Samoa
This article was added by the user . TheWorldNews is not responsible for the content of the platform.

Molia ia Tanielu Tuli fa’atupu vevesi i Kokoland - fa’aleaga taavale tolu

Ads by Google Ads by Google

Pago Pago - AMERIKA SAMOA

O le aso 30 o Me, 2023, na maua ai e le Ofisa o Leoleo i Tafuna le telefoni mai ia Talolo Petelo, lea ua fa’ailoa mai o ia na a’afia i se fa’alavelave lea na la vevesi ai ma lona uso o Tanielu Tuli i le po na te’a ma fa’aleagaina ai e lona uso ta’avale e 3 e ala i le talepeina o faamalama.

Na tali atu leoleo i le fa’alavelave i Kokoland na taunu’u atu i lea nofoaga i le aso lava lea o le taeao, ma latou feiloa’i ai ma le ali’i na a’afia. Na taua e le na a’afia e fa’apea, o lo o savali solo lona uso i luma o le faleoloa o le TSM i Tafuna, ma taumafai ai loa le ali’i na a’afia e fa’afesoota’i le vaega lea ae le’i manuia le mauaina o le ua molia.

E tusa ai ma le faamatalaga a Petelo, o le po ua mavae sa latou inupia ai ma ni isi o ana uo ma aumai ai i latou i lona fale ma ia faailoa atu ai i lona uso o Tuli. E le’i fiafia Tuli i le aumaia e Petelo o ana uo ma liliu i tua ma tae’i faamalama o taavale e tolu ma isi mea e le iloa.

Na taua e le na a’afia, ona ia ee atu lea i lona uso, ma na toe tali atu le uso i le ‘e’e atu i upu masoa ma alu ese ai loa ma le fale. Ina ua toe fo’i atu le uso i le fale, na fa’ailoa atu e le na a’afia ia te ia, e fa’asa ona toe fo’i, ma toe amata ai loa le isi misa a’o ‘e’e atu i upu masoa, ma taua ai e le na a’afia lona popole ina ne’i faaoolima Tuli ia te ia.

O le afiafi lava lea, na maua ai e le ofisa o leoleo i Tafuna se telefoni mai ia Petelo, o lo’o ta’u mai ai ua toe fo’i lona uso i lona aiga ma ua ‘e’e atu i upu masoa ma misa ma ia. Ina ua taunu’u atu leoleo na tali atu, sa latou feiloa’i ma Petelo, o lo o i ai i totonu o le fale ina ua taunu’u atu, ma ia fa’ailoa ai o lona uso o Tuli o lo o masalomia. Na aga’i atu loa Leoleo e tu’u le ua molia i lima ma ave i le TPS mo nisi su’esu’ega.

O Tuli na taofia ma auina atu i le Falepuipui i Tafuna ma na tulai i luma o le fa’amasinoga i le aso 2 o Iuni. O lo’o molia o ia i le moliaga mamafa e tasi o le faatupu vevesi i nofoaga faitele. E $300 lea ua faatulaga e tatala ai i tua.