Samoa
This article was added by the user . TheWorldNews is not responsible for the content of the platform.

HARRY EUGENE MAXWELL SR. - VETERENI US MARINE FAAIPOIPO I LE TAMAITAI SAMOA

Pago Pago - AMERIKA SAMOA

Ua fa’ia nei le lupe sa tulima, sa fai ma va’aiga i le aiga Samoa i Hawaii, o se tasi sa latou fa’aeaea i ai ona o le tautua, e le gata nao lana fanau ma aiga, ae sa aoga i nisi o alo o Amerika Samoa sa latou taumafai e soo le fau ma le fau i Honolulu, ma ua mataina fo’i le latou tula’i mai e toe fa’afo’i se sao lelei mo le atunuu pele. O le aso tuana’i ai o le aso fa’apitoa mo Vetereni i lenei Tausaga, ua tu’ua ai e Harry Eugene Maxwell Sr. ma fanau ma aiga.

Pe afai e fua fa’atatau le aoga o le tagata i le mafutaga ma faia fa’alavelave fa’asamoa, e matua sili lona tau i penina i le aiga Samoa. 

O le ali’i Vetereni mai le Maligi Koa, ua ia talatala, le matagofie o le tautua, aua o le upu fa’alavelave, o se upu malosi tele, e le mafaia e le vaega au ona tatala ona fa’amau, mai le aganuu fetausia’i a le Samoa moni.

O Harry Eugene Maxwell Sr. sa fa’aipoipo ma le tamaitai Samoa mai Pavaiai, Faleniu ma Mutiatele i Aleipata Samoa, Manuosefusi Tina Atoe Moe. 

Ua fa’apena fo’i ona matua manino lelei le ata o le ‘Fa’alavelave’ i le agaga tautua o lea sui faiava i le aiga o le tamaitai o Manuosefusi Tina, o se tamaitai Samoa e tofu fo’i itu tetele i aiga na soifua a’e ai i Pavaiai, Mapusagafou ma Faleniu i Amerika Samoa nei, ae maise ai o Mutiatele, Aleipata i Upolu sa afua mai ai ona gafa.

O le tautua a Maxwell i le vaega au na mafua ai ona tautua i Hawaii, ma fetaui ai ma lana tausala Samoa, peita’i e le’i faigofie fo’i le tau amata mai o le aiga, e to’afitu le fanau sa la’ua tausia  ma fa’afailele mai a’o nonofo ai i Camp 4. Ua manino ma malamalama le to’atele i lea nofoaga, e pei lava ua ola a’e i nofoaga e lauiloa i le tele o mea e tutupu ai i le soifua tuputupu a’e o le fanau, e to’afa tama ma tamatai e to’atolu.

O i latou uma sa auai i le Ekalesia a Iesu Keriso o le Au Paia o Aso e Gata Ai, peita’i o le amataga mai o le soifuaga o Manuolefusi ma lona aiga o le Ekalesia LMS.

Ua ia talatala se mea o mausali ia te ia, “Ou te iloa lelei lava uiga o le tina o le aiga, pe afai ua i ai se faalavelave ua fa’apogaia ai se tala’ave mai aiga i Samoa. O le tala masani e fa’amua ai se talanoaga, “‘E maua se tupe?’ ma e tali lava i le ata, ma le Ioe.”

Sa i ai se taimi na asiasi mai ai Maxwell i aiga iinei, Amerika Samoa, ma ua ia fa’amatala ma le ata, tala e fa’alogo ai i le taimi o le vevesi ma le pisi i se fa’alavelave, mai tina o lona aiga Samoa.

“E va’ai atu le Palagi, fai atu e sau e nofo i lalo.” Leiloa e tina ua mae’a aoaoina ia te a’u upusa uma lava fa’asamoa, ma e le tau faia e a’u se tala i so’o se tasi, e faia uma lava e la’u manamea le tala i lena tulaga, pau le mea e fai a le Palagi o le matamata ma le fa’alogo pe vala’au mai lo’u igoa.”

Ua toe fa’amatala nei, ae o taimi o ola mai ai i nei lu’iga, e i ai taimi ou te talatalanoa ai ia Tina, “Aisea lava e le vala’auina ai lou igoa, ae pau lava le igoa lea e fa’alogo ai o’u taliga, o le Palagi?”

