Samoa
This article was added by the user . TheWorldNews is not responsible for the content of the platform.

Molia ia Lafaele Aunoa, faia uiga mataga i se teine talavou 17 tausaga

Pago Pago - AMERIKA SAMOA

O le po o le aso 17 o Fepuari, 2023 na savali atu ai se fafine i totonu o le Ofisa o Leoleo i Tafuna ma tu’uaia ai le faia o uiga mataga i lona afafine e se ali’i e suafa ia Lafaele Aunoa. E fa aso mulimuli ane, na faatalanoaina ai e leoleo le na aafia. 

Na ta’ua e le tama’ita’i na a’afia i leoleo, sa la feiloa’i ma le ua molia i le malae pesipolo, lea sa avea uma ai le ua masalomia ma na a’afia ma faiaoga lagolago i le au peisipolo a Dodgerette. I le aso 13 o Fepuari, 2023, na taua ai e le tama’ita’i na a’afia e fa’apea, sa fai atu le ua molia ia te ia, ma i lona le mana’o e fa’atiga ona lagona, na malie ai loa le teineititi e fai se la tafaoga ma le ua molia.

O le po lava lea na toe fa’aopoopo ai e le ua molia o ia i luga o le “Instagram” ma sa ia talia lana talosaga e mulimuli ai, ona fesili atu lea o le na a’afia i le ua molia pe fia ona tausaga, ae tali mai e 20. Fa’ailoa e le teineitiiti e 17 ona tausaga. 

Na ta’ua e le tama’ita’i na a’afia, sa vave ona ia polokaina o ia ona sa ia iloa ua matua tele o ia mo ia.

Ia Fepuari 15, 2023, i le taimi o le taaloga pesipolo i le malae pesipolo i Tafuna, na faailo ai e le ua molia le na aafia e feiloai i totonu o le faletaele o loo i ai fale taele.

Na taua e le teineititi na aafia e faapea, sa ia agai atu i le faletaele ma tilotilo solo, ma o le taimi lena na tago atu ai le ua molia i lona lima ma toso atu o ia i totonu o le faletaele muamua, ona ia pipii ai lea o ia i le puipui, ma oomi lona lima i luga o lona gutu ma fai atu ia te ia “ salapu".

Ona toe taumafai ai lea o le ua molia e faamalosia le teine talavoue e faia se faigaaiga le talafeagai ia te ia, ae fai mai le na aafia, “leai”. Ona tago atu lea o le ua molia i lona ulu, toso i luga ma fafao lona ulu i le puipui.

A o taumafai o ia e faia ni uiga mataga ia te ia, sa taua ai e le na a’afia lona malo ma ua tepa a’e i luga o le taualuga, ona ia lagona ai lea o le la’a i tua o le ua molia, ma totoe ai loa le avanoa mo ia e vave alu atu ai i fafo o le fale ta’ele. Na tamo’e mai le ua afaina i fafo o le fale ta’ele.

Ina ua alu ese atu le tama’ita’i na a’afia mai le vaega o le faleta’ele, sa ia vaaia ai le ta’avale a lona tina ma tamo’e fa’avave atu loa ma oso i totonu o le ta’avale. A o saofai o ia i totonu o le ta’avale, sa ia vaaia ai le ua molia o sau i fafo mai le faleta’ele e su’e o ia.

O le aso 17 o Fepuari, 2023, i le itula e 11:28 i le po sa fesiligia ai e leoleo le ua molia. Na fa’amaonia e le ua molia le mea na ta’u atu e le na a’afia i leoleo e uiga i le mea na tupu ia Fep 15, 2023 i le 4:47pm. Peitaʻi, na ia faamatalaina le mea na tupu o se “tafafao” ma e i ai le eseese o lana fa’amatalaga i leoleo ma le tala a le teine talavou na aafia. 

O le aso Faraile, Iuni 2, 2023 na tula’i ai Aunoa i luma o le fa’amasinoga, lea o lo o tu’uaia ai o ia i moliaga mamafa e 4 – e tasi le moliaga o le fa’atupu vevesi i nofoaga faitele i le tulaga muamua, tasi le moliaga mamafa o le faasotoma, tasi le moliaga o le taofiofia o solitulafono mamafa ma le solitulafono mama. e lamatia ai le soifua manuia o se tamaitiiti.

E $20,000 lea ua fa’atulaga e tatala ai i tua.