Namibia
This article was added by the user . TheWorldNews is not responsible for the content of the platform.

Swapo ta kondjitha oondjokana dhomashenge

Okomitiye yongundumutima yoSwapo oya lombwele epangelo li yelitha oshitya “aahokanathani” mOveta yokukondolola Omatembu, ndjoka tayi ke eta opo aahokanathani yuukwashikekookantu woludhi lumwe kaaya talike ko we ongaahokanathani.

Shoka osha landula etokolo ndyoka kwa li lya gandjwa kOmpangu yoPombandalela omwedhi gwa zi ko sho ya gandja elombwelo kepangelo opo li taambe ko oondjokana dhaantu yuukwashikekookantu woludhi lumwe ngaashi omashenge, mboka ya hokanena pondje yoshilongo.

Momukanda ngoka gwa pitithwa kongundu tayi pangele mOlyomakaya oya popi kutya “otayi kondema noonkondo nokwaataamba ko iilonga ayihe inaayi uka,” osho wo “iilonga yilwe mbyoka kaayi li pamulandu gwooveta dhaNamibia nenge momilandu dhoshigwana”.
Ongundu yoSwapo oya gwedha po kutya oya lombwele “epangelo opo li tule miilonga ooveta adhihe ndhoka dha nuninwa okukeelela nokukondjitha iilonga mbyoka [inaayu uka].”

Ongundumutima yoSwapo oya tsakanene mOlyomakaya, oku ulika nkene yu uvithwa nayi noonkondo ketokolo kwa li lya ningwa kOmpangu yoPombandalela kombinga yoondjokana dhomashenge.

Pethimbo ta popi niikundaneki kombinga yoshizemo shomoshigongi shongundumutima yoSwapo, omupopiliko gwoSwapo Hilma Nicanor okwa popi kutya ongundu yoSwapo oya ningi etokolo opo yi lombwele epangelo li ninge etokolo mbala opo ku ningwe omalunduluko mOveta yOkukondolola Omatembu mwa kwatelwa wo okuyeleka efatululo kutya “aahokanathani” kwi ikwatelelwa kooveta dhoondjokana noofamili moNamibia.

Momasiku 16 Mei, Ompangu yoPombandalela oya ningi etokolo lyi li ompinge nuuministili wiikwameni mboka kwa li wa tinda okutaamba ko oondjokana dhomashenge ngoka ga hokanena pondje yoshilongo ngaashi tashi uthwa kOveta tayi kOndolola Omatembu yo1993.
Ompangu okwa li ya popi kutya etindo lyokutaamba ko oondjokana dhomashenge olya ya pambambo uuthemba nongushu yaantu ngaashi tashi uthwa koveta yaNamibia.

Jerry Ekandjo

Ompangu yoPombandalela oya popi kutya paveta yaNamibia, ondjokana ohayi talelwa moveta yoshilongo hoka ondjokana ya ningilwa.

Oveta ndjoka, ompangu oya popi kutya oyi li mewi limwe nooveta ndhoka dhi na okutaambiwa ko ngaashi tashi uthwa koveta yaNamibia.
Ashike nando ongaaka, okomitiye yiikwaveta yongundu yoSwapo oya yambidhidha epangelo kutya nonande aakwiilongo yaali oya hokana Aanamibia miilongo moka mwa taambiwa ko oondjokana dhomashenge, shoka itashi ti nande moNamibia oye na okutaliwa ko “ongaahokanathani”.

Oya popi kutya ngele shoka osha taliwa ko ongaahokanathani, nena otashi kala shi li ompinge nooveta nomilandu dhaNamibia.

Nicanor, ngoka a lesha omukanda gwokomitiye yongundumutima yoSwapo, okwa popi kutya etokolo lya ningwa kOmpangu yoPombandalela olya tala owala kokutaamba ko oondjokana dhomashenge ga hokanena pondje yoshilongo nelalakano lyomatembu.
“Okomitiye yongundumutima oya tala muule etokolo ndyoka, ishewe itali ulike nande kutya oondjokana dhomashenge odha pitikwa moNamibia ngaashi yamwe ye shi tala ko,” osho Nicanor a popi ngaaka.

“Konima sho ongundumutima ya kundathana muule kombinga yetokolo ndyoka nolya guma oshigwana ashihe, oya holola euvonayi enene kombinga yetokolo nengwangwano ndyoka olye etwa po,” osho a popi ngaaka.

