Samoa
This article was added by the user . TheWorldNews is not responsible for the content of the platform.

Faate’a ni ta’ita’I ofisa e toalua a le LBJ

Pago Pago - AMERIKA SAMOA

Ua taulimaina nei e le Tausitupe (CFO) a le falema’i i Faga’alu, le susuga Falaovaoto Sualevai-Lesa faapea le tamaitai o Dr. Akenese Nikolao mai i le Ofisa o Tagata Faigaluega (HR), ia ni tusi faate’a mai i a la’ua galuega.  

Ma e 10 aso ua tu’uina atu ia i la’ua, e talifuaitau mai ai i tu’uaiga faasaga ia i la’ua, e le Komiti Faafoe a le LBJ, lea ua mafua ai ona faate’a i laua mai i o la tiute i totonu o le LBJ.

E tusa ai ma se ripoti mai i se tasi o totino o le Laulauafono a le Komiti Faafoe a le LBJ, o lo o iai ni faamaoniga, ua mafua ai ona laasia e le Komiti Faafoe lenei laasaga, i le faate’aina o i la’ua ia e toalua.

Sa taumafai le Samoa News e maua mai se faamatalaga mai ia Dr. Nikolao ma le susuga Lesa, ae peitai sa le faamanuiaina.

E pei ona sa ripotia i le masina ua tuanai, e toatolu ni taitai galuega a le LBJ sa livi a’o feagai le Komiti Faafoe ma ni a latou suesuega e faatatau i tulaga tau tupe ma le faafaigaluegaina o tagata i auala e le tusa ai ma le tulafono.

E pei ona sa ta’ua I se faamatalaga faalauaitele mai i le Sui Taitaifono o le Komiti Faafoe, ia Dr. Jean Anderson, sa fa’alauiloa mai ai le faagasolo pea o tiute a le Komiti Faafoe ma le Ofisa Autu a le LBJ ina ia ausia le misiona faatuina a le falemai, ina ia mafai ona tautuaina le mamalu lautele I tulaga o le soifua maloloina.

I lena taimi, e pei ona sa fesiligia ai Dr. Anderson e vaega faasalalau, sa ia ta’ua mai ai, e le i mafai ona faia mai se faamatalaga e tusa ai ma nisi o le aufaigaluega a le LBJ ua livi.  Ae sa fa’aauau pea ona faamautu mai e Dr. Anderson le galulue punouai o le pulega a le LBJ ina ia mafai ona faamautuina se tautua matavela ae o se tautua faamaoni aua le tausia o le soifua maloloina a le atunuu.

O le susuga Lesa sa faafaigaluegaina i le masina o Iuni i le tausaga ua tuanai, i le taimi o avea o ia ma Pule Sili a le Ofisa o Fesootaiga a Amerika Samoa (ASTCA).

O le masina ua tuanai na teena ai e Dr. Anderson ni ripoti e faapea, o lo o taumafai le Komiti Faafoe e faate’a le CFO mai I lana galuega.  I sana imeli I le Samoa News, sa tolaulauina ai e Dr. Anderson le galue malosi o le CFO ina ia ausia le misiona faavae a le falemai aemaise lona galue malosi ina ia fofoina ni faafitauli tau tupe na tulai mai I tausaga ua mavae.

Ae peitai, i lenei masina, ua faaooina atu ai se tusi faate’a a le CFO.

O le masina ua mavae na faamavae ai le susuga Moefaauo Bill Emmsley mai i lona tofiga o le Faatonusili ae filifilia ai e le Komiti Faafoe ia Dr. Ledua Akapusi e avea ma sui Faatonusili.