Namibia
This article was added by the user . TheWorldNews is not responsible for the content of the platform.

Omulumentu ta pula a longelwe uuyuuki sho a dhengwa kolusheno

Omugudjuka gwomomukunda Epyeshona popepi nondolopa yaShakati omasiku ga zi ko, okwa li ta popi nomushiinda she sho a kwata kondhalate yolusheno noye mu dhenge nokukambuka.
Ondhalate ndjoka yolusheno a kwata, oondjoka hayi kala ya kwatela po opaala yolusheno ya za pompanda ya tsa pevi, yo ishewe inayi pumbwa okukala ya kwatakanithwa kolusheno.

Fillipus Veiko (21) okwa popi kutya oshiningwanima shoka, a ningilwa momasiku 19 Mei, oteshi gandjele ombedhi kehangano lyedhina Elektro Hinsch Contracting Pyt Ltd, ndyoka kwa li lya pewa iilonga kehangano lyoNorthern Regional Electrical Distrubutor (Nored) opo li tule olusheno momagumbo gatano gomomukunda gwawo.
Nored ehangano lyokwaandjanganeka olusheno kiitopolwa yomonooli yolusheno nokwa li lya gandja oshinakugwanithwa koElekro Hinsch.

Veiko okwa hokolola kutya ehangano lyo-Elektro Hinsch Contracting okwa li lya thigi ondhalate ndjoka ya kwatakanithwa kolusheno nolusheno okwa li lwa thigwa talu longo, sha ningwa inaaku gandjwa epitikilo kuNored ngoka oye e na tango okutala ngele olusheno olwa longwa ngaa mondjila omanga inaalu temwa.

Okwa popi kutya okuwete kutya etokolo lya ningwa Elektro Hinsch Contracting olya ya pambambo omulandu gwiilonga yolusheno nonkene shoka okwa li sha thigi aakwashigwana niimuna moshiponga ngele oya gumu ondhalate ndjoka – inaayi pumbwa okukala ya kwatakanithwa kolusheno.
Veiko okwa popi kutya ota pandula aashiinda noonkondo sho ye mu hupitha molwashoka ando okwa li po oye awike ando ngashingeyi ke ko we.

“Gumwe gwopuushiinda oye a kuthe ndje ko kondhalate ndjoka yolusheno, pethimbo ndyoka okwa li tandi zi etutu mokana nomomayulu,” osho a popi ngaaka.

Veiko okwa hokolola kutya omushiinda ngoka e mu hupitha okwa longitha oshiti opo e mu kuthe ko kondhalate yolusheno, nolwanima oye mu fala meendelelo koshipangelo shaShakati a ka mone uuhaku.
Veiko, omutungi gwomatungo, nokwa popi kutya okuza poshiningwanima shoka ngashingeyi ontulo ye ohayi kala tayi ehama

noya gogoma, ye ishewe oha kala nokuza omukota.
Okwa popi kutya ngashingeyi iha vulu we okugwanitha po iilonga ye komatungo nonkene okwi ikwatelela owala kopenzela ya yinakulu gwomimvo 75.

Veiko okwa hokolola kutya okwa hala ehangano ndyoka li tsikile nokufuta epango ndyoka ta pumbwa nongele hasho nena oli na oku mu futa.

Okwa popi kutya okwa li a taambelwa moombete dhoshipangelo shopaumwene shaMediPark mOngwediva, uule womasiku gatatu.
Mumwayinagona gwaVeiko, Joseph Petrus, okwa popi kutya ehangano ndyoka lyoElektro Hinsch Contracting olya pumbwa okusa oshimpwiyu moshiningwanima shoka molwashoka olya thigi ondhalate ndjoka yolusheno ya tema, ishewe Nored oye kwa li e na uuthemba wokuninga omakonakono tango okutala kutya ayihe oyi li megameno nopomahala omanga olusheno ndoka inaalu temwa.

Petrus okwa popi kutya nonande ongaaka otaya pandula ehangano lyo-Elektro Hinsch Contracting molwashoka okwa li lya futu epango lyaVeiko pethimbo a taambelwa moombete dhoMediPark, ashike oye wete kutya otashi kala nawa ngele olya tsikile noku mu futila uuna ta pumbwa epango, sigo a aluka thilu.

Okwa hokolola kutya iiwike yali ya piti, okwa li a fala Veiko kombelewa yoElektro Hinsch Contracting mOngwediva oku ke ya tseyithila kutya Veiko ku uvite nawa natango sho a monithwa oshiponga kolusheno.

Ashike nando ongaaka, omukuluntu gwehangano ndyoka, Carl Bothma otaku hokololwa e ya lombwele kutya kaye na we shoka taya vulu okuninga po molwashoka oye mu futila nale pethimbo a li moombete dhoshipangelo shaMediPark.
Petrus okwa popi kutya Bothma okwe ya lombwele kutya naya tegelele eyamukulo okuza koombonge oonene dhehangano lyawo kOvenduka, ashike sigo onena inaku za eyamukulo lya sha.

“Okwa li nde ya tumine ontumwafo paemail, nomukiintu gwontumba okwa dhengele ndje ongodhi. Okwa lombwele ndje kutya ote tu galukile ashike shoka ineshi ninga,” osho a popi ngaaka.
Petrus okwa popi kutya Bothma okwa lombwele Veiko kutya okuna okwaaluka, molwashoka okushi aantu mboka kwa li ya dhengwa kolusheno ashike ngashingeyi oya aluka.

“Shoka okwe shi popi omanga inaa mona olopota kombinga yepango lye,” osho a popi ngaaka.
Petrus okwa popi kutya oshiningwanima shoka oye shi lopota kombelewa yaNored osho wo kewilikongundu lyoshikondo shomalusheno moshilongo oElectricity Control Board (ECB), ashike inaya pewa ko omayamukulo tage ya mbilipalele.

Petrus okwa popi kutya esiku ndyoka oshiningwanima sha ningwa, Nored okwa li a telele po ehala mpoka pwa ningilwa oshiningwanima nokwa shanga olopota shoka yu ulike kutya ondhalate yokukwatela po opaala okwa li ya kwatakanithwa kondhalate yokweenda olusheno, papuko.

Sho a kwatathanwa naye, Bothma okwa lombwele onzonkundaneki ndjika yi pule uuyelele kuhahende gwawo kombinga yoshiningwanima shoka.

Pauyelele woshifonkundaneki shoNamibian Sun, Bothma okwa koleka oshiningwanima shoka.
Oshifonkundaneki shoka osha lopota kutya ehangano ndyoka olya pukulula epuko ndyoka notali kwathele Veiko miifuta yepango lye.
“Inatu lombwelwa we sha oshipe kombinga yuupyakadhi [wopaundjolowele waVeiko], molwashoka ndohotola okwe mu laleka mo moshipangelo konima yomasiku gatatu nokwa li e mu ningile omakonakono opo a koleke kutya okuli nawa,” osho Bothma a popi ngaaka.

Bothma okwa popi wo kutya ehangano lyawo olya kala tali longo momalusheno uule wethimbo, ano oomvula dha konda po25 ashike inali ninga nale epuko ngaashi ndyoka lye eta oshiponga kuVeiko.

Okwa tongonona oshiningwanima shoka kutya osha holoka pamupya ishewe itashi endululwa we nokwa popi kutya ehangano lyawo itali ka futa Veiko oshimaliwa ashike otali kala owala nokufuta epangelo lye uuna tashi pumbiwa.