Samoa
This article was added by the user . TheWorldNews is not responsible for the content of the platform.

E le toe faia suega o le KOVITI mo pasese a le Hawaiian Airlines

Pago Pago - AMERIKA SAMOA

Ua faamaonia mai e le Komiti Faapitoa o loo gafa ma puipuiga o le Faama’i o le KOVITI (Task Force), o le a le toe faia suiga o le KOVITI (swap) mo pasese uma a le vaalele a le Hawaiian Airlines e taunuu mai i le atunu’u.

O le malaga a le Hawaiian Airlines i le po o le aso Tofi o le vaiaso na te’a nei na faamuta aloaia ai loa le toe faia o nei suiga. O le malaga lea ua fuafua e taunu’u mai i le po nanei mai Hawaii, o le a taunuu lava le au malaga, siaki a latou tusi folau, piki a latou uta ma aga’i sa’o atu loa i o latou aiga.

O le isi lea mataupu na mafai ona faailoa e le Faatonusili o le Matagaluega o le Soifua Maloloina, Motusa Tuileama Nua, ina ua fesiligia e le Komiti Tuufaatasi o le Paketi a le Senate ma le Maota o Sui le tupe faasoasoa a lana matagaluega mo le tausaga tupe fou 2023 i le vaiaso na te’a nei. 

Ae na toe faamaonia atili e le afioga i le alii Faipule ia Faimealelei Anthony Fu’e Allen i luma o le Maota o Sui i le vaiaso na te’a nei le mataupu lava lenei. 

I le taimi o le iloiloga o le paketi a le Matagaluega o le Soifua Maloloina, na fesiligia ai e le afioga i le alii faipule ia Faimealelei le susuga a Motusa le mataupu e faatatau i le taofia lea o le toe faia o quarantine pe a taunuu mai pasese mai fafo i totonu o le atunu’u e aofia ai Samoa ma Hawaii.

O le popolega e pei ona saunoa le alii Faipule, o lea o lo o i ai le isi ‘virus’ fou o lo o masalomia le pesi i totonu o le atunu’u, ina ne’i ela le silasila ma taofia le toe faia o nei auaunaga, ae avea ma itu e pesi ai lea ‘virus’ fou ma toe aafia ai le atunu’u i se taimi o i luma.

Sa fesiligia fo’i le tulaga o le fa’aaogaina o se vaega o le malae vaalele mo sauniga o maliu e taunuu mai i le atunu’u. O le popolega e pei ona saunoa le alii Faipule, ua i ai nisi o aiga ua faasea i le faaletonu o le nofoaga e taunuu mai ai a latou maliu, ae o lo o maitauina pea le fa’aaoga o le vaega lea o le malae vaalele pe a taunuu mai tino maliu o nisi e mau tofi i le atunu’u poo le malo. 

Saunoa Motusa e faapea, i faamaumauga a le Soifua Maloloina ma le Falema’i, ua maitauina ai le faaitiitia o le aofa’i o tagata o lo o faamaonia le aafia i le faama’i i aso taitasi, e le gata i le atunuu ae faapea fo’i i pasese e ulufale mai i le teritori.

Na faafetaia e le Sui Fofoga Fetalai ia Fetu Fetui Jr le auaunaga a le Soifua Maloloina, e le gata o le faatautaia o tui puipuia mo Tutuila nei ma Aunu’u ae faapea fo’i i le itumalo o Manu’a. 

Saunoa Fetu e faapea, e i ai lava tagata o lo o faitio peita’i o le itu taua, o lo o faaauau pea le auaunaga ma le tautua masani a le Matagaluega mo le soifua manuia o le atunu’u atoa. 

I le tautua a le Soifua Maloloina i Manu’a, na taua e Fetu le lelei o le Falema’i i le Luanu’u i Ofu ma Olosega ae o loo faaletonu le Falema’i i Tau, e le gata i vailaau ae faapea fo’i i se Foma’i. 

Saunoa atili Fetu e faapea, e taua tele le lelei o le auaunaga a le Soifua Maloloina mo vaega uma o le atunu’u, aua afai e lelei le itu ae faaletonu le auaunaga i le isi itu, o le a avea le itu o loo lape ai le auaunaga ma auala e mapuna a’e ai ni faafitauli e ono sosolo ma pagatia ai le atunu’u atoa. 

Na taua e le afioga i le alii Faipule mai le itumalo o Tuala-uta ia Larry Sanitoa lona faafetaia o le tautua a le Soifua Maloloina ao vavao ai le atunuu i le faama’i. Sa ia taua e faapea, o le isi lea Matagaluega sa tele se vaega tupe fesoasoani mai le feterale na faamanuiaina ai. I lona talitonuga, e taua le folasia o ni ripoti mo le silafia e le Fono Faitulafono ina ia mafai ai ona manino le faaaogaina o nei seleni.

