Samoa
This article was added by the user . TheWorldNews is not responsible for the content of the platform.

Fesigilia e le TAO le faatauina e le DOH o pupuni fofoga mai i kamupani faamalosi tino

Pago Pago - AMERIKA SAMOA

I le vaitaimi o pepesi le Koviti-19, na faia ai e le Ofisa o le Soifua Maloloina (DOH), se faatauga tele o sapalai falemai, e aofia ai puni fofoga, mai i se kamupani faamalosi tino ma se kamupani meaai, e pei ona ta’ua i totonu o le ripoti a le Ofisa Suetusi a le Teritori (TAO), lea o lo o gafa ma le suesueina o le fa’aaogaina o le silia ma le $14 miliona tupe feterale na maua e le DOH i le vaitaimi o le Koviti-19.

O nei atugaluga fa’aalia e le TAO sa tusitusia ma faamauina i lalo o se vaega o le latou ripoti sa faaulutalaina o “Isi Mataupu”.

I le vaega e 6 o le ripti a le Samoa News e tusa ai ma lenei suesuega, e faapitoa i le ulua’i atugaluga o lo o tusia i lalo o le ulutala “Isi Mataupu”, lea sa fa’aautuina o le Faatauga o Sapalai – Faatautaia o Kamupani sa faia mai ai faatauga. 

Na faamanino e Suetusi a le TAO, i le taimi o pesi le Koviti-19, na faia ai se faatauga o oloa siiatoa, e le DOH, o sapalai falemai (medical supplies), e aofia ai se oka mo puni fofoa, mai i ni kamupani se lua, e le a’afia i pisinisi o faatauga ma le okaina o sapalai.

Na ta’ua e le TAO, i le latou suesuega, sa faamaonia ai le totogia o se kamupani i se tinoitupe e $52,500 ae o lea kamupani, o se kamupani faamalosi tino.  O leisi kamupani na totogia iai le $13,200, o se kamupani e faatau atu mea’ai.

Ae o lo o ta’ua foi i suesuega a le TAO e faapea, e leai se tulaga o fa’ailoa mai ai ia matou suesuega, na iai ni lagona faapito pe tulaga o faatosinaga, i le taimi sa faia ai nei faatauga.

Ae peitai, o lo o taofi le TAO, e le i mulimulita’i le DOH i tulafono o faatauga ma ua faafaigata ai ona faamaonia le tonu le sa’o o a latou faaiuga na faia i ia faatauga.

Ua ta’ua i le ripoti e faapea, e tatau pea i le DOH ona mulimuli i tulafono faavae o le faamaoni ma le le faaituau o le faia o faaiuga.

Na ta’ua foi e le TAO, o le taua o le iloiloina o lenei mataupu, ona o lea e feagai pea le DOH ma le faatauina mai o sapalai e manaomia mo le faatinoina o a latou tiute faatino.  Ma ua taofi Suetusi a le Teritori, afai ae le faamaoni le faatinoina o tiute, o le a avea ma lu’itau i totonu o se ofisa po o se faalapotopotoga.

I se tali mai a le Pulega o le DOH, ua o latou ta’ua ai lo latou auai i manatu fa’aalia a le TAO ma o le a faatulagaina mea uma ua fautuaina ai i latou.  Ma o le a mulimulita’i le DOH i tulafono ua faataatia e le Malo o Amerika Samoa ma le Ofisa o Faatauga.