O le tali a le tina o le aiga, “E soia e te manatu o leaga latou tala lae fai, ou te mimita pe a vala’au oe o le Palagi, aua e afakasi la’u fanau, e le maua fo’i e le vaega le la e faitala, se palagi pei o a’u. Matua fa’afiafiaina fo’i a’u i le tali, ma ua mafua ai, ona ou le toe anoanoa ni tala o faia ia te a’u, ou te le malamalama ai.”

“O le ma’ua mafutaga e tutusa uma lava ma isi mafutaga uma, e i ai taimi o le leleiga ma e i ai fo’i taimi o lu’iga, ae o le auga na ou amatalia ai lou aiga, ina ia mafai ona soo le fau ma le fau i le mafutaga. O se fa’ailoga o se so’otaga e le gata ia i ma’ua lava ma la’u manamea, ua moe mai i ti’asa, ae o se mafutaga ma lona aiga atoa, ua avea ma lo’u aiga i Samoa, fa’atasi ai ma se mafutaga soofa’atasi o ni aganu’u e lua. Ou te matua fiafia, sa avea lava a’u ma se tama e tausisi i le feagaiga o le ma’ua mafutaga i le alofa ma le fa’amaoni se’ia oo i le oti.”

“Ou te fiafia tele ma ou va’aia le fiafia o Tina i siva ma fa’afiafiaga, o ia e lalamua i le faiga o taga malie ma malomaloa lana sausaunoa i fa’afiafiaga a tamaitai o le Ekalesia. Manatu lava a’u, o le ala lea o lona suafa muamua “Manuosefusi” mai lona aiga Sa Atoe Moe, Aiga Sa Tuitogamaatoe mai Mutiatele i Aleipata.”

“O se tina e tausi fanau, ae matua fulufulu lele pe a tau pa’ia se tasi o le fanau mai nisi uma lava i Camp 4, ma ua masani ai le fanau, e tatau ona iloa lelei e le latou tina so’o se mea na mafua ai se vevesi ma tau a’afia ai i latou. Ua ou vaaia le itu mata’utia lea o tina Samoa.” O se tala ata lea a ali’i Vetereni.

I se tala mai o lana tautua e 11 tausaga na tautua ai i le Maligi Koa ma e ulufale atu i totonu i le vaitau o le vevesi i le taua i Viet Nam. 

O lona uia mai o Hawaii ina ia tiute ai, ae la’ua fetaui ai ma lana tausalai le Yuki’s Bar i Kahuku, Honolulu lea sa faigaluega ai Manuosefusi Tina Atoe Moe.

Na soifua a’e Maxwell i ona matua o Harry Reid Maxwell ma Cecil Merchant Maxwell i Paris Kentucky, Iulai 23, 1934, ma ua atoa nei le 87 o ona tausaga ao soifua pea o ia. 

Na fa’aipoipo Harry Eugene ma Manuosefusi Tina Maxwell ia Iuni 06, 1974. O lana tautua i le USMarines na amata ia Tesema 28, 1961 ae na fa’ai’uina ua litaea lelei i le 11 ai o tausaga o tautua.

Ina ua Harry Maxwell litaea mai le Vaega Au, sa avea loa ma Faiaoga o le Basketball i le Bringham Young University i Hawaii ma fa’amautu ai lava lo la’ua aiga. O iina sa tele ai lana tautua i nisi o alo o Samoa sa ia fa’aulufaleina i le Iunivesite ma a’oa’oina fa’apitoa i le fa’agatama o le Basketball.

O le to’atele ia o alo o Samoa sa lauiloa a latou taumafaiga i ta’aloga i lena vaitaimi i Hawaii ona o le sao o lea fo’i tama i lona faufautua ma una’ia malosi fanau a Samoa ia ausia e i latou ni soifuaga manuia.

Peita’i ina ua matutua uma le fanau e to’afitu a i la’ua ma Manuosefusi Tina Maxwell, ua tu’ua fo’i le mafutaga ma le tina e ala i le oti, ona faia lea o le filifiliga a le tama ina ia nofo i le nofoaga fa’apitoa mo tagata matutua e tausia lelei ai o ia, ae tuu si ana fanau e fa’aauau o latou mafutaga fa’aleaiga.

