Samoa
This article was added by the user . TheWorldNews is not responsible for the content of the platform.

Molia se alii lona faaoolima i lona to’alua i luma o lana fanau

Pago Pago - AMERIKA SAMOA

E $20,000 le vaega tupe lea ua faatulaga e le Fa’amasinoga e totogi ona faatoa tatala lea i tua o se ali’i na pu’e faapagota e Leoleo i le masina na te’a nei, ona o tu’uaiga i lona faaoolima i lona to’alua ao matamata i ai lana fanau e to’alua. 

Ona o puipuiga i lalo o le tulafono, o le a le mafai ai ona faailoa le suafa o le alii o loo aafia, poo suafa foi o molimau o loo taua i le tagi tusitusia a le malo. 

O le masina na te’a nei na tula’i ai lea ali’i i luma o le Fa’amasinoga Faaitumalo mo lana ulua’i iloiloga, ae o le vaiaso na te’a nei na tofu atu ai lana mataupu i luma o le Fa’amasinoga Maualuga, ma ia teena ai moliga faasaga ia te ia.

Ua molia e le malo lenei alii i le moliga e tasi o le faaoolima i le tulaga lua, o le vaega D lea o solitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe faasala i le salatupe e le silia i le $5,000, poo le faasala foi i faasalaga uma ia e 2; atoa ai ma le moliga o le faaoolima i le tulaga tolu atoa ai ma le faatupu vevesi i nofoaga faitele, o le vaega A lea o solitulafono mamafa, lea e mafai ona faasala ai se tasi i le Toese mo le umi e le silia i le tausaga, poo le faasala foi i le salatupe e le silia i le $1,000, pe faasala foi i faasalaga uma ia e 2.

Afai ae tatala le ua molia i tua, ua poloaina o ia e le Fa’amasinoga ina ia tausisi i tulafono uma a le malo, e le tatau ona ia toe taumafai e faafesootai lona to’alua poo lana fanau i soo se taimi, sei vagana o se poloaiga a le Fa’amasinoga. 

Ua poloaina foi o ia ina ia auai i soo se taimi e valaau ai lana mataupu, ma ia fesootai vava lalata ma lana loia fautua. 

TAGI A LE MALO

E pei ona taua e le malo i le latou tagi e faapea, o le po o. le aso 13 o Aokuso 2022 na faafesootai ai e se Tama mai Leone le Ofisa o Leoleo i Leone, mo se fesoasoani mo lona afafine i le fale a lona afafine i Leona lava, ona o loo i ai faamatalaga sa faaoolima i ai lona to’alua.

Na taua atili e le Tama i Leoleo e faapea, o le ripoti ua ia maua o loo taua ai le aafia o le tino o lona afafine i ni manu’a e mafua mai i le taimi na faaoolima ai lona to’alua ia te ia. E le i leva ae taunuu Leoleo i le fale o le aiga i Leone ma amata ai loa le suesueina o lenei mataupu. 

O faamatalaga na maua e Leoleo i le latou suesuega na taua ai e faapea, i le po o le aso e pei ona taua, na tula’i mai ai se feeseeseaiga i le va o le ulugalii lenei ina ua manava atu le Tama o le aiga i le fale ua ova lona ‘ona. I le taimi o le taugaupu a le ulugalii i totonu o le fale, na laulau vavale ai le ua molia ma leotele, ma avea ai ma mafua’aga na faateia ai nisi o aiga tuaoi.

I le taimi o le taugaupu a le ulugalii, na faaoolima ai loa le ua molia i lona to’alua ma i’u i lona faaaoga o se ulu vela ma togi ai lona to’alua. Na tau fai pauu le ulugalii i luga o le fola o le fale ma aapa atu ai loa le ua molia ma taumafai e tu’i le ulu o lona to’alua i luga o le fola o le fale. Na taumafai foi le ua molia e titina le ua o lona to’alua ma i’u ai i lona tu’i o ona foliga ma manu’a ai o ia. 

Na manu’a le na aafia i ona foliga ma lona tino, e mafua mai ina ua faaoolima i ai le ua molia. 

Na aga’i atu Leoleo i le fale ma latou vaaia ai se alii talavou i luma o le fale a le ulugali’i. Na aga’i i totonu o le fale le alii talavou lenei ma faailoa i lona aiga Leoleo ua taunu’u atu ma maua ai loa le avanoa e ulufale ai ma fesiligia le Tina na aafia e tusa ai o lenei faalavelave. 

O le mae’a ai ona fesiligia e Leoleo o le Tina na aafia, na faatonuina ai loa i latou ina ia latou aga’i atu ma Leoleo faatasi ai ma lana fanau i le Ofisa o Leoleo i Leone mo le suesueina atili o lenei mataupu. Na aga’i atu fo’i Leoleo i totonu o le fale ma latou pu’e faapagota mai ai le alii ua molia, ma auina atu ai fo’i o ia i le Ofisa o Leoleo mo le faatalatalanoaina o lenei mataupu. 

