Samoa
This article was added by the user . TheWorldNews is not responsible for the content of the platform.

Fa’asala i le toese taulelea molia i le maliu i Taputimu i le 2020

Pago Pago - AMERIKA SAMOA

O taulelea e to’alua na molia i le maliu o se ali’i i Taputimu i le tausaga e 2020, ua fa’asala i le ta’i 7 tausaga i le Falepuipui i Tafuna.

Sa ulua’i tu’uaia Aperaamo Tonia ma Ofisa Malo i le moliaga o le fasioti tagata tulaga lua, ae i se maliliega ma le malo, sa la ioe au i le moliaga fasioti tagata pa’ivalea.

O le vaiaso na te’a nei na tuuina mai ai e le afioga i le alii Faamasino Sili Lagolago ia Fiti Sunia le faasalaga o lenei mataupu.

Na muamua faasalaina Tonia. Na ta‘ua e lana loia fautua, David Vargas, o le solitulafono muamua lea a Tonia ma iu ai i se faalavelave matuia.

Sa ia fa’ailoa fo’i o lē na a’afia o ia lea na fa’aoso i lenei mataupu. I le iloiloina o tulaga ua tula’i mai, na talosaga ai le itu tete’e ina ia fa’anofovaavaaia le ua molia; ma sa ia ioeina lana mea sa fai ma sa ia talosagaina ai le faamasinoga mo se avanoa lona lua mo lenei taulealea. 

E le’i mana’o Tonia e tautala a’o le’i lauina lona fa’asalaga.

Na taua e le afioga i le ali’i fa’amasino ia Sunia e fa’apea, o Tonia ma Malo sa la’ua fa’ao’olima i le ali’i na a’afia, lea na ia po ai le ua molia ina ua uma ona latou talosagaina se tupe.

“E tusa ai ma le faamatalaga a le fomai, o lē na aafia na tigaina le ulu ma le fai‘ai ma gau ponaivi” o le isu, o le fa’amatalaga a lea a Sunia. 

Sa nofovaavaaia le ua molia mo se mataupu tau talavou ina ua tulai mai le faalavelave. Na ia faʻamaeʻaina le nofo vaavaaia ia Iuni 12, 2020 ma o lenei mea na tupu ia Fepuari 17, 2020.

“E na o ni nai masina ona mae’a lea o le nofovaavaaia mo le gaoi. Atonu e leai sana faamaumauga muamua, ae sa i totonu o le faamasinoga.

“O loo finau le itu tete’e e faapea o le tali atu lea i le sasa muamua na maua e le ua molia mai le na aafia.

“O le puipuiga o le tagata lava ia e fua i le mea e talafeagai ma atonu o le tulaga lena, ae na ave e le ua molia le sasau muamua ma taia ai le na aafia.”

Saunoa le ali’i faamasino, o se ola na maumau, o se tagata na sasa na tuu i lalo o le laau i le po pogisa ma o le ua molia ma Malo na toe foi i le fale e aunoa ma le viliina o leoleo poo le 911 mo se fesoasoani.

E 7 tausaga na fa’asala ai Tonia, ma le salatupe e $5,000.

Ae mo le mataupu a Malo, na taua ai e Sunia le tulaga o lenei mataupu, o lo o la fa’atasi ma Tonia ma auai i le fasiga o le ali’i na a’afia.

“E tusa ai ma le ripoti a’o le’i faia le fa’asalaga a le ua molia ma Tonia, ina ua sasa e le na a’afia le vaega o lona mata, na tu’i ai loa e Tonia le ali’i na a’afia na pa’u ma o le itu lea na auai atu ai le ua molia i le tu’i, kiki ma tu’i le na a’afia, o lē na tu‘ua i lalo o le la‘au.”

O le ali’i o Malo, e le’i fa’atagaina ona nofo i Amerika Samoa ma sa i ai o ia i le pemita e 30 aso ua leva ona mae’a a’o le’i tula’i mai le fa’alavelave.

“Na sasa e le ua molia ma le alii o Tonia lenei alii seia oo i lona oti,” o le saunoaga lea a Sunia. 

E 7 tausaga na fa’asala ai fo’i Malo i le toese, ma poloaina na te totogiina le salatupe e $5,000.

Saunoa Sunia e fa’apea, o le fa’atoesega fa’aleaganu’u - po o le ifoga - e tusa ai o lenei mataupu o lo o iloiloina, ae o lo o i ai i le faitalia a le fa’amasinoga.