Namibia
This article was added by the user . TheWorldNews is not responsible for the content of the platform.

Uuwinayi wokudhana okabettinga

Moshilongo ngashingeyi kehe omugundjuka ota popi ‘okabettinga’ ano uudhano wokundombola nenge okumbetsa pakutengeneka moka omuntu ha hogolola mehwata lyomaudhano ga yooloka ngaashi okutengeka iizemo yetanga lyokoompadhi, ethigathano lyoonkambe, osho wo omatengeneko gomaudhano galwe ogendji ga yooloka.

Omumvo gwa zi ko onzonkundaneki ndjika oya kundaneke kombinga yomukalimo gwomoKatutura ngoka ke ena iilonga eshi dhenge komutse sho a sindana oshimaliwa shoomiliyona N$3,7 mokabettinga a longitha owala ooN$4 nokutengeneka omaudhano getanga lyokoompadhi ge li 13, mondjila.

Ashike nando ongaaka nakusindana oshimaliwa shoka otaku hokololwa a kala omudhani gwokabettinga ethimbo nuule.

Okabettinga ohaka dhanwa pamalungula okupitila muusitola wokundombola, pakompiyuta nenge pauhandimwe shampa owala to vulu okuya komalungula.

Uuna omuntu eshi dhenge komutse okutengeneka mondjila oha vulu okuza ko, ashike opo wu shi pondole ompito onene opo yi li wu kale wa hepekela mo oshimaliwa shoye nolundji aadhani yokabettinga oya pikwa, molwashoka ihaya vulu okukala inaaye ka dhana.

Omunelago lela oye ha sindana, noyendji ngashingeyi ohaya vulu okulongitha po iiyemo yawo ngaashi oondjambi nenge nokuli oku ka konga omikuli ya tule mokabettinga nelalakano lyokusindana oshimaliwa tashi gwana moshigandhi.

*Petrus, omulongisikola paithano nokwa li omudhanitanga, a yambukile komukunda tagu ithanwa Biro moshitopolwa shaKavango Uuzilo nokwa hokololele onzonkundani ndjika kutya naye omudhani kamana gwokabettinga ashike inashi mu endela nawa lela molwashoka ngashingeyi okuli moondjo tadhi nyengana okufuta.

Okwa hokolola kutya onkalo oya lundulukile kuuwinayi mo2021, sho a yi moondjo dhoshimaliwa sha konda poN$200 000 ndhoka kwa li a hehela nokwe dhi mbwike mendombolo lyokabettinga.

“Petameko lyokudhana okabettinga okwa li ngaa nda mono mo oshimaliwa. Noshimaliwa oshindji kwa li nda mono poshikando oshooN$76 000,” osho a popi ngaaka.

“Negumbo lyandje ndyoka ndi na omo kwa li nde li landa moshimaliwa shoka. Iimaliwa yilwe okwa li ndeyi landa po iikutu yandje noku ka lala moohotela dhomomudhingoloko gwaRundu naDivundu. Ondihole moohotela nokwiinyanyudha nookuume kandje.”

Petrus okwa hokolola kutya onkalo oya tameke yu uka kuuwinayi muMei 2021, sho a tameke ha tula ondjambi ye ayihe mokabettinga uuna a kwata, nokwa tameke nokuli ha hehela kaapambele, kookume nolwanima okwa tameke okuya kiikondo yokugandja omikuli.

Ashike nando a longitha oshimaliwa oshindji okutala ngele ta sindana opo a vule okushunitha oshimaliwa shaantu, ina pondola sha.
“Kandi shi kutya oshike sha holoka po. Ookompiyuta odha fa owala odho tadhi umbu mo edhina lyandje [opo kaandi sindane],” osho a popi ngaaka.

“Onda tameke ngaa handi sindana ooN$800, omathimbo gamwe ooN$100 uuna nda tula mo oshimaliwa shi li pooN$3 000 nenge N$5 000,” osho a popi ngaaka.

