Samoa
This article was added by the user . TheWorldNews is not responsible for the content of the platform.

FAGOGO - E FAI O LENEI AE O LENA! VAEGA 9

E faafeiloai atu i Ie mamalu o le atunuu i lenei taeao fou.  Talitonu le faamoemoe o lo’o tau fai tutusa uma tatou i le tausiga alofa a lo tatou Silisili Ese.  E faamoemoe foi le agaga o lo’o faamalieina lau faitau I lenei auaunaga vaivai a Le Lali e ala I lenei Fagogo.  Ae soso mai loa I luma o le a toe soso’o atu le tatou tala.

****************

Na me’ia le tamaitai o Tepora I le fesili a Tavita e uiga I le faamatalaga a le alii lotoleaga o Iosefa.  Na ataata Tepora ma faapea atu, “ou te le iloa ia Iosefa po o le a le uiga o lana tala”.   E savavali a la Tepora ma Tavita ae o lo’o mau lava le u’u a Tavita I le lima a Tepora.

Ua faatu le savaliga a Tepora ma Tavita I se fale’aiga ma ina ua o la nonofo a’e I lalo, sa o la toe faasolosolo manatu I mea uma na tupu I lena po, I le polokalama matautia a le tamaitai o Tina lea na I’u lava ina mou faafuase’I ae e le’I uma lelei lana fa’aaliga.

Na faapea atu le tala a Tavita ia Tepora, “E iai lo’u masalosaloga, o lo’o aafia ia le tamaitai o Tina I le maliu o Rasela.  Ona sa fa’aali lava I le afiafi ananei ia lagona  le fiafia o Tina ia Rasela”.

“Ou te faaluaina lou manatu,” o le oso atu lea a Tepora.  “Ae na e faitau I le nusipepa lea sa faamatala mai ai le mea na tupu I le fale o Rasela I le po na maliu ai?”

“E le o ta’ua uma mea sa tutupu,” o le tali filemu lea a Tavita.

“O le a le uiga o lau tala?” o le fesili a Tepora.

Na faamatala atu e Tavita ia Tepora ia le veli na susu I le toto, lea na ufi ai fofoga o Rasela faapea ma le uati sa I taatia I luga o le fatafata o Rasela.  Na faai’u le faamatalaga a Tavita I lona faapea atu, “Afai o se tagata na alu atu e gaoi le ‘Diary’, o le a le mea o le a faaalu ai lona taimi e faaofu Rasela I laei faaipoipo ma tuu faalelei le uati I ona luga, ae le na o na uma lava na fasioti Rasela, tago I le ‘Diary’ ma toe sola ese?  E foliga mai, o taga ia a se tagata o lo’o taumafai e ta’u mai se feau taua I leoleo po o se tagata e masani lelei ia Rasela, e pei o Tina.

Ua nofo Tepora ma faanunumi lona muaulu ma faapea, ‘Sei vagana o se tagata o lo o taumafai e faasese leoleo.  Ae pe aisea na le’I lomia uma ai mea na I totonu o le nusipepa”.

Na faapea lemu mai Tavita, “Atonu o lo’o iai se vaega o lenei paso o lo’o nofo ma le tamaitai o Tina.  E mana’omia ona ta o e saili po o fea na nimo iai Tina.  Afai o ia sa fasiotia Rasela, o lona uiga, o lo’o ia te ia le ‘Diary’”.

“E faafefea la na maua Tina?” o le fesili musumusu atu lea a Tepora.

Na faatosotosololoa le tali a Tavita, “E tasi lava le nofoaga e maua ai le tali, o le fale o Tina”.

“O afea ta te o ai I le fale o Tina,” o le fesili atu lea a Tepora.

“E leai, ou te alu na o a’u.  Afai e moni o Tina lea na fasiotia Tepora, o lona uiga, o le a ia le toe fefe e fasioti se tagata e taumafai e aveese le ‘Diary’ mai ia te ia,” o le tali mai lea a Tavita.

Ae na vave ona oso atu Tepora ma faapea atu, “E leai, e lelei le ta o faatasi aua e mafai ona ou faatalanoaina Tina e uiga i nai ana gaioiga faataulaitu lea e fai, ae alu oe e su’esu’e lona fale.  Ma e mo’I ou te le masani lelei I le fafine, ae ua ia iloaina lo’u tagata e ala I a’u tusitusiga sa faia.”

“Ma ou te iloa, e le oso sona masalosalo pe afai ou te alu I lona fale e ma te talatalanoa atili e tusa ai ma lana polokalame lea sa fai I le po nei,” o le tauanau atu lea a Tepora.

Na vaaia le mimita o Tepora ina ua ioe atu Tavita I lana fuafuaga.  Ma na taape le toalua lea I lena afiafi ma le la fuafuaga ua faataatia, o le asiasi atu I le fale o Tina I le po e soso’o ai.

E FAIA PEA