Samoa
This article was added by the user . TheWorldNews is not responsible for the content of the platform.

Faletalavai DoH fesoasoani fa’aitiitia taimi fa’atali i le ER

Pago Pago - AMERIKA SAMOA

I se taumafaiga ina ia faaitiitia le umi o taimi e faatali ai le atunu’u lautele i le “Emergency Room (ER)” i le falema’i LBJ, ua tula’i mai ai fuafuaga a le Matagaluega o le Soifua Maloloina e tatalaina talavai i lona nofoaga i Fagaalu i itula fa’atulagaina. 

Ma o se taumafaiga so’o fa’atasi lenei a le Soifua Maloloina (DoH) ma le LBJ e fesoasoani e fa’amama le tumutumu o le ER - e pei ona saunoa i ai le Pule Sili o le LBJ, Moefaauo Bill Emmsley i le taimi o le feiloaiga ma le ‘au fa’asalalau ma tusitala. Sa i ai fo’i sui sinia o le DoH I lea feiloaiga.

Fa’ailoa e Moefaauo e fa’apea o le potu o le ER ua vaʻaia le faʻatupulaia o le numera o tagata gasegase o loʻo sailia auaunaga faʻafuaseʻi i aso ta’itasi. 

“Ae peitaʻi ua matou iloa e tusa i le 65 pasene o i latou uma e asiasi i le ER ua matou talitonu e le o ni faʻalavelave faʻanatinati ma ia ituaiga o mataupu, matou te talitonu e fetaui ma le matafaioi a le Matagaluega o le Soifua Maloloina,” o le saunoaga lea a Moefaauo. 

Talu ai ona o se tulafono masani mo le LBJ e le mafai ona teena se tasi e sulufa’i atu i le ER,  “o lea na matou talosagaina ai le fesoasoani a le DoH” e tatalaina ni fale talavai e fesoasoani i le ER, ina ia fa’aitiitia le numera o tagata e asia le ER ma fa’apu’upu’u le taimi fa’atali e vaai le foma’i, o se isi fa’amanino lea a Moefa’auo. 

Ina ia malamalama atili le atunu’u i nei fuafuaga fou, o lea na fa’amalamalama ai e Moefa’ao le uiga o mataupu faʻafuaseʻi, faʻalavelave faʻafuaseʻi ma mataupu e le faʻanatinati ma faʻamoemoe o lea faʻamatalaga e mafai ai e tagata lautele ona fuafua po o fea o nofoaga latou te asia.

Fai mai a ia, o le autu o le feiloaiga ma tusitala, o le logoina lea o le mamalu o le atunuu a o lei asia le potu o faalavelave faafuasei ina ia aua ai nei toe alu i tua ma toe faaopoopo atu i lo latou le fiafia o le faatali mo le tele o itula.

Fa’ailoa e Moefa’auo, o lenei mataupu e le o se mea fou, ua leva ona tupu, ae o lo’o galulue le LBJ ma le DoH e foia lenei tulaga ma fesoasoani i le mamalu o le atunu’u. 

Na fa’afetaia e Moefa’auo le Fa’atonusili o le Matagaluega o le Soifua Maloloina Motusa Tuileama Nua, i le tu’uina atu o lona lima i le mataupu lenei, lea e manuia ai le atun’u lautele. 

Na fa’amanino e le Sui Ofisa Sili o Foma’i a le LBJ, Dr Ledua Akapusi le faiga fou lea e fa’amalamalama ai vaega o le gasegase ina ia mafai ai ona fa’amautu pe saili se fesoasoani fa’afoma’i mai le potu ER a le LBJ po’o le fale talavai a le DoH.

O se faʻataʻitaʻiga o le tausiga faʻafuaseʻi o le taimi e te lavea ai le tino ma e te manaʻomia vave fesoasoani faafomaʻi, e mafai ona e valaʻau 911 ona o le faanatinati o le tausiga e te manaʻomia, e pei o le manava manava, poʻo se tasi ua leiloa pe ua manuʻa.

I le mataupu o le, le faʻanatinati, “O tulaga ia e te lagona ai ni suiga i lou tino, ae e te le lagona le ma’i e tatau ai ona e vaai vave i le foma’i,” o le tala lea a Dr. Ledua. 

"O le tausiga faʻanatinati o se tasi e manuʻa pe maʻi ae e te le fefe neʻi e maumau lou ola."

E pei ona fa’alauiloa e le LBJ ma le DoH, o aso ma taimi fa’atulagaina mo faletalavai faapitoa mo le lautele e le o moomia togafitiga fa’anatinati: tatala i le Aso Gafua e oo i le Aso Sa mai le 12 i le aoauli i le itula e 8 i le afiafi. Ma e aofia ai ma aso malolo.