Pago Pago - AMERIKA SAMOA
Ua tuuina mai se fautuaga faamalosi’au mai Foma’i o le Vaega e Puipuiga Faama’i Pipisi i Amerika (Centers for Disease Control) i le atunu’u atoa ina ia faia tui puipui o le KOVITI aemaise lava i le tui lona 3 o le booster ina ia mautinoa ai ua malu puipuia tagata o le atunuu mai le aafia i auga tuga o le faama’i.
O ali’i Foma’i mai le CDC e to’alua ia Dr. Ben Hancock ma Dr. Brostrom, o isi ia o sui o le au malaga a le FEMA lea na taunu’u mai i le 2 vaiaso talu ai ma amata loa le la galuega o le fesoasoani lea i foma’i ma le aufaigaluega a le Matagaluega o le Soifua Maloloina mo le faatautaia o tui puipui mo le atunu’u.
I le fonotaga a le Task Force i le aso Faraile na te’a nei, na taua ai e ali’i Foma’i nei e to’alua le maofa o le vaai i le tulaga ua i ai le tautua a le Soifua Maloloina i le taumafai lea e tete’e atu i le faama’i, atoa ai ma le tali mai o le atunu’u e ala i le faia o tui puipuia.
Sa la taua e faapea, o lea faatoa tau amata le sosolo o le faama’i ae ua leva ona faataoto fuafuaga ma ta’iala a le Soifua Maloloina i vaega eseese o le atunu’u.
Na faamalosi ‘au le alii Foma’i ia Dr. Hancock ma ia fautuaina tagatanu’u uma o Amerika Samoa ina ia fai tui puipuia aemaise lava i le tui o le booster. I lona talitonuga faa foma’i, o le tui lona 3 o le booster e matua tele lona fesoasoani i le puipuia o le tagata mai le aafia i auga ogaoga o le faama’i.
O le faaiuga o le vaiaso na te’a nei na taunu’u ai i le atunu’u le isi au malaga to’atele a le FEMA e aofia ai Foma’i ma tagata e galulue i le Vaega o le Soifua Maloloina, ma ua faamoemoe o le amataga o le vaiaso e mae’a ai la latou faanofoesea, ae ulufale mai loa mo le faatinoina o le latou auaunaga i le atunu’u.
E lata i le to’a 50 le aofa’i o sui e galulue i matata tau soifua maloloina na taunuu mai i le aso Toona’i na te’a nei, ma o lo o faanofoesea i le Fale Talimalo o le Tradewinds hotel mo le 3 aso pe afai e aumai le faaiuga o le suega muamua o lo o malu puipuia i latou mai le faama’i.
O lea au malaga o lo o aofia ai Foma’i, Tausima’i, faapea ai ma i latou e i ai le tomai i tulaga tau Soifua Maloloina, ma ua faamoemoe e galulue i latou uma nei mo le Falema’i o le LBJ.
O le faaiuga lava fo’i o le vaiaso na te’a nei na toe tali atu ai i Hawaii isi sui o le ulua’i au malaga a le FEMA, o alii Inisinia mai le Vaega o le Army Corp, lea na malaga mai e asiasi Falema’i ma nofoaga ua faamoemoe e tausi ma togafiti ai gasegase o le KOVITI.
RIPOTI A LE FEMA
Na taua e le tamaitai ia Allison Pfaendler, o lo o faauluulu i ai le au malaga a le FEMA i le fonotaga a le Task Force i le aso Faraile na te’a nei le tulaga maoa’e ua i ai tapenaga a Amerika Samoa i taumafaiga e tete’e atu ai i le faama’i.
Sa ia taua e faapea, o le tatala ai e le Soifua Maloloina o Falema’i Laiti i tua e pei o Amouli, Tafuna ma Leone, o se auala faigofie lea mo le atunu’u o loo alala ma nonofo i vaega eseese i Sasa’e ma Sisifo mo le aga’i atu i nofoaga eseese nei e faia ai tui puipuia atoa ai ma suega mo le faama’i.
Na faamaonia mai e Pfaendler le mae’a o se latou asiasiga sa faia i nofoaga uma o lo o faaaogaina e le Soifua Maloloina e faatino ai tui puipuia atoa ai ma suega mo le KOVITI, e pei o Fale Taalo a aoga maualuluga, o le nofoaga o le DYWA i Pago Pago ma Tafuna, atoa ai ma Maota o Ekalesia e pei o le Katoliko i Leone ma Iliili, ma ua molimauina ia le ausia o le tulaga e tatau ona i ai lea auaunaga.
O lea asiasiga na faamaonia ai le ausia e nofoaga eseese uma nei o le maualuga ma le malu puipuia e tatau ona i ai nofoaga e faia ai tui puipuia ma suega mo le faama’i.
