Namibia
This article was added by the user . TheWorldNews is not responsible for the content of the platform.

‘Onda tila okutaandeleka oTB kaanona yandje’

Sho uutalala wokufu tawu dhiginine moshilandopangelo, ongundu yaakalimo mboka kaaye na omalukalwa mOvenduka otaya longo nondatu okwiikandeka konkalo yombepo ya talala noonkondo unene tuu okuza omasiku ga zi ko, nonkene olundji oyendji ohaya tokelwa nokupenduka taya huhulukwa.

Gumwe gwomaakalimo mboka oHanlie Ses, ta lumbu nombuto yoHIV noku na wo aanona yaali, ashike omasiku ga zi ko okwa li a monika oTB.

Omolwonkalo ya talala noonkondo, Ses noyana yaali, gumwe oku na omimvo 8 nomukwawo 10, ohaya igonyene mekumbatha limwe kongulohi.

“Owu na okukala wa huhulukwa opo wu dhenge po uutalala koonyala nokoompadhi, ngele hasho owu na okusa kuutalala molwashoka otu na owala ekumbatha limwe ndyoka inaali tu gwanena nawa,” osho a popi ngaaka.

Ses okwa popi kutya oku na etegameno lyokumona ekumbadha lya gwedhwa po – ineli pumbwa owala opo i hupithe konkalo ya talala noonkondo, ashike okukwathela opo kaa taandeleke oTB kaanona ye.

“Mongashingeyi ondi li kepango lyoHIV, nokwa li nda monika TB omasiku ga zi ko,” osho a popi ngaaka.

Ses, ngoka hazi pokapale ketanga kaKhomasdal, okwa popi kutya oha longitha owala ekumbatha limwe naanona ye, noha kambadhala aluhe opo ki isikile komutse opo kaataandeleke oTB koyana.

“Ondi na uumbanda noonkondo wokukwatitha aanona yandje [koTB], molwashoka oyi na omandhindhiliko omadhigu, ngoka ndi wete kutya otashi vulika aanona yandje kaya ka vule okwiidhidhimikila,” osho a popi ngaaka.

Okwa popi kutya aluhe oha kwashilipaleke kutya oyana oya tuntilwa, opo ya gamenwe kaaya kwatwe komikithi nuupu.

“Uuna nda kolola kohi yekumbatha, ohandi kala ndu uvite nayi noonkondo ongomulukukadhi ashike kandi na shoka tandi vulu okuninga po. Ihandi dhiladhila nokuli okupatulula otenda opo mu ye ombepo molwashoka otatu si kuutalala,” osho a popi ngaaka.
Oomwedhi ndhoka haku kala kwa talala noonkondo, ohaya tema omulilo okuza potundi 18h00 opo ya huhulukwe.

Brenda Bock (39), okwa popi kutya omulilo ogwa simana noonkondo kuyo, molwashoka uuna kaagu po ohaya mono iihuna kuutalala.

“Otatu indile ekwatho lyomakumbatha nenge lyoombindja, molwashoka omwedhi gwaJuli ogwa thika, ashike sigo oompaka katu na po sha. Onkalo yombepo otayi ka kala ya nayipala,” osho a popi ngaaka.

Bock okwa tongonona kutya kehole nande onkalo yopokufu molwashoka ohaya kotha nuudhigu.

“Ethimbo lyuutalala olyaayamba, molwashoka tse oohepele ohatu hupu nuudhigu,” osho a popi ngaaka.

Bock okwa popi kutya eshongo enene haya kala ya taalela olyiikulya, ashike pethimbo lyuutalala ohaya taalelwa komashongo omanene gaali, uutalala osho wo ondjala.

“I ipula owala to ka lala wa sa ondjala ngoye oto dhengwa kuutalala,” osho a popi ngaaka.

Pokati mpoka, omundohotola gwopaunamiti Bernard Haufiku, okwa popi kutya onkalo yaSes ngoka ha lala naanona ye omanga te ehama oTB oya nika oshiponga noonkondo.

“Shoka ndi shi ooshoka kutya, ekeelelo lyolela lyuupyakadhi mboka oongele omukulukadhi ngoka i ikalekelwa kaakele manga popepi naanona ye, molwashoka kapu na omuti nenge etuntilo hali longo othaathaa oopelesenda 100,” osho a popi ngaaka.

Haufiku okwa popi kutya uupyakadhi mboka owa pumbwa okuyapukilwa opo ku keelelwe etaandelo lyoTB.

Okwa popi kutya aantu mboka ye na oTB oya pumbwa okupewa omiti dhawo tadhi nuwa melandulathano osho wo okukala taya yi komakonakono.