Samoa
This article was added by the user . TheWorldNews is not responsible for the content of the platform.

Molia se alii o loo nofovaavaaia i le umia o fualaau faasaina

Pago Pago - AMERIKA SAMOA

Ua toe aafia i ni solitulafono mamafa se alii o loo nofovaavaaia mo le 5 tausaga ina ua ta’usala o ia i le moliaga o le faaoolima ma le gaoi i le 3 tausaga talu ai, ina ua taofi e Leoleo le ta’avale na latou malaga ai ma isi ali’i e to’a 3 i le le usitaia o tulafono i luga o le alatele ae maua ai fualaau faasaina ia te ia.

O le masina na te’a nei na tula’i ai le susuga a Kalasa Mapu i luma o le Fa’amasinoga Faaitumalo mo lana ulua’i iloiloa. E 2 tagi a le malo ua faila faasaga ia te ia. 

I le tagi muamua, ua molia ai Mapu i le moliaga o le umia faasolitulafono o vaega o le pauta faasaina o le aisa, faapea ai ma le moliaga o le umia faasolitulafono o le vaega o le laau faasaina o le mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, poo le faasala foi i le salatupe e mafai ona oo atu i le $20,000, poo le faasala fo’i i faasalaga uma ia e 2.

I le tagi lona lua faasaga ia Mapu, ua tu’uaia ai o ia i le moliaga o le faaoolima i le tulaga lua, o le vaega D lea o solitulafono mamafa, lea e mafai ona faasala ai se tasi i le Toese mo le umi e oo atu i le 5 tausaga, pe faasala foi i le salatupe e oo atui le $5,000, poo le faasala foi i faasalaga uma ia e 2.

E $15,000 lea ua fa’atulaga e tatala ai i tua Mapu. Afai ae tatala o ia i tua, e le mafai ona ia toe taumafai e faafesoota’i molimau a le malo e aofia ai ma le ali’i na ia faaoolima i ai i le masina o Ianuari o le tausaga nei, ia auai i soo se taimi e valaau ai lana mataupu i luma o le Fa’amasinoga, ma aua ne’i ona toe soli se tulafono a le malo.

TAGI A LE MALO 

E pei ona taua e le malo i le latou tagi e fa’apea, o le aso 12 o le masina o Setema na te’a nei na taofia ai e ni ali’i Leoleo se to’alua sa tiute i luga o le alatele i Tafuna se ta’avale na vaaia le alu saoasaoa mai maila faatulagaina i luga o le alatele.

Na aga’i atu Leoleo e fesiligia le ave ta’avale ma iloa ai, e to’atolu isi tagata o loo i ai i totonu o le ta’avale. O i latou nei e aofia ai le ali’i o Kalasa Mapu ma le