عالیہ بھٹ کا مہیش بھٹ سے متعلق انکشاف : فوٹو ویب ڈیسک
ممبئی: بالی ووڈ کی معروف اداکارہ عالیہ بھٹ نے اپنے والد اور نامور بھارتی فلمساز مہیش بھٹ سے متعلق انکشاف کرتے ہوئے کہا ہے کہ ماضی میں وہ شراب نوشی کی لت میں پڑ گئے تھے۔
بھارتی میڈیا کے مطابق عالیہ بھٹ نے اپنے حالیہ انٹرویو میں اپنے والدین مہیش بھٹ اور سونی رازدان کی بالی ووڈ میں جدوجہد اور مالی مشکلات سے متعلق گفتگو کی۔
عالیہ بھٹ نے اپنے والد مہیش بھٹ کے ماضی کے بارے میں بات کرتے ہوئے کہا کہ ‘ماضی میں ایک وقت ایسا آیا جب والد کی کئی فلمیں فلاپ ہوئیں، اس دوران اُنہیں مالی مسائل کا سامنا کرنا پڑا اور ایسے مشکل حالات میں میرے والد کو شراب نوشی کی لت بھی لگ گئی تھی’۔
اداکارہ نے کہا کہ ‘میرے والد نے شراب نوشی کی لت کے خلاف جنگ لڑی اور اپنی اس عادت کو ترک کیا اور پھر میرے والدین نے اس مقام تک پہنچنے کے لیے بہت جدوجہد کی’۔
اُنہوں نے اپنی والدہ سونی رازدان کے کیریئر کے حوالے سے کہا کہ ‘میری والدہ نے اپنے کیریئر کا آغاز بغیر کسی انڈسٹری کنیکشن سے کیا تھا، میری والدہ کو ہندی زبان نہیں آتی تھی لیکن اس کے باوجود اُنہوں نے اپنے خوابوں کے لیے محنت کی’۔
عالیہ بھٹ نے مزید کہا کہ ‘میری والدہ نے اپنی سخت محنت سے ٹیلی ویژن، فلم اور تھیٹر میں اداکاری کے مختلف مواقع حاصل کیے، وہ تھیٹر سے فلم اسٹوڈیوز اور ٹیلی ویژن اسٹوڈیوز آڈیشن کے لیے جاتی تھیں’۔
