Namibia
This article was added by the user . TheWorldNews is not responsible for the content of the platform.

Omulumentu gwomOndangwa a lemana sho a dhengwa koombotsotso

Omulumentu gwomOndangwa okwa popi kutya oku uvite nayi kombinga yoshipotha shoka kwa li a patululile oonakumulemaneka omimvo dha piti, molwashoka otashi pula ethimbo ele opo shi manithwe.

Kriat Kamanya, ngoka ha longitha okatemba kaanuulema ngashingeyi, okwa hokolola kutya okwa ponokelwa kookalyamupombo yane mOshakati momasiku 2 Septemba 2017.

Kamanya okwa hokolola kutya ngashingeyi opwa pita oomvula hamano oshipotha shoka inaashi manithwa naashoka tashi uvitha nayi noonkondo omolwashoka ngashingeyi okwa lemana omanga oonakumulemaneka ya manguluka molwashoka okwa li ya pewa oboloha.

Omukuluntu gwoshimpungu shomakonakono moshitopolwa shaShana, omupevikomufala Hamukoshi Kamati okwa popi kutya oshipotha shoka oshu undulilwa komasiku 6 Kotoba.

“Itandi vulu okutya ko sha kombinga yaampoka pwa thikama oshipotha shoka, molwashoka onkene nda tega eyamukulo okuza kompangu,” osho a popi ngaaka.

A HALA UUYUUKI … Momathano ngaka otamu monika Kriat Kamanya e li mokatemba. Kamanya okwa lemanekwa kookalyamupombo oomvula hamano dha piti ashike sigo oompaka oshipotha shoka inashi pwa. Omathano: Ga Gandjwa

Ashike nando ongaaka, Kamati okwa popi kutya aafekelwa moshiningwanima shoka oya patululilwa oshipotha sheyugo.

Aafekelwa moshiningwanima shoka oyo Garden Nangolo (22), Simon Petrus (25), Absalom Shatumbu (28) osho wo Pombili Shatumbu (30) nokwa li ya tulwa miipandeko sha landula oshiningwanima shoka.

Aafekelwa mboka okwa li ya pewa kehe gumwe oboloha yooN$1 500.

Kamanya okwa popi kutya oshiningwanima shoka osha ningwa pethimbo a li a ka talela po kuume ke. “Onda thikameke oshihauto shandje pondje yegumbo lye, manga inaandi ya molugumbo okwa nuka ongundu yaalumentu taya pula ongodhi yandje noya ponokele ndje,” osho a popi ngaaka. “Aalumentu mboka okwa li ya homata oombele noya tameke okudhenga ndje. Gumwe gwomuyo okwa dhenge ndje nondhopi mepunda. Onda li muuwehame noonkondo, kanda li nokuli tandi vulu okwiinyenga,” osho Kamanya a hokolola ngaaka.

Okwa popi kutya esipa lye lyombunda olye ehamekelwa mo, naashoka oshe eta a lemane. Onkalo ndjoka okwa li ye eta a kanithe niilonga ye.

“Ngashingeyi onda tula omutengi gwoshimaliwa komapepe gaakwanezimo yandje molwashoka ohandi kala owala tandi taambelwa moombete,” osho a popi ngaaka.

“Omolwashike aantu yoludhi ndoka haya vulu okwe ethiwa nuuna ya dhipaga?” osho Kamanya a pula ngaaka.

Okwa gwedha po kutya konima yoshiningwanima shoka, opolisi inayi ka konga aafekelwa mboka, ashike tate gwe oye kwa li a kutha onkatu yoku ka konga aafekelwa nokulombwela opolisi.

Kuume kaKamanya ngoka oye a li pehala lyoshiningwanima, Ester Nambele, okwa popi kutya aafekelwa mboka okwa li ya ponokele Kamanya ye na ekatana.

“Okwa li nda tala nkene kuume kandje ta dhengwa ethimbo lyomutenya. Okwa li nda kugu opo ye mu ethe, ashike kapu na ngoka e tu pe ekwatho lya sha,” osho a popi ngaaka.

“Aantu okwa li ya gongala nokukala owala ya tala ko, nokwa li nda tondoka ndi ka lombwele aamwameme opo ye ye ya kwathele omanga inaa tu mu fala koshipangelo.

Opolisi oya kwatathana nangame pwa pita oomvula mbali konima yoshiningwanima opo yi pule ndje natango uuyelele, konima sho twa lombwela kutya epeko lyotango okwa li lya kana,” osho a popi ngaaka.

Mumwayinagona gwaKamanya, Rachel Jonas, ngoka wo oye he mu sile oshimpwiyu, okwa popi tati:

“Okuli lela muuwehame, nokutala kutya oye kwa li he eta omboloto megumbo.

Ngashingeyi aanegumbo ihaya pewa we eyambidhidho ndyoka kwa li ha gandja, naashoka ohashi mu uvitha nayi omasiku gamwe.”

Felix Shivute, ngoka a li omukuluntu ta kwathele mehangano ndyoka Kamanya a li ha longele, okwa hokolola kutya Kamanya okwe mu tseya mo2012 sho a tameke ha longele ehangano lyawo.

Okwe mu tongonona ongomuniilonga a li ha longo neitulemo nokwa li aluhe ha kala a hala okukwathela.

“Okwa li ha longo nawa iilonga ye, melandulathano noneitulemo. Pethimbo ndyoka okwa li wo ti igwedhele ko keilongo lye molwashoka iilonga kwa li ha longo ohayi pula okutumba iinima iidhigu,” osho Shivute a popi ngaaka.