Namibia
This article was added by the user . TheWorldNews is not responsible for the content of the platform.

Omaindilo 60 000 goonkatu 13 000 dhomayalulo gaakwashigwana nomagumbo

Ehangano lya yama kepangelo lyomayalulo moshilongo lyedhina Namibia Statistics Agency (NSA) olya tseyitha kutya sigo oompaka olya yakula omaindilo ge li 60 000 goopoosa dhopakathimbo dhiilonga yomayalulo gaakwashigwana nomagumbo ndhoka dha tseyithwa omasiku ga zi ko.

Molwashoka esiku lya hugunina omEtitano, omwaalu ngoka ogwa tegelelwa gu londe molwashoka opu na oyendji mboka haya ningi omaindilo komunute gwa hugunina.

Ompumbwe yiilonga moshilongo oya yaga kegonga nongashingeyi omayalulo ogu ulike kutya onkalo yaagundjuka kaaye na iilonga oye li poopelesenda 49.

Pethimbo ndika lyonkalo yokwaana iilonga yi li pombanda moshilongo, omukuluntuwiliki-yaluli gwoNSA, Alex Shimuafeni, okwa popi kutya ekuto lyaamboka taya ka ninga omayalulo gomagumbo naakwashigwana otali ka kambadhala okukutha po aagundjuka mboka taya lili iilonga.

Okwa popi kutya Aanamibia mboka ye na nale iilonga tayi kalele itaya ka tothwa mo, ishewe mboka ye na omimvo dhi li kohi 18 itaya taambiwa.

Shimuafeni okwa popi kutya sigo oompaka omaindilo inaga ningilwa natango omakonakono mu tothwe mboka ya adha iipumbiwa yokukutwa, nonande esiku lya hugunina lyokuninga omaindilo, olya thika [ano mEtitano].

“I ipula owala, kutya mEtine [lya zi ko] omwaalu gwaaningi yomaindilo ogu li nale po60 000, notaga ningwa pamalungula, molwashoka omahogololo otaga ka ningwa taku longithwa omalungula. Okuza oshiwike tashiya, konima shampa omaindilo ga hulu, otatu ka tameka nokuyoolola mo omaindilo, okutotha mo nokuga tala muule. Otashi kala oshidhigu lela okuninga uukonakono womaindilo ngoka, ashike otatu ka ninga omakonakono opo tu shilipaleke kutya omulandu gwa longithwa ogu li pauyuuki,” osho a popi ngaaka.

Oshikondo shoka sho NSA okwa li wo sha tokola opo shi ninge po omalunduluko omashona opo ku shilipalekwe kutya osha mbilipaleka aaniihauto mboka ye na ohokwe yokugandja iihauto yawo yi longithwe pomayalulo.

Esiku lya hugunina lyomaindilo gaakwashigwana mboka ya hala iihauto yawo yi ka longithwe momayalulo, olya li Etitano lya zi ko, ashike olya gwedhelwa nuule woshiwike.

Shimuafeni okwa popi kutya oomvula dhiihauto mbyoka tayi pumbiwa odha lelepekwa okuza poomvula 10 okuya poomvula 15.

“Otatu popi wo kutya iihauto mbyoka otayi vulu okukala oo2x4, inayi kala owala ayihe oo4x4. Otatu ka futa aantu melongitho lyiihauto yawo, iihauto yeni itamu yi gandje kuNSA, ongoye mwene to ka kala to hingi oshihauto shoye moshikandjohogololo sheni.

“Otatu ke mu futa oshimaliwa shooN$2 000 mesiku, shoka wu na okuninga okugandja owala omahooli nomuhingi. Ompito ndjoka oya kehe gumwe, kayi shi owala yaaniilonga yoNSA,” osho a popi ngaaka.

NSA omasiku ga zi ko okwa tseyitha kutya ota ka pumbwa ka pumbwa iihauto yi li po2 800 miitopolwa ya yooloka moshilongo opo ya vule okugwanitha po iinyangadhalwa yawo yokuyalula omagumbo osho wo aakwashigwana mboka ye li moshilongo.

Omayalulo gaakwashigwana nomagumbo moshilongo, oga tegelelwa ga kale ko pokati komasiku 28 Auguste nomasiku 8 Septemba numvo. Ottilie Mwazi, ngoka oye omupevikuluntuyaluli gwoNSA okwa popi tati: “Aanambelewa yomayalulo oya pewa uuthemba wokupula uuyelele megumbo kehe. Aanambelewa mboka yomayalulo otaya vulu okugandja omageelo kwaamboka itaaya iyutha unene tuu mboka taya tindi okuya pa uuyelele nenge taya tindi oku ya pitikila momahala nenge momagumbo gawo. Omageelo taga gandjwa ongaashi egeelo lyofuto yooN$50 000, egeelo lyoomvula ntano mondholongo nenge ya pewe omageelo ngoka gaali oshita.”

Epangelo olya tokola okugandja oshimaliwa shoomiliyona N$706 okuza momumvo gwopashimaliwa gwo2023/24 koNSA opo yi tule miilonga oshinakugwanithwa shomayalulo gomagumbo noshigwana.

EIKWATO POMUTIMA LYOMULANDU GWOMAINDILO

Pokati mpoka, elelo lyopamuthigululwakalo lya/Khomanin, okupitila melenga lyawo ekuluntu Walter Haseb, olya holoka okwaauvanawa kombinga yomulandu gwomaindilo goompito ndhoka 13 000 mehangano lyoNSA.

“Otu na eikwato pomutima enene kombinga yomaindilo gomayalulo taga ningwa pamalungula,”osho Haseb a popi ngaaka.

Okwa popi kutya aagundjuka oyendji momudhingoloko gwawo kaye na omalungula yo ishewe kaye na iikwaniilongitho yokuya komalungula, naashoka osha thiga momilema aagundjuka mboka ye na ohokwe yokuninga omaindilo.

“Palopota dhiikundaneki nuuyelele moradio, uupyakadhi mbuka inawu taalela owala oshigwana shomuhoko gwa/Khomanin, ashike osha guma omahala ogendji gokomikunda ngoka kaage na iikwaniipangitho,” osho a popi ngaaka. Onkene elelo lyopamuthigululwakalo lya/Khomanin olyi indile omaindilo giilonga mbyoka yomayalulo ga kalekwe manga opo “kehe gumwe a ninge omaindilo pwaana uupyakadhi wa sha”.

“Shila oongele NSA ta ningile owina opo a hupithe ko omuhoko gwaa/Khomanin, otatu indile neitulomo opo omayalulo ga kalekwe ko ku ningwe omakwatathano ge li nawa ngoka taga shilipaleke kutya aantu ayehe komikunda oya kwatelwa mo mekuto pauyuuki.

“Otatu indile opo ya shune komulandu omukulu gwokuninga omaindilo, opo ashike tashi kale sha kwatela mo aantu ayehe,” osho a popi ngaaka.

OPUMBWE YIILONGA … Ompumbwe yiilonga maagundjuka oya yaga kegonga, ehangano lyomayalulo moshilongo lyedhina Namibia Statistics Agency (NSA) olya popi kutya olya yakula omaindilo ga konda po60 000 goonkatu 13 000 dhomayalulo gaakwashigwana nomagumbo. Methano ndika otamu monika aagundjuka omathele mboka kwa li ya mbombolokele poshitaasi shaWanaheda mOvenduka okuthikitha omaindilo gekuto lyuupolisi, omwedhi gwa zi ko. Ethano: Henry van Rooi

ONDJALA YIILONGA MOSHILONGO

MuMaalitsa numvo, oshigwana okwa li sha thigwa monkumwe sho aagundjuka ye li po2 000 mOvenduka kwa li ya mbombolokele pehala lyorestolanda nomainyanyudho lyedhina Temperature Lounge and Restaurant okugandja omaindilo gawo, nonande opwa li owala oompito 16 dhiilonga.

Lwanima omwedhi ngoka, aantu omathele oya mbombolokele pofabulika yoohi, Omualu Fishing, mOmbaye okukonga iilonga sha landula sho aantu kwa li ya taambathana etumwalaka kutya oyu uvu ehangano ndyoka tali kutu.

Onkalo ndjoka okwa li ya hwahwameke ongundu yo-Namibia Economic Freedom Fighters (NEFF) ye eta po ehololomadhiladhilo lyi li ompinge nonkalo yokwaana iilonga moshilongo ndyoka kwa li lya kwatelwa komeho koshilyo shongundu yoPopular Democratic Movement megumbo lyopashigwana Inna Hengari, oshilyo shongundu yoNEFF Michael Amushelelo osho wo omunandjungu Dimbulukeni Nauyoma.

Shoka okwa li she eta ayehe ya tulwe miipandeko nokupatelwa mo.

Onkalo yokuhakana iilonga onkene ya tsikile nokwa li wo shi imonikila natango muMei, sho aagundjuka kaaye na iilonga ye li po2 000 kwa li ya mbombolokele poshitaasi shopolisi yaWanaheda okuninga omaindilo goonkatu 750 ndhoka kwa li tadhi kutwa mopolisi.

Lwanima, omupopiliko gwopolisi moshilongo, omupevikomufala Kauna Shikwambi, okwa tseyitha kutya opolisi okwa li ya yakula omaindilo ge li 42 967 gaamboka ye na ohokwe yokutaambwa mekuto lyoopoosa 1 000 dhopolisi.
Momwaalu ngoka, omwa kuthwa aantu ye li 2 398 (aalumentu 1 664, aakiintu 734) mboka ya ningilwa okakonakono opo mu tothwe aanelago 750.