba

Omukuluntuwiliki gwoACC Paulus Noa okwa kolele kutya okwa yakula ombapila ndjoka.
“Ombapila ndjoka yeindilo oya thika momake goACC. Omaindilo gooboloha ohaga pulakenwa moompangu. Kandi shi ngele etompelo lye okwi indila minista omukulu a pewe oboloha oli ngaa omakankameno. Ota vulu okuya kwaangoka oye ngashingeyi minista gwoohi noonzo dhomefuta opo oshikumungu she shi yapukilwe,” osho Noa a popi ngaaka.

Okwa lombwele oThe Namibian oshiwike shika kutya ye opamwe “naatameki yekondjelomanguluko” otaya tongolwa kepangelo, molwashoka olya kala tali ndopa oku ya pa omikanda dhoohi noku ya tululula okuza mo1992.

Haulyondjaba okwa popi kutya mo2017, aatameki yetanga lyoPlan oya li 95, ashike ngashingeyi opu na owala 13. Okwa popi kutya oyendji yomuyo oya hula ko omolwethindano lyomadhiladhilo omanga gumwe okuli moombete dhoshipangelo shaShakati e li mokoma.

“Otatu hulu po omanga twa tulwa momusholondondo, twa tegelela okutulululwa moofalama,” osho a popi ngaaka.
Okwa popi kutya pethimbo lyepangelo lyomupresitente Hifikepunye Pohamba, okwa li yi indile ye mu mone yo ya kundathane ashike ompito ndjoka inaye yi pewa.

“Okwa li tu ulikwa mEenhana mo2007 nokwa li twa tumbalekwa ongomapenda. Okwe tu pe oombandi. Omambandi ngoka kage na oshilonga sha sha. Oombandi ndhoka ihadhi vulu nokuli okulandithwa po opo twiikwathele. Aantu ngashingeyi ohaya kala nokuli taye tu yolo,” osho Haulyondjaba a popi ngaaka.

Ashike nando ongaaka, opu na ombapila yontumba ndjoka kwa li ya shangwa kaakondjelimanguluko yatano, [mwa kwatelwa Haulyondjaba], nokwa li ya tuminwa ngoka a li minista gwomatendululo gevi Utoni Nujoma momasiku 28 Maalitsa 2018, moka ya popi kutya mo1993 okwa li ya tulululwa pofaalama yedhina Owl Wood.

Elalakano lyombapila ndjoka okwa li okugandja omanyenyeto kombinga yiimuna yawo tayi yakwa po nokudhipagwa.
“Otwa shangela Uuministili wEvi nOmatulululo tatu gandja omakemo getu kombinga yonkalo mofaalama. Otwa kanithila mo oongombe odhindji omolwuufuthi. Onkalo yaantu mboka omu yi shi nale molwashoka ihaya vulu okukala kaaye li muukongo. Aapolisi ohaye ya kwata ashike onkene haya mangululwa nokutsikila taya dhipaga po iimuna yetu,” osho ya popi ngaaka.