Amushanga gwewawa lyaagundjuka moSwapo, Ephraim Nekongo okwa lombwele oThe Namibian mehuliloshiwike lya piti kutya okwa tega epangelo lyi endelele okutula miilonga omalombwelo ga zi kongundumutima yoSwapo.

“Tse okwa li twa pula ongundu yi kuutumbe yo yi gandje elombwelo kepangelo. Onda nyanyukwa okupopya kutya shoka kwa li twa pula osha gwanithwa po,” osho a popi ngaaka.

Nekongo gumwe gwomaakwaSwapo mboka kwa li ya nyana etokolo lyompangu yopombandalela okutaamba ko oondjokana dhomashenge.

‘NGUNGUMANENI’

Nonande etokolo lya ningwa kOmpangu yoPombandalela otali monika lya fa esindano enene kaaholathani yuukwashikekookantu woludhi lumwe, onkene lya nyanwa noonkondo koyendji.

AakwaSwapo, mwa kwatelwa oshilyo shegumbo lyopashigwana Jerry Ekandjo, okwa li a zi mokalungu e li ompinge netokolo lyompangu yopombandalela.

Ekandjo okwa popi kutya ekotampango lyoshilongo olye shi yeleka kutya uuna taku popiwa oondjokana oongele dhi li pokati kaakiintu naalumentu.

Ekandjo okwa li a gandja oshipopiwa mEgumbo lyoPashigwana ti indile ku kundathanwe opo egumbo lyopashigwana li tinde etokolo kwa li lya ningwa kompangu yopombandalela.

Ashike nando ongaaka, omupresitente gwoSwapo Hage Geingob okwi indile oshigwana shi ngungumane.

Pethimbo ta gandja oshipopiwa she shepatululo lyoshigongi shoka sha ningwa mOlyomkaya, Geingob okwa popi kutya ongundu yoSwapo oya yelitha kutya oondjokana dha taambiwa ko paveta oongele dhi li pokati komukiintu nomulumentu.

“Ongundu yoSwapo opo ya thikama mpoka. Omolwashike wa nyanyukwa okukala omukwaSwapo? Ekotampango lyoshigwana nalyo olye shi yeleka. Olya yelitha kutya ondjokana oongele yi li pokati komulumentu nomukiintu. Ekotampango lyetu olye shi yeleka, kapu na elunduluko,” osho a popi ngaaka.

MPOKA SHA TAMEKELE

Molwashoka oveta moshilongo inayi pitika ehokanitho lyomashenge moNamibia, oyendji ohaya ka hokanena koSouth Africa hoka sha pitikwa.

Etokolo lyompangu yopombandambanda okutaamba ko oondjokana dhomashenge olya ningwa sha hwahwamekwa kaahokanathani yoludhi lumwe paukashikekookantu mboka kwa li ya fala epangelo kompangu taya pula ya taambiwe ko paveta yomatembu okukala moNamibia ngaashi naanaa tashi ningilwa oondjokana dhomukiintu nomulumentu. Mo2017, aahokanathani yoludhi lumwe paukashikekookantu, omuNamibia Johann Potgieter ngoka a hokanwa komuSouth Africa Daniel Digashu, osho wo omuNdowishi gweshenge Anita Seiler-Lilles ngoka a hokana nomuNamibia gweshenge Anette Seiler, oya yi kOmpangu yoPombanda nokupatululila Uuministili wIikwameni nOmatembu oshipotha sho wa tindi okutaamba ko oondjokana dhawo.

Ashike muJanuali omumvo gwa zi ko, Ompangu yoPombanda okwa li ya tindi omaindilo ngoka gopaali opo oondjokana pokati kaPotgieter naDigashu osho wo Seiler-Lilles naSeiler dhi taambiwe ko moNamibia yo ya pewe uuthemba nomauwanawa gaantu ya hokana Aanamibia ngaashi uukwashigwana waNamibia.

Aahokanathani mboka yopaali oya tokola oshipotha shoka yi shi fale kompangu ya shiga ko ano kOmpangu yoPombandambanda yi talulule etindo lyoondjokana dhomashenge moNamibia ndyoka kwa li lya gandjwa kaapanguli yatatu mOmpangu yoPombanda, muJanuali omumvo gwa zi ko.