Na taua e le Tina na aafia i Leoleo e faapea, sa fasi fo’i o ia e lona to’alua i le po o le aso Sa, a o lumana’i ai le mataupu e pei ona fasi ai o ia i le po o le aso lea na tula’i mai ai lenei faalavelave.

Sa ia taua i Leoleo e faapea, na manava atu lona to’alua ua leva le po toe ova lona ‘ona. Sa ia faailoa i ai ona foliga ita talu ai o lona le fiafia i le tulaga e pei ona ia vaaia, ae na avea lea ma itu na ita ai lona to’alua ma amata ai loa ona tula’i mai le la feeseeseaiga. 

A o la tau upu, na latalata atu lona to’alua ma po ona foliga ma palasi ai i lalo. Ao taatia i lalo, na ia aapa atu ma taumafai e fusi lona to’alua ina ia taofi ai o ia mai lona faaoolima o ia.

Na taua e le Tina i Leoleo le faaauau pea ona fasi e lona to’alua o ia e ala i lona ta tu’i o ona foliga, titina lona ua atoa ai ma le tu’i o lona mata ma fula ai. 

Na maua le avanoa e fesiligia ai e Leoleo le fanau e to’alua a le ulugali’i. O le alii e 8 tausaga ma le alii e 17 tausaga le matua. 

Na taua e le alii e 8 tausaga le matua i Leoleo e faapea, o ia sa moe, ae na ala ina ua ia faalogoina le misa a ona matua. Na taua e le alii lea lona vaaia o lona Tama o fasi lona tina e ala i lona ta tu’i o ona foliga ao taumafai lona Tina e puipui ona foliga. Sa ia vaaia fo’i le togi e lona Tama o lona Tina i le ulu vela. 

Na taua atili e le alii lea lona vaaia o lona Tama ua tago i le agaese. Sa popole lava lona loto ina ne’i faaaoga e lona Tama le agaese e fasi ai lona Tina. Ina ua uma ona fasi e lona Tama lona Tina, sa ia vaaia manu’a i foliga o lona Tina. 

Na fesiligia fo’i e Leoleo le alii e 17 tausaga le matua e tusa ai o le mataupu e pei ona aafia ai ona matau.  Na taua e le alii lea le manava atu o lona Tama ua leva le afiafi ma amata loa le la misa ma lona Tina i totonu o le fale. Sa ia vaaia le po e lona Tama o le gutu o lona Tina ma amata ai lava lea o le vevesi.

Sa ia taua fo’i le togi e lona Tama o lona Tina i le ulu vela. Sa ia vaaia lona Tina ua palasi i lalo ona taumafai lea o lona Tama e titina le ua o lona Tina ma faaauau pea ona ta tu’i ona foliga ma lona mata. Na taua atili e le alii lea lona ita tele ina ua ia vaaia le gaioiga sa faia e lona Tama i lona Tina. 

Sa ia vaaia lona Tama o loo uu le agaese peita’i na te le’i faaaogaina e faaoo ai ni manu’a i lona Tina. Sa faaaoga e lona Tama le agaese e faaleaga ai le masini su’isu’i lavalava.

A o le i fesiligia e Leoleo le ua molia, sa faailoa muamua i ai ona aia i lalo o le Tulafono, peita’i na taua e le ua molia lona malamalama i ona aia tatau, ma ua ia malie fo’i e tali i fesili a Leoleo e tusa ai o le faalavelave na tula’i mai. 

Na ia taua e faapea, na mafua ona tula’i mai le vevesi i le la aiga i lea aso, o le masalosalo o lona to’alua ia te ia ma le isi tamaitai e tausoga ma lona to’alua. Sa ia vaaia i lea po ina ua taunuu atu i le fale foliga le manuia o lona to’alua, ma mafua ai loa ona ita ma tula’i mai ai le la vevesi. 

Na taua e le ua molia, na te lei faaoolima i lona to’alua, ae o lona to’alua na oso atu ma opo o ia ma la pauu ai i lalo. A o ia taumafai e una’i ese lona to’alua, o iina na manu’a ai lona mata ina ua tau ai lona lima, ae na te lei faaoolima ia te ia. 

Na matua teena malosi e le alii lenei faamatalaga a lona to’alua ma lana fanau e faapea sa ia faaoolima i lona to’alua. 

O le mae’a ai ona fesiligia e Leoleo o le alii ua molia, na taofia ai loa o ia ma auina atu i le Toese i Tafuna e faatali ai le taimi e tula’i ai i luma o le Fa’amasinoga mo lana ulua’i iloiloga.