Samoa
This article was added by the user . TheWorldNews is not responsible for the content of the platform.

Fesiligia e Faipule tulaga tau tupe a le TBAS

Pago Pago - AMERIKA SAMOA

Na toe amataina I le Aso Lulu, Aperila 12 ia iloiloga a le Maota o Sui, ina ua toe ave’esea e le kovana lana tapu lea sa taofia ai ulu o ofisa ma matagaluega a le malo, ona toe auai i iloiloga a le Maota o Sui, ma o lea ua samania ai e Faipule ia le Pulesili a le Faletupe o Amerika Samoa (TBAS), le susuga David Buehler faapea le Komesina o le Faletupe, ia Tuasivi John Marsh.

Ina auai atu Buehler ma Marsh i le Iloiloga a le Komiti o Teugatupe a le Maota o Sui, e aunoa ma ni ripoti i tala o tupe, sa fa’aalia e le susuga i le Faipule ia Larry S. Sanitoa, le tele o ona atugaluga i mea na tutupu i le TBAS i le masina ua tuanai, ae lea e leai ni ripoti.

Na ta’ua e Sanitoa, e ui na te malamalama i le mafuaaga i le leai o se ripoti i le tala o le tupe, ae sa ia faamanino atu ia Buehler, e tusa ai ma tulaga o le tulafono, o ripoti uma i tala o le tupe, e tatau ona fa’aooina atu i le Fono i le uluai vaiaso o masina o Fepuari i tausaga taitasi, i le atoa ai lea o le 128 aso talu ona tapunia le tausaga tau tupe.

Na saunoa foi Sanitoa, talu ai le leai o se inisiua o le faletupe, e tatau i le Faatonusili o le TBAS ona saili se auala e mafai ai ona faamaeaina ripoti o tala o le tupe, i taimi faatulagaina, ina ia mafai ona Iloilo e le Fono Faitulafono.

Na fa’aalia e le susuga I le Faipule lona faanoanoa ona o taimi uma lava e fai ai iloiloga a le komiti o faletupe a le Maota Fono, e leai ni ripoti po o faamaumauga e taulimaina, e faamanino ai le faatinoina o tiute a le faletupe, seia vagana se ripoti tuu gutu mai a le Komesina ma le Faatonusili.

Na ta’ua e Sanitoa e faapea, o se tulaga faapopole loto le leai o nei ripoti, ae ua atoa le 3 masina.  Sa fa’aalia foi e le alii Faipule, o nei mea uma, e toe fo’i mai lava i le Faatonusili ma o le aia tatau a tagata o Amerika Samoa, le Fono Faitulafono ma totino o le malo, le mauaina o ni ripoti i tala o tupe.

 Na fesiligia foi e le alii Faipule ia Buehler, i le tulaga o iai le faletupe i le tausaga tupe 2022.  Na saunoa Buehler, o le ‘book value’ o le TBAS, o iai nei, e $8 miliona.  Ae peitai, e le o iloa le ‘market value’ i le taimi nei.

Sa faatula’i e Sanitoa ia se iloiloga tu’ufaatasi i le 2022, o le Paketi Faaopoopo, lea na faatula’i ai e le afioga Senatoa Togiola Tulafono, le tu’uina atu o se tinoitupe e $5 miliona i le TBAS, a’o avea Togiola ma Taitaifono o Faatonusili a le TBAS.

Sa saunoa ai Togiola i lena vaitaimi, afai ae le faaopoopoina tupe inivesi a le Malo o Amerika Samoa, i totonu o le TBAS, o le a tapunia a le Feterale ia le Faletupe.

Na saunoa ai foi Sanitoa, e lelei pe a fesiligia le afioga i le Senatoa, pe na iai se fesootaiga ma le Komesina a le TBAS, le susuga Tuasivi, ona o lo o fia tagai le Fono I ia faamaumauga, aemaise lava pe afai ua fa’aalia se popolega a le Feterale i le laititi o le tupe i le Faletupe ma le leai o se inisiua.

Na fesili le susuga i le alii Faipule po o iai se taimi faatulagaina ua tu’uina mai e le ‘Federal Reserve’ e tatau ai ona toe tului se tupe faaopoopo i totonu o le faletupe, ina ia le tapunia ai.

Na tali Komesina Tuasivi, o ia o lo o galue faatasi ma le faletupe Feterale i taimi uma, ma o lo o nofo malamalama le Feterale, e manaomia se faletupe i totonu o le teritori.  E le otomeki ona latou tapunia le faletupe, ona e leai seisi faletupe.  Ma se’i iloga lava e iai ni mataupu matuia e ono tula’i mai, ona iloa lea ua tapunia le faletupe.

Na saunoa Tuasivi, o lo o maua polofiti a le faletupe.  Ma na ia ta’ua foi e faapea, ua maea ona faataunuuina e le Faatonusili se suega tau tupe aitalafu ma ua faamaonia ai le malosi o le tulaga o iai le faletupe i le taimi nei.

Na saunoa Tuasivi, o le TBAS, e le pei o faletupe i Amerika – o lo o faatatau lana saunoa i le tapunia o le faletupe ale Silicon Valley, I le masina ua tuanai.

Na ta’ua foi e Tuasivi, o le tupe foi, o lo o tumau I totonu o Amerika Samoa, e le o aveina atu i Amerika.  Na ia saunoa foi, o le faitauga aofai o tagata o Amerika Samoa, e le toesea pe faaopoopo, ma o le mafuaaga lea e tumau ai pea tupe i totonu o le teritori.