Namibia
This article was added by the user . TheWorldNews is not responsible for the content of the platform.

Omulumentu a tsuwa nokusa omolwekende lyomalovu goCastelo

Omulumentu gwomOvenduka okwa tsuwa nombele mEtitano nokuhulitha pethimbo lyolugodhi ndoka lwa tukuka omolwekende lyoolita mbali lyomalovu goCastelo [okankogo].

Omulumentu ngoka otaku hokololwa a tsuwa nombele pethimbo a li nookuume ke pondingosho yedhina Masipiri Bar moKatutura, noontamanana odha tukuka omolwekende lyoCastelo ndyoka anuwa lya kanene motaxi yomufekelwa.

“Omufekelwa otaku hokololwa a adhika nombele yOkapi osho wo osikulufu, omanga nakusa okwa adhika motuukala yomufekelwa, otaxi yoPolo VW ontiligane, ndjoka taku hokololwa ya li tayi hingwa kukuume gwanakusa pethimbo a li ta kambadhala oku mu fala koshipangelo,” osho olopota yopolisi kombinga yiiningwanima ya ningwa mehuliloshiwike ya popi ngaaka.

Olopota oya yelitha kutya sho otuukala ndjoka ya thikamekwa, omudhimba gwomulumentu ngoka okwa li gwa lala kiipundi yokonima. Aapambele yanakusa kaya li ya tseyithilwa onkundana yoluhodhi pethimbo ya thiki momake gonzonkundaneki ndjika, onkene edhina lyanakusa itali vulu okutseyithwa.

Omakonakono gopolisi otaga pula komeho.

Moshiningwanima shilwe, omulumentu gwomimvo 22, Peter Bockky Amwaalwa, okwa adhika a mana oondjenda momudhingoloko gwaMondesa moSwakopo, mOlyomakaya.

Pauyelele wopolisi, omulumentu ngoka okwa tsuwa noshilwitho sha honga – lumwe metundji lyokolumoho osho wo kombunda lwiikando iyali. “Pethimbo lyoshikonga shopehulilo lyomwedhi, opolisi oya adha omulumentu a lala mokati kombinzi noku na iilalo tayi ulike kutya okwa tsuwa,” osho omukwatakanithi gwomakonakono giimbuluma mopolisi yoshitopolwa shErongo, Erastus Iikuyu, a popi ngaaka.

“Opolisi oya dhengele mbala oambulansa yepangelo, aanambelewa oya thiki nolwanima oya koleke kutya okwa mana oondjenda.”
Omakonakono gopetameko ogu ulike kutya Amwaalwa okwa ponokelwa ponokelwa nokuhangenwa kongundu yaalumentu mboka kaaye shiwike sigo oompaka.

Oshe etithi inashi tseyika natango.

Aapambele yanakusa Amwaalwa oya tseyithilwa nale onkundana yoluhodhi. Opolisi otayi indile ekwatho moshigwana opo shi tseyithile opolisi kombinga yuuyelele mboka tawu vulu okukwatitha po aafekelwa moshinima shoka.

Moshiningwanima sha yooloka, omulumentu gwomimvo 28 okwa adhika a hulithila megumbo moLüderitz notaku hokololwaa adhika noshilalo shoholo yondjembo, sha ningwa mEtitano lya zi ko.

Opolisi oya popi kutya oya adha Kaen Amutenya i ipatela mokandjugo noshilalo shoholo yondjembo momupolo. “Ombistoli ya longithwa oyoomilimeta 7 notaku hokololwa kutya oya tate gwanakusa, noshipatolona shimwe shoka sha longithwa otaku hokololwa sha adhika pehala lyoshiningwanima,” osho olopota yopolisi ya popi ngaaka.

Opolisi oya popi kutya oshe etithi shoshiningwanima shoka inashi tseyika natango.

Aapambele ya Amutenya oya tseyithilwa nale onkundana yoluhodhi. Omakonakono gopolisi otaga pula komeho.

Omulumentu gwomimvo 37 gwomOvenduka otaku hokololwa i ikutha omwenyo sha ningilwa pehala lyokudhinda omeya lyedhina Gammams Water Purification Plant sha ningwa mOlyomakaya.

“Omudhimba gwa nakusa ogwa falwa kokila yopolisi omanga kwa tegelelwa oshizemo shomakonakono getando lyomudhimba,” osho olopota yopolisi ya popi ngaaka.

Aapambele yanakusa inaya tseyithilwa natango kombinga yonkundana yoluhodhi nomakonakono gopolisi otaga pula komeho.
Moshiningwanima sha faathana, omulumentu gwomimvo 38 okwi ikutha omwenyo mEtitano sha ningilwa mOkahao.

Nakusa Anthony Lisulo Mapenzi otaku hokololwa a zi mo megumbo lwopotundi12h00, nolwanima esiku ndyoka, omudhimba gwe ogwi itsuwika. Kapu na ngoka ta pelwombedhi oshiningwanima shoka. Omakonakono gopolisi otaga pula komeho.