Namibia
This article was added by the user . TheWorldNews is not responsible for the content of the platform.

Ooprojeka dhuuministili wuundjolowele dha thigwa othika

Iilonga yooprojeka dhuuministili wuundjolowele odha thigwa othika naashoka oshe etwa komatompelo ogendji mwa kwatelwa okwaana uunongo mwaamboka kwa li ya pewa iinakugwanithwa osho wo ompumbwe yoshimaliwa.

Uuyelele mboka owu li molopota yUuministili wIilonga nIiyenditho ndjoka ya popi kutya ooprojeka odhindji dhepangelo okwa li dha thigwa othika, nodhindji dhomwaandhoka, odha kwatela dhuuministili wuuhaku dhokwoopaleka, okugwedhela nokutunga iipangelo iipe.

Uuyelele mboka owu li molopota yuuministili wiilonga ndjoka ya shangwa mo2020, noya popi kutya iilonga yeyopaleko lyoshipangelo shaKeetmanshoop oya thigwa othika muJuli 2016 molwashoka nakupewa iilonga mbyoka kali e na owino ishewe okwa li ta nana nondatu pashimaliwa.

Oprojeka ndjoka oya li yongushu yoomiliyona N$23.
Minista guundjolowele nomayakulo gonkalonawa Kalumbi Shangula okwa popi kutya shoka okwa li she eta ya gandje po iilonga mbyoka kehangano lilwe opo omukunda gwaanuuvu yoTB gu manithwa moshipangelo shoka. “Iilonga mbyoka okwa li ya gandjwa komahangano ngoka ga pyokoka mokugandja omayakulo ngoka. Iilonga yoprojeka ndjoka oya tegwa yi manithwe pehulilo lyaJuli,” osho a popi ngaaka.

Olopota oya popi kutya iilonga yokapangelo kedhina Shamaturu Clinic taka adhika moshitopolwa shaKavango Uuzilo yongushu yoomiliyona N$13 oya thigwa othika omolwomatompelo goshimaliwa.

Shangula okwa popi kutya ngashingeyi iilonga oya pewa ehangano lilwe opo oprojeka ndjoka yi manithwe.
“Iilonga okwa li ya gandjwa po kehangano epe momasiku 9 Juni 2022, nokwa tegelelwa yi kale ya pwa pehulilo lyomwedhi nguka,” osho Shangula a gwedha po ngaaka.

Mo2019, ehangano ndyoka kwa li lyi inekelelwa iilonga yokunawapaleka okapangelo kedhina Schlip Clinic moshitopolwa shaHardap, olya thigi po iilonga. Oprojeka ndjoka okwa li tayi pula oshimaliwa shoomiliyona N$1,2.

Uuministili owa popi kutya lwanima owa tokola okukutha ehangano ndyoka oshinakugwanihwa shoka mo2019 molwashoka ka kwali tali longo neitulemo opo iilonga yimanithwe.

Uuministili owa popi kutya ehulitho po lyokontalaka ndjoka okwa li lya hulile moontamanana ndhoka dha manithwa muApilili numvo, “nongashingeyi uuministili owa pititha otendela opo ku gandjwe iilonga mbyoka kehangano lilwe,” osho Shangula a popi ngaaka.

Mo2019, iilonga yokutunga okapangelo okape osho wo olukalwa lwaaniilonga yuuhaku mOnanghulo moshitopolwa shaHangwena, oya kalekwa othika molwashoka ehangano ndyoka kwa li lya pewa oshinakugwanithwa kalya li niikwaniipangitho ya gwana ishewe olya li nuupyakadhi wopashimaliwa.

Uuministili owa popi kutya iilonga mbyoka oyali tayi kotha oomiliyona N$9 nokwa li ya tamekwa momasiku 1 Septemba 2016, ashike okontalaka ndjoka oya hulithwa po mo2022, nongashingeyi iilonga oya pewa ehangano lilwe.

Shangula okwa popi kutya ekateko lyooprojeka ndhoka oli na uuwinayi noonkondo koshigwana shoka shi li mompumbwe yomayakulo guuhaku nonkene ohashi eta aakwashigwana ye ende oondjila oonde oku ka konga omayakulo guuhaku.