Samoa
This article was added by the user . TheWorldNews is not responsible for the content of the platform.

Molia se alii i le umia o fualaau faasaina ma le solitulafono i luga o le alatele

Pago Pago - AMERIKA SAMOA

Ua toe molia i ni solitulafono mamafa se alii o loo nofovaavaaia mo le 5 tausaga ina ua nofosala i lona umia faasolitulafono o fualaau faasaina i le 3 tausaga talu ai, ina ua taofia e Leoleo lana ta’avale i le le usitaia o tulafono i luga o le alatele i le masina na te’a nei, ae maua ai vaega o fualaau faasaina.

E pei ona taua e le malo i le latou tagi e fa’apea, o le afiafi o le aso 5 o Oketopa pe tusa o le 8:20 i le afiafi na taofi ai e Leoleo sa tiute i luga o le alatele i Tafuna se pikiapu na aga’i atu i luga o le alatele ona ua mae’a le aoga o le laisene ae o lo o fealua’i pea lava i luga o le alatele lea pikiapu.

A o le i aga’i Leoleo e faatalatalanoa le ave ta’avale, na faia muamua fesootaiga ma le latou Ofisa autu mo faamaumauga o le ta’avale, lea na faamaonia ai, o le taavale pikiapu lea ua taofia na mae’a le aoga o le laisene i le 2 tausaga talu ai. Lona uiga, ua le o toe talafeagai le fealua’i i luga o le alatele a le malo.

Na siaki e Leoleo le ta’avale ma iloa ai, e to’alua ali’i o loo i totonu o le ta’avale. O le ave ta’avale, o ia lea o Semisi Onesemo, lea o loo ua molia i lenei mataupu, ma lana uo sa nofo i le nofoa o le pasese, le susuga a Vesi Tufuga.

E leai se laisene ave ta’avale a Onesemo na umia i le taimi na fesiligia ai o ia e Leoleo. Sa ia faailoa i Leoleo, o loo galo lona laisene ave ta’avale i le fale. E oo lava fo’i i se isi lava ituaiga pepa e faamaonia ai o ia, e leai ma se mea sa maua i le taimi na fesiligia ai o ia e Leoleo.

Na faailoa e Leoleo ia Onesemo le mafua’aga ua taofia ai lana ta’avale i luga o le alatele, ona ua mae’a le aoga o le pepa lesitala o loo i ai i le 3 tausaga talu ai. Na finau Onesemo i Leoleo ma ia faailoa i ai, o le masina o Me o le tausaga na te’a nei na toe faafou ai le laisene o lana ta’avale, i lona talitonuga la o lo o i ai, o loo lelei le pepa lesitala o le ta’avale. 

A o talanoa Leoleo ma Onesemo na vaaia e le isi ali’i Leoleo le ali’i o loo nofo i le nofoa a le pasese, le susuga a Tufuga o loo minoi solo ona lima e foliga mai o loo taumafai e nana se mea i lalo o le nofoa o le ta’avale. 

Na vave gaioiga a Leoleo ma taofia ai loa le susuga ai Tufuga i lalo o le vaavaaiga a Leoleo mo se taimi le tumau, a o faaauau pea talanoaga ma le susuga a Onesemo. Na malie Onesemo i le polokalame a Leoleo, o le a auina atu i laua ma Tufuga i le Ofisa o Leoleo i Tafuna mo suesuega, o le a taofia fo’i lana ta’avale i lalo o le vaavaaiga a Leoleo, se’i vagana ua mae’a ona toe faafou le pepa lesitala ona toe tatala lea i tua o le ta’avale. 

 A o lei auina atu Onesemo ma Tufuga i le Ofisa o Leoleo i Tafuna, na muamua faia se suega i o la tino mo ni aupega poo ni fualaau fa’asaina. E leai ni fualaau faasaina na maua ia Tufuga, se’i vagana ai Onesemo na maua ai e Leoleo ni pepa iila laiti se 3 o lo o i ai vaega o le pauta faasaina o le aisa. 

Na auai Onesemo i le taimi na su’e ai e Leoleo lana ta’avale. I lea suega sa faia, na maua ai e Leoleo fualaau fa’asaina. Na maua e Leoleo  lalo o le nofoa o le ave ta’avale se tama’i ato uliuli o lo o i ai straws e 2 ua uma ona tatipi tulimanu, o loo i ai vaega o le pauta fa’asaina o le aisa. 

O le taimi lea na taofia i loa le sailia o le ta’avale, ae logoina loa Leoleo Suesue o le Vaega e Suesueina Fualaau Faasaina mo le fa’aauauina o le suesuega.