“Ua mae’a le tausiga a le fanau ia te a’u, ua ou malie atoatoa i ai, peita’i e tele le toto Samoa o le fanau, sa le manatu ina ia ou alu e nofo i lea nofoaga ona o le manatu i le auau o le latou tina ia te a’u. Peita’i o a’u o le Palagi, e le’i avea a’u ma se mea e poloka ai fuafuaga e tatau ona faia e le fanau aua le lumana’i o nai fanauiti e auau i ai lo’u alofa. Ou te mana’o ina ia faia a latou fa’aiuga tatau mo latou aiga, o ma’ua ma la’u pele, ua folau i lagima, ua ou matua fo’i, e tatau ona suia fo’i la’u va’ai i le olaga.”

Na ata le ali’i ma ia fa’apea, “Ae ou te tatalo pea mo se manuia mai le Atua mo la’u fanau i taimi uma.”

I lona nofo ai i le nofoaga e tausia lelei ai tama ma tina matutua i Lanakila Honolulu Hawaii, na toe fetaui ai i la’ua ma le tina aulelei o Connie Ganal o Kaneohe, ua toe manatu i la’ua e amata le la’ua mafutaga fou i le la’ua fale ua i ai nei i Ewa Beach, Honolulu Hawaii.

O nisi o manuia ua ala mai mo Samoa e afua mai lenei tama matua, ua fa’aauau lea i tautua a le fanau na soifua mai ia te’i la’ua ma Manuosefusi Tina Tuitogamaatoe Moe. 

O le to’afitu o le fanau ua nonofo nisi i Hawaii e faalatalata pea lava i le tama ina ia mautinoa o tausia lelei, o se mea lea sa fa’ailoa e Harry Maxwell, e ese ai lona iloa i olaga o fanau a Samoa mai isi atunuu e pei o ia o se palagi, “E tele na’ua le mafanafana o le alofa ma e asiasi mai i taimi uma, tusa lava pe ua i ai le isi tina ua ma’ua mafuta. E le o avea le naunau alofa ia i latou mai ia te a’u. O lea ua tausia fa’atasi i ma’ua ma Connie e i latou, poo le a lava se mea ma te manana’o ai, e faia lava.”

O le ulumatua o le fanau o Dean Mimita Sotoa Maxwell e alaala ma lona aiga i Washington. O Molly Elizabeth Maxwell ua fa’aipoipo ia David Stribling o le USMarines, lea o alaala i Hawaii. O le tamaitai o Florence Manuosefusi ua fa’aipoipo ia Samuel Johnson ma e toatolu o la’ua alo: O le ulumatua  Paris Johnson lea e Star nei i le tele o au Basketball a tamaitai USA ma ua soo fo’i ana ta’amilosaga e ta’alo fa’atauva ai i malo eseese o le lalolagi. I le taimi nei o lo’o avea o ia ma faia’oga o le Rainbow Wahine Womens Basketball i UH talu mai le tausaga 2019.

O lea alo tamaitai ua maea fa’asolo ana ta’aloga fa’atauva mo le lima tausaga i atunuu eseese o le lalolagi e aofia ai Ausetalia, Polani, Spain, Kuwait ma Alapi. O se tasi o alo o si ana fanau e fiafia Harry Sr e maimoa i ana ta’aloga aua o le ala lea sa ia a’otauina ai nisi e to’atele o fa’atauva i le Basketball i lona foi vaitau a’o tautua i lea lava tofi i le BYU.

O Harry Jr. Maxwell sa fa’aipoipo o ia ma Sarah Duratny, ma ua maliu o ia ae ua nofo pea le ali’i afakasi ma tausia nai ona alo e to’a tolu ma lona afafine e to’atasi o Olivia. Ua ese mai lea ua tausia e ia ma si ona uso ma’i o William Philip Maxwell, o le lona ono o le fanau.

