Samoa
This article was added by the user . TheWorldNews is not responsible for the content of the platform.

Faila e le tina se tagi ona o le fa’aoolima o se faiaoga i lana tama

Pago Pago - AMERIKA SAMOA

Ua faila e se tina se tagi i le Matagaluega o le Puipuiga o le Saogalemu Lautele, ona o le faaoolima lea o se faiaoga i lana tama e 14 tausaga le matua.

Fa’ailoa e lea tina e fa’apea, o lana tama e aoga i le vasega 9, na ta faalua lona lima i se fasi laupapa e se faiaoga.

E lei manao le tamaitai e faailoa lona suafa ona o le fefe ne‘i oo mai ni aafiaga i lana tama i le aoga.

Fa’ailoa e lenei tina i le Samoa News, o le fa’alavelave na tula’i mai i le lua vaiaso talu ai ma e tusa lava po o le a le mea na mafua ai le fa’ao’olima, o le mea moni lava, o lo’u atali’i na fa’ao’olima i ai se faiaoga, i le a’oga, lea e le fa’atagaina ai lea ituaiga o amioga.

Na taumafai le Samoa News i le vaiaso ua te’a ina ua maua lenei lipoti e maua se finagalo o le Fa’atonusili o le Matagaluega o Aoga ia Talauega Dr  Samasoni Asaeli mo ni fa’amatalaga e fa’atatau i le fa’alavelave ae e le’i maua mai lava se tali.

“Ina ua tupu le mea na tulai. mai, na taʻu atu e loʻu atalii i lona Faufautua ma ou te manatu sa tatau ona latou vili mai ia i matou, ae sa tau taumafai loʻu atalii e aumai se telefoni e faafesootai ai aʻu. E matua le taliaina lava lena mea,” o le fa’amatalaga lea a le tina. 

Sa faila foi se tagi i le Matagaluega o Auaunaga Lautele a Tagata ma le Child Protective Services, “ou te manao i le malo e faia se gaioiga faasaga i lenei ituaiga o amioga. E le tatau ona mafatia a tatou fanau ma oo i lenei ituaiga o faalumaina.

“Na manu’a ma fula le lima o si a’u tama,” o lana tala lea i le Samoa News.

Na ta‘ua foi e le tina ua mae‘a ona faia se feiloaiga ma le pule o le aoga e faatatau i lea tulaga, ae ina ua oo atu, sa auai le Sui Pule ma le faiaoga o loo fesiligia i se sauniga.

“O lo’o fa’aalia manino mai ai o le fa’ao’olima o lo’u atali’i e le o se mea e ave i ai le fa’amuamua, e pei lava ua latou talia nei ituaiga amioga a le faia’oga.”

Na faailoa e le tina o le galuega a faiaoga e luitauina ae e le o tuuina atu i soo se faiaoga le aiā e “fasia” ai se tamaitiiti aoga. O lo'o iai fa'atonuga mo le taimi e la'a ese ai tamaiti mai le laina, ina ia fa'atonuina le tamaititi i se faiga talafeagai.