Ina ua fesiligia e Leoleo ia Tufuga i lona i ai i totonu o le ta’avale a Onesemo, na taua ai e le pasese e fa’apea, na alu atu Onesemo ma piki mai o ia i lona fale i Pago Pago ma le faaupuga la te ti’eti’e e faasavili i le afiafi. Na i ai le taimi na la afe ai i le nofoaga o Le Filifili i le va o Vaitogi ma Iliili ma fa’atau mai ai e Onesemo fualaau fa’asaina mai le isi tagata na te la iloaina le igoa.

Na taua atili fo’i e Tufuga e Leoleo, ua leva ona faia e Onesemoi lenei galuega o le tuleiina atu lea o fualaau faasaina i isi tagata.

Ina ua fesiligia e Leoleo ia Onesemo e tusa ai o fualaau faasaina sa maua ia te ia ma lana ta’avale, na ioeina ai e le ua molia e faapea, o mea uma na maua ia te ia ma lana ta’avale, o mea uma lava e ia. O Tufuga, o lana uo e masani ona la tafafao, e leai se gaioiga a Tufuga e faia i fualaau fa’asaina sa maua i le ta’avale ma lona tino.

Na faamaonia e Onesemo i Leoleo Suesue e faapea, o fualaau faasaina sa maua ia te ia ma lana ta’avale, na faatau mai i le nofoaga o Le Filifili i le $200, ma le faamoemoe e fa’aaoga mo ia lava. Na teena malosi e Onesemo le molimau a Tufuga sa fai i Leoleo e faapea o ia e masani ona ia faatau atu fualaau faasaina.

Na taua e Onesemo i Leoleo, o fualaau faasaina na ia faatau mai i Le Filifili, e fa’aaoga mo ia i le taimi e fa’atino ai ana galuega, e maua ai lona malosi. O isi fualaau faasaina na te foa’i i nisi o ana uo aemaise i latou o loo galulue i lana faatoaga atoa ai ma le tausiga o le fanua, ae na te le tulei ma faatauina atu i isi tagata.

O le amataga o le masina lenei na tula’i ai Onesemo i luma o le Fa’amasinoga Faaitumalo mo lana ulua’i tula’i.  

O loo molia Onesemo i le moliaga o le umia faasolitulafono o vaega o le pauta fa’asaina o le aisa; faapea ai ma le moliaga o le umia faasolitulafono o le aisa ma le fa’amoemoe e tulei ma fa’atau atu i isi tagata, o ni solitulafono mamafa e mafai ona faasala ai se tasi i le toese mo le umi e oo atu i le 10 tausaga, pe faasala i le salatupe e oo atu i le $20,000, poo le faasala fo’i i faasalaga uma ia e lua.

E $10,000 le vaega tupe lea ua fa’atulaga e tatala ai i tua Onesemo.

MATAUPU MAI LE 2018

E 5 tausaga lea o lo o nofovaavaaia ai Onesemo i luma o le Fa’amasinoga Maualuga, ina ua ta’usala o ia i le moliaga o le umia faasolitulafono o vaega o le pauta faasaina o le aisa. O le faaiuga o le tausaga e 2017 na pu’e faapagota ai e Leoleo ia Onesemo ina ua aafia o ia i se vevesi na tula’i mai ina ua mae’a se inugapia sa faia i Tafuna i le fale o se tasi o ana uo.

Ina ua saili e Leoleo le tino o Onesemo, sa maua i ai pepa iila laiti e 2 o lo o i ai vaega o le pauta fa’asaina o le aisa. O le tausaga na te’a nei na ta’usala ai e le Faamasinoga ia Onesemo ma nofovaavaaia ai loa o ia mo le 5 tausaga i lalo o tuutuuga e ao ona ia usita’i i ai. 

O nisi o ia tuutuuga e aofia ai lona tuliina o masina e 20 i le Toese i Tafuna, peit’ai, e na o le 12 masina na tuli e le ua molia, ae faamalumalu e le Fa’amasinoga le isi 8 masina i lalo o le talitonuga o le a ia usita’i i tuutuuga uma o lana nofovaavaaia, lea e aofia ai le aua nei ona toe tagofia ni fualaau faasaina poo le ‘ava malosi, aua fo’i ne’i ona toe solia se tulafono a le malo.

Ua faaalioa e le Loia a le malo le fuafua mo le tuuina atu lea o se talosaga i le Faamasinoga Maualuga, ina ia faaleaoga le nofovaavaaia a Onesemo ae poloaina loa o ia e tuli atoa le umi o lo o totoe o lana faasalaga faa falepuipui e 5 tausaga, ona o lea ua ia soli poloaiga a le Fa’amasinoga.

O se tasi o tuutuuga o le nofovaavaaia a Onesemo, o lona usitaia lea o tulafono uma a le malo, e le tatau fo’i ona toe molia o ia i soo se solitulafono.

E le o mautu mai i le taimi nei pe ono faila e le Ofisa Nofovaavaaia se talosaga i luma ol e Fa’amasinoga Maualuga e faaleaoga ai le nofovaavaaia a Onesemo, ona o le tagi fou ua faia faasaga ia te ia.