Namibia
This article was added by the user . TheWorldNews is not responsible for the content of the platform.

Omunino gwonyata gwatopa mosekundo yaHaudano

Aanaskola yoposekunda yaHaudano moshikandjohogololo shaKalongo moshitopolwa shaMusati oya tuminwa komagumbo mEtitatu lya zi ko omolwonkalo yi nyanyaleka mosikola ye etithwa komunino gwomeya gonyata ngoka gwa tsipuka momudhingoloko gwosikola.

Omunino ngoka otaku hokololwa gwa yonuka momasiku 23 Juli omolwuuwindji welongitho lyomunino ngoka hagu longithwa kiikondo ya yooloka mwa kwatelwa osekundo ndjoka, ombelewa yakansela gwaKalongo osho wo koshitaasi shopolisi yaKalongo.

Omukuluntusikola gwosekundo ndjoka Abel Nhinda okwa popi kutya muule woomvula dha zi ko oya kala ya taalelwa kuupyakadhi womunino gwonyata, ashike mesiku lya tumbulwa metetekelo onkalo oya nayipala.

“Uupyakadhi owa zi mpoka kutya omunino gwonyata okuza pondje yosikola ogwo gwe eta uudhigu mominino gwosikola yetu,” osho a popi ngaaka. Nhinda okwa popi kutya onkalo ndjoka kayi na nande uuyogoki noya tula onkalo yuundjolowele waanasikola naalongi moshiponga, molwashoka ngashingeyi omeya gonyata oga talama owala mosikola osho wo momuhandjo gwaanasikola.

“Otashi uvitha nayi molwashoka opo owala twa zi mefudho nopwa piti owala oshiwike shimwe, ngashingeyi aanona otweya tuma ya shune komagumbo natango. Ngashingeyi elongo olyi li othika, omanga ekonakono nalyo lyi li popepi. Shoka otashi ka guma aanona kaaya ninge nawa mekonakono,” osho a popi ngaaka.

Nhinda, okwa popi kutya okuza oshiwike sha zi ko ombelewa ye oya kala tayi kongo ekwatho lyololi yonyata nenge eshina lyokupomba opo omeya ngoka ge li mosikola ga kuthwe mo ashike oonkambadhala ndhoka odha hulile mokwena kwa thita.

“Otwa tsakanena naakuthimbinga oshiwike sha zi ko nuupyakadhi mboka okwa li twewu kundathana. Otu wete kutya ngele otwa mono ekwatho, nena otatu vulu okugalula aanasikola yamwe, unene tuu mboka ye li mondondo 11, mboka ya tegwa ya kale ya shanga ekonakono lyopashigwana,” osho a popi ngaaka.

Nhinda okwa popi kutya okwa li ya kwatathana nombelewa yoshikondo shelongo, ashike inaya pewa eyamukulo sigo onena. Osikola ndjoka oyi na aanasikola ye li 750, moka ye li 744 yomuyo haya zi momuhandjo.

“Otwa tseyithila aavali kombinga yonkalo, notatu kala noshigongi shaavali [oshiwike shika], opamwe naakuthimbinga yalwe opo tu tale kutya onkalo ndjoka otatu yi yapukile nomukalo guni,” osho Nhinda a popi ngaaka.

Okwa popi kutya ngele onkalo oya tsikile yi li ngaaka nena otaya ka dhika po ootenda opo ya shilipaleke kutya aanasikola oya tsikila nelongo, omanga kwa tegelelwa elelo lyoshitopolwa lyi yapukile omukundu ngoka.

Omukuluntu gwelongo moshitopolwa shaMusati Ben Eiseb okwa popi kutya ombelewa ye hayo yi na oshinakugwanithwa shokukandulapo uupyakadhi mboka womunino gwonyata nonkene oshinakugwanithwa shoka oshi li momake gelelo lyoshitopolwa shaMusati osho wo uuministili wiilonga.

“Omunino ngoka gwonyata posekundo kagushi owala gwosikola oyo awike ashike ogwe enda wo omeya gonyata okuza momalukanda gaakalimo,” osho a popi ngaaka.

Omunashipundi gwelelo lyoshitopolwa shaMusati, Andreas Shintama okwa popi kutya ombelewa yawo otayi ka yapukila mbala uupyakadhi mboka molwashoka inashi guma owala osikola ndjoka ndele osha guma wo omalukanda gamwe.