Samoa
This article was added by the user . TheWorldNews is not responsible for the content of the platform.

E FAI O LENEI AE O LENA

Sa iai se tina matua e fai ma ia le masani o le alu e asu vai mai i se vaitafe, i taeao uma.  Ua maitau lava e tagata o le nu’u lenei tina matua, e mae’a lea taumafataga o le taeao i totonu o le nu’u, vaaia loa lenei tina matua i luga o le alatele ma lana amoga pakete e lua.  E tofu lava pito o le amo ma le pakete.

O leisi la pakete, ua omo uma leisi itu ma e liki mai ai le vai.  Ae o leisi pakete, e lamolemole lelei lava, e leai se mea o leaga i lona tino atoa.

Ua maitau la e tagata o le nu’u, a savali mai lenei tina matua ua uma ona faatumu ana pakete i vai mai i le vaitafe, e savali lava, ae la e masa’a mai lava i lalo le vai mai i le pakete lea e omo.  Ma ua fiu foi tagata o le nu’u e faasino i le tina lea mea, ae le taitai ona tia’i pe sui e le tina le pakete lea e omo.

O le masani la a le loomatua, e tu’u le pakete omoomo i le pito I tua o lana amo, ae o le pito i luma, e tu’u ai le pakete lamolemole.

Ua lua tausaga, o fai lava e le tina matua lenei galuega o le asu vai i ana pakete nei e lua, e omo leisi e sao mai ai le vai, ae lamolemole lelei leisi, e le masa’a mai ai se vai.

Ua o’o i se tasi o afiafi, a’o nofonofo le tina i luma o lona fale ma matamata I le aga’I ifo o le la I lona nofoaga e masani ai, ae faalogo atu le loomatua, ua fai mai se talanoaga a ana pakete asu vai lea o lo’o tutu mai i leisi itu o le fale.

Fai mai le tala a si pakete ma’omo’omo i le pakete lamolemole, “Se amuia oe, i lou lamolemole, leai se vaega o ou itu tino e omo’omo ae paga ita nei, aso uma e tatou te o ma si loomatua e asu vai, e tatou te o ese mai i le vaitafe, e tutumu uma ta’ua, ae tatou te taunu’u mai i le fale, ua afa le vai ona o lo’u omoomo solo, e na o le masa’a o le vai”.

Na ataata lava le loomatua i tala faamomoi loto a si ana pakete.

O le taeao na soso’o ai, ua fai sina suiga e le loomatua I lana amoga, ua ave le pakete lamolemole i le tu’u i le pito I tua o le amo, ae ua tu’u nei le pakete malepelepe i le pito i luma o lana amo.

Ua alu le savaliga masani a le loomatua ma ana pakete aga’i i le vaitafe. Ua faatutumu uma pekete e lua i vai.  Ua toe tu’u i luga o le amo, e pito i luma le pakete omoomo, ae pito i tua le pakete lamolemole.  Ua fai sina le fiafia o le pakete lamolemole ma le aulelei.

Ae ina ua amata ona toe aga’I atu le loomatua ma ana pakete i lona fale, na lagona e le loomatua le mapuea a si ana pakete omoomo lea e pito i luma ona o lea foi ua amata ona toe masaa i lalo le vai.

A’o savali lava le loomatua, sa ia faapea atu i nai ana pakete, “Vaai i le matagofie o fugalaau i tafatafa o le alatele.  O lo o ua ola lauusiusi ma aulelei tele”.  Na tau fai tepa atu pakete i tafatafa o le auala, e moni lava le tala a le loomatua.  Oka se matagofie o laina o fugalaau o lo’o ola mai ai.  Na faapea atu le loomatua i ana pakete, “E lua tausaga o tatou savalia lenei alatele.  O le lua foi lena o tausaga, o tatou faasusuina nei la’au mai i vai o lo’o masuasua mai ia te oe pakete omoomo”.

“O aso uma e tatou te savali mai ai i luga o le alatele, ou te tago ma tau nei fugalaau matagofie e fai ai teuteuga i luga o le tatou laulau.  Ana le Seanoa le vai o lo’o masa’a mai ia te oe pakete omoomo, semanu e le maua nei fugalaau matagofie,” o le tala lea a le loomatua.

Ioe, e tofutofusia i tatou ma vaivaiga ma tulaga e le atoatoa ai, ae e tofutofusia i tatou ma aoga I lenei olaga tatou te ola ai.

IA MANUIA LE FAAIUGA O LENEI VAIASO!