Petrus okuwete okubettinga kwe mu gwilila po.

“Ngame mwene ihandi nu omalovu, ihandi hili omakaya nenge okulamba aakiintu, naashoka oshiwinayi molwashoka shoka kwa li nda sindana mo sha kola inandi shi longitha nande pamwe naapambele yandje, okwa li nde shi li po mokwiinyanyudha nookuume kandje,” osho a popi ngaaka.

“Kanda li ndi shi ngele oshapuka. Ngashingeyi onda yugwa moombale lwiikando iyali kaakwanezimo yandje tandi kambadhala okwiikutha omwenyo omolwohoni ndjoka ndeya sitha,” osho a popi ngaaka.

Mumwayinakadhona gwaPetrus okwa popi kutya aluhe ohaya kala taye mu tonatele molwashoka mongeshingeyi okwa shanga ombapila yelalakano lyokwiimangeleka lwiikando iyali.

“Oshikando shotango, okwa li a thigi ombapila kuunona megumbo, nokwa li twe mu tete mo mongodhi,” osho a popi ngaaka.

“Oshikando oshitiyali [okwa li ningi onkambadhala yokwiidhipaga] pethimbo a li a yi kohondakadhona ye, omanga aantu ya adhika ya kotha. Elago enene oondyoka kutya ohondakadhona ye okwa penduka mo pethimbo [Petrus] a adhika ti itula ongodhi mothingo.”

Aakwanezimo ngashingeyi oya hala a tumwa kezulonkalo opo a hungwe omwenyo, ashike nando ongaaka kayeshi kutya okezulonkalo li ni taye mu fala.

“Kandi shi kutya omolwashike epangelo itaali ningi po sha kombinga yongeshefa ndjoka yokabettinga, molwashoka otayi teya po omagumbo,” osho mumwayina gwaPetrus a popi ngaaka.

ONKALAMWENYO YESIKU KEHE

Omuhingi gwotaxi mOvenduka, ngoka a tseyika nawa nedhina ‘Chippa’ okwa popi kutya ke wete e li kokule nokulya okabettinga oshimaliwa sha kola.

“Limwe lyomomasiku, ondi na okulya eshina, notandi ka thiga po iilonga mbika yoondoongi,” osho a popi ngaaka nomukumo.

Olwaamba nepandaanda lyondunda yokubettinga yedhina JSB Betting moka Chippa a li pethimbo e li moonkundathana nonzonkundaneki ndjika mondolopa yaVenduka okwa popi kutya oku na eitaalo lya kola kutya “otashi vulu okuningwa” a sindane oshimaliwa ta lalakanene okuza mokabettinga.

Pethimbo ndyoka okwa li nokuli lwopotundi 18h00, ethimbo ndyoka aahingi yootaxi haya kala yi ipyakadhila noonkondo molwashoka ndyoka olyo ethimbo ookastoma odhindji tadhi zi komailonga, ashike Chippa okwa popi kutya ye okwa mana iilonga ye yesiku ndyoka.

“Okwa li ndu uvithwa nayi kashona ohela. Onda kanitha oshimaliwa shandje shooN$800 sho kwa li nda mbetse kutya Switzerland ota dhenge Spain mokatanga kokoompadhi. Okwa li nda ningililwa mo kiintsa oyindji ya pewa Switzerland ngele oye a sindana. Ooh etanga lyokoompadhi ndino ne, aaee!

“Ngashingeyi ondi indile omukuli kukuume kandje, hwepo ngaa molwashoka ondi na sha shoka tandi ka shangitha komuhona gwandje ongulohi yonena,” osho a popi ngaaka.

Chippa okwa tameke okudhana okabettinga pethimbo lyocorona sho iiyemo kwa li ya shuna pevi noonkondo, nokwa popi kutya ita thuwa manga inaa mona mo oshimaliwa sha kola.

*Petrus halyo edhina lye lyoshili lya longithwa