O le totogi o le Foma’i Manu, o le isi lea mataupu na fesiligia i le taimi o le paketi. Saunoa le afioga i le ali’i Faipule ia Vailiuama Steve Leasiolagi, o le isi lenei avanoa faigaluega a le malo e tele tausaga o tau saili se tasi e galue ai, peita’i, e foliga mai e le o tulaga malosi le totogi o lo o totogi ai le Foma’i Manu lea ua maua mai ma galue i le atunu’u i le taimi nei.

O le itu e sili ona lagolagoina ai e Vailiuama le Foma’i Manu lea ua galue nei i Amerika Samoa, e le gata e i ai lona tomai faapitoa i le togafitiina o meaola, ae oo lava fo’i i le auaunaga mo se Fale Fasi manu lea ua leva ona tuli mata’i i ai le silasila a le Ofisa o Faatoaga, ina ia faatuina se Fale Fasi manu e faatau atu ai aano o manu fasi i le atunu’u, ma faaitiitia ai le faalagolago o Amerika Samoa i aano o manu fasi o lo o maua mai i atunu’u i fafo.

Na faamanino e Motusa e faapea, e 2 foma’i manu lea ua i ai nei i Amerika Samoa mo le taimi muamua. O le Foma’i Manu ua tele tausaga o le tautua ma le Foma’i Manu fou e le leva ona faauu ae ua mataina foi lona silafia i le galuega. 

O le Foma’i Manu matua, o se tasi o foma’i ua faamaonia ma aloaia e le malo o Amerika na te faatautaia galuega tau i le tausiga o meaola, ma o lo o galulue soosoo tautua pea Foma’i Manu nei e to’alua ma le Soifua Maloloina, mo le faataunuuina o le moemitiga o le tausia lea o meaola uma i le atunu’u. 

Ua i ai fo’i le isi laasaga ua faalautele o lenei auaunaga, e pei ona galulue ai Foma’i Manu ma Pulenu’u o afioaga taitasi ina ia faaitiitia le faafitauli o ta’ifau tata’a solo, lea ua tele tausaga o avea ma faafitauli i Amerika Samoa. 

O le agaga atoa o lenei polokalame soosoo tau’au ma Pulenu’u, e le gata ia faatonutonu le tulaga o ta’ifau taaloa a ia mafai fo’i ona silafia e le atunu’u le nofoaga e ave i ai ta’ifau mo le faalaloina pe afai ua lamatia ai le soifua maloloina.

O se tasi o fautuaga sa tuuina atu i le taimi o le iloiloga a le Soifua Maloloina, o le faamalosia lea o le tautua a le Ofisa o le Foma’i Manu atoa ai ma fesoasoani mo le au fai lafu manu i le atunu’u. Toatele le au fai lafu manu o lo o moomia tui mo togafitiga mo a latou manu peita’i e i ai taimi e faatamala ai le ofisa ma le mafai ai ona latou maua lea tautua. 

E pei ona silafia e le atunu’u, e le fou le mataupu i le tau sailia o se Foma’i Manu mo Amerika Samoa. I ni nai tausaga e lei mamao atu, sa alia’e mai ai le faafitauli i le Foma’i Manu mai Samoa sa galue mo Amerika Samoa, ina ua fesiligia e le toatele o le aufai lafu manu ona agava’a atoa ai ma lona laisene e mafai ai ona ia faatinoina lenei auaunaga.

O nisi o faasea e aofia ai le sese o tui na faaaoga e togafiti ai manu. Na taua e nisi o le aufai lafu manu ma nisi o le atunu’u e i ai a latou meaola e faapea, e i ai meaola na mamate ona o le malolosi o vailaau ma tui na faaaoga e le Foma’i Manu mai Samoa sa galue mo le atunu’u i lea taimi.

O le manu a’e ai o lenei faafitauli, na aapa mai ai loa ma le Matagaluega o Faatoaga, ( a o latou pulea ma vaaia le Ofisa o le Foma’i Manu), galulue faatasi ai ma le Matagaluega o le Puipuiga o le Saogalemu Faalotoifale, ma latou aveesea loa le oka ma pusa o vailaau sa teu i le nofoaga autu o le Foma’i Manu i Tafuna.

O le tausaga nei na taunuu mai ai i fanua le Foma’i Manu fou mo Amerika Samoa, Dr. Barbara Kahl ma faaauau loa ona latou galulue ma le Soifua Maloloina.

O le Ofisa o le Foma’i Manu sa i lalo o le Matagaluega o Faatoaga a le malo o Amerika Samoa, peita’i i le tausaga e 2020, na tuuina atu ai loa lea ofisa i lalo o le vaavaaiga a le Matagaluega o le Soifua Maloloina e pei ona i ai i le taimi nei.