Samoa
This article was added by the user . TheWorldNews is not responsible for the content of the platform.

Fa’asala e le Fa’amasinoga ali’i fusu nofo vaavaia mo le 24 masina

Pago Pago - AMERIKA SAMOA

O se ali’i fusu a le atunu’u na ioe i le moliaga o lona fa’ao’olima i ni tama laiti se to’alua i se lala laau, ua fa’asalaina e le Fa’amasinoga Maualuga o ia i le 24 masina e nofovaavaaia ai. 633-4281

O le afioga i le Faamasino Lagolago le tumau ia Elvis Patea sa lauina le fa’asalaga o le susuga ia Paofe Iopu Se’eti ae lagolago sua i ai ali’i fa’amasino lagolago ia Muasau T. Tofili ma Paepae Iosefa Faiai i le vaiaso ua te’a.

E tusa ai ma le tagi a le malo ua ma’ea faila i le fa’amasinoga, e fa’apea o se faalavelave na tulai mai i le masina o Me o le tausaga nei na aafia ai ni tamaiti se toalua, 6 ma le 7 tausaga.

Na talosaga le ua molia i le fa’amasinoga mo se avanoa lona lua.

Na fa’afofoga le fa’amasinoga i le saunoaga a Se’eti, ua ia salamo ma o le mea na tupu ua a’oa’oina ai o ia i se lesona tele e fa’atatau i mataupu o lona ita.

“Ou te faamalulu atu i le mea na tupu ma ou te folafola atu e le toe tupu,” o le saunoaga lea a le ua molia i fa’amasino.

Na talosaga le loia a le ua molia i le fa’amasinoga, se susuga ia Marcellus Talaimalo Uiagalelei ina ia iloilo se fa’asalaga fa’anofovaavaaia mo Se’eti, ina ia tusa ai ma le ripoti fa’anofovaavaaia ua tuuina atu i luma o le fa’amasinoga.

“O ia o se tagata lelei, o se tagata galue malosi ma na te tuu atu lona ita e manumalo ai,” o le tala lea a Uiagalelei i le fa’amasinoga. 

Fa’ailoa fo’i e Uiagalelei ua ma’ea ona faia e le ua molia se  faatoesega i le tama matua o i latou na aafia.

Na ioe le loia a le malo ia Angela Drummond i le fautuaga a le ofisa faanofovaavaaia.

Sa ia fa’ailoa fo’i e ui lava ina talavou i latou na a’afia, ae tatau lava ona fa’atoese atu ia i latou.

E tusa ai ma le mataupu a le malo, o le aso 30 o Me 2022 na maua ai e leoleo se valaau mo se fesoasoani e tusa ai o le fanau a lana fanau o A.T ma L.T lea na faaoolima i ai le ua molia i se lala laau.

Na maua e A.T se maosi i tafatafa o lona mata agavale ma mumu ai lona mata ma L.T na manu'a lona tapulima taumatau. Sa fa’atalanoaina fo’i tamaiti laiti uma e to’alua i le latou fale, ina ua mae’a ona talanoa ali’i leoleo ma lo latou tama matua.

Na taua e A.T i leoleo sa latou taaalo i fafo o le fale o Se’eti, ae ee atu le ua molia ia i latou e o ese mai lona fa’apaologa.

Peita’i, sa nonofo ai pea A.T ma lona uso o L.T a’o taufetuli ese atu o la tausoga e to’alua (e laiti fo’i) i le latou fale.

E tusa ai ma fa’amaumauga a le fa’amasinoga, na taua ai e A.T i leoleo e fa’apea, na agai atu Se’eti ia te ia ma lona uso o L.T ma se lala laau ma ta muamua ia L.T ma mulimuli ane sasau atu i le A.T ma lavea ai ona foliga ma oso ai lona mata agavale.

Na fa’amatala e Se’eti i leoleo e fa’apea, e fa’ato’a fo’i atu o ia i le fale mai lana galuega ae ia vaaia A.T ma L.T fa’atasi ai ma isi fanau laiti e to’alua o lo o ta’alo i lona fa’apaologa pito i luma ma tele ai lapisi.

Na taua e Seeti e faapea, sa matua le fiafia lava o ia ma valaau atu ia i latou, peitai, sa tutu atu A.T ma L.T ae sosola ese isi tamaiti laiti e toalua.

Ona ia tago atu lea i se lala laau ma ta i tama laiti. Na toe fa’ailoa e Seeti e fa’apea, e na o le pau lava le mea e mana’o e fa’afefe ai i latou ae sa ita o ia ma i’u ai i le fa’ao’olima.

E 24 masina na fa’asala ai e Patea le ua molia i le toese i lalo o tuutuuga e ao ona ia fa’anofovaavaaia o ia o se tagatanu’u e usita’i i tulafono a le malo, ma ripoti atu i le toese e pei ona fa’atulaga e le fa’amasinoga, ma tu’uina atu i se iloiloga a le Social Services.

E le gata i lea, ua poloaina e Patea le ua molia na te totogiina le salatupe e $1,000 mo moliaga taitasi e lua o le faaoolima, peitai o le $800 na toe tolopo i moliaga taitasi e faatali ai lana amio lelei ma ia totogi le tupe e $400 i totonu o le 60 aso.