O le lona lima ole fanau o Yeshua Manona Ralph o ia lea sa malaga mai i le Fa’asamoa Initiative a le alo lauiloa o Samoa - Troy Polamalu ma le faletua ia Theodora Polamalu ia Iulai 2015. Na toe taliu mai ina ia toe faafo’i mai se tomai ua latou maua talu ona tu’ua le atunuu ma ola tausaili ai i atunuu i fafo, e fesoasoani i fanau o a taeao a Amerika Samoa. O le fa’agatama sa latou aoaoina lelei, o le Volleyball.

Sa tautua fo’i o ia ma atoa lelei le 20 + tausaga o lana tautua i le USMarine Corp. O le to’atele o tatou Vetereni o lo’o soifua pea ma fa’aauau mafutaga ma aiga iinei sa faia ma va’aiga i lea alo i lona amata ai o lana tautua i le Maligi Koa. O se tasi ua so’otaga lelei tautua ma Yeshua Maxwell o le susuga Tusi Suiaunoa mai Nua ma Seetaga ma lona uso o Navy Suiaunoa i Futiga.

Fa’aipoipo Yeshua Mamona Ralph Maxwell ma Cammy May Jannsens o Michigan ma o lo’o fa’aauau pea lea mafutaga mafana ua atoa le 34 tausaga ma e to’atolu o la’ua alo: Joshua Nicholas, Joseph Mathew ma Jasmine Marie le alo tamaitai. O lo’o alaala tumau pea uma le fanau e fa’alatalata i lo latou tina i Independence, Missouri peita’i o Yeshua Maxwell ua toe taliu mai i Hawaii e faatino nisi o ana sailiga maumaututu e fia malamalama a’ia’i ma tusia lelei ona gafa o lona tupuaga mai Samoa, Amerika Samoa ma Hawaii. 

O le ui’i o le fanau o Mahala Cecil o lo’o ua fa’aipoipo fo’i ma lana manamea ma ua to’atolu fo’i lana fanau.

Ina ua fesiligia Maxwell i se tala mai a ona matua, ina ua fa’aipoipo i se tamaitai Samoa, sa ia fa’ailoa mai, “Oi o le pele i lo’u tina si a’u manamea, e fiafia tele o i la’ua i le ola fa’atasi ane o le ma’ua fanau, ma e mafanafana le mafutaga ma le tina.”

“E ola fa’aaloalo aua e lelei le fa’atonuga o i latou. E fiafia tele i la’ua e asiasi mai i Hawaii mo la’ua tafaoga, ma a omai fo’i e fiafia tele i le ma’ua fanau. Peita’i e le’i i ai se avanoa ia i ma’ua e avatu ai i la’ua e tafafao i Samoa. Ua musu fo’i a’u ina ia tele se isi faalavelave.” O lana tala lea ma le leo tele.

“Atonu ua muamua le tina, ae ou te iloa ua matua fo’i a’u, o le ala lava lea e i’u i ai mafutaga uma, ae ou te fa’afetai ua ou molimauina nisi o galuega ua mafai ona faia e le fanau mo Samoa, atonu o se amataga lea o latou tautua, ae i ai se taimi e fa’ateleina ai e nisi o fanau a fanau pe a misia mai le fanau.”

“Peita’i i la’u galuega o le faia’oga i le fanau aoga i le Ta’aloga basketball, o lo’u lea sao i ni soifuaga o lo ua ola ai nei nisi o alo o Samoa i mea ua alaala tumau ai, ae maise lava i Utah ma Kalefonia i nisi.”

Sa ia fa’afetaia le avanoa e fa’asalalauina ai lenei tala i lona soifua tautua, e le tatou nusipepa nei, lea e fiafia lava e faitau ai i laina feso’ota’i fa’ainiteneti i taeao ta’itasi.

O toe sauniga o le tama Vetereni o le a fa’atautaia lea ia Tesema 22, 2022 i le Hawaiian Memorial Park Cemetery, 45-425 Kamehameha Hwy, Kaneohe, HI 96744 mai le itula e 9:30 i le taeao se’ia oo i le itula e 1:00 i le aoauli.

Ua fa’ailoa mai o le a auai uma sauniga mamalu e faatino mo soo se fitafita sa tautua i le vaega au mo ona sauniga uma. Fa’afetai mo lau tautua, aua o fua o au galuega e mulimuli mai lea ia te oe!