Namibia
This article was added by the user . TheWorldNews is not responsible for the content of the platform.

Omayako nomayugo ga konda po1 000 muule woomwedhi mbali

Omayako, omayugo nomateyo oga ndhindhilikwa moshitopolwa shaKhomas, moka mwa lopotwa iipotha kumwe 2 000 muule woomwedhi mbali.

Mombapila ndjoka ya tuminwa ngoloneya oshiwike sha zi ko, komanda gwopolisi yaKhomas, komufala David Indongo okwa popi kutya moshitopolwa omwa ndhindhilikwa iipotha 619 yomayako muMei. Omwaalu ngoka ogwa shuna pevi kashona okuyelekanitha niipotha 657 mbyoka kwa li ya lopotwa muApilili.

“Omayugo gomaludhi ga yooloka ga ndhindhilikwa muMei oga li po207 nomuApilili omwa li iipotha 211,” osho ombapila ya shangwa ngaaka.

Ishewe, omateyo gomagumbo oga thikama piipotha 247 moomwedhi adhihe mbali, omanga omahala goongeshefa ge li 59 okwa li ga teywa.

Komanda okwa popi kutya oya taalelwa komashongo ga kwatela mo omwaalu gu li pevi gwaapolisi, ompumbwe yiihauto noombelewa osho wo omahala gomalukalwa.

“Mongashingeyi, oshitopolwa kashi na sha oombenge oonene,” osho Indongo a popi ngaaka. Pokati mpoka, oshitopolwa osha ndhindhilike iipotha yomadhengo yi li po500 muule woomweedhi mbali dha piti. Indongo okwa popi natango kutya iipotha 337 yomadhengo nelalakano lyokwe ehameka kolutu okwa li ya ndhindhilikwa.

“Iipotha yomahepeko gomomagumbo okwa li ya thikama po65 muMei omanga muApilili oya li po78, omanga iipotha yomakwatonkonga oya li po13 muMei omanga muApilili oya li 11,” osho ombapila ya shangwa ngaaka.

Komufala okwa popi kutya iipotha oyindji yomahepeko gomomagumbo oye etithwa kelongitho lyomalovu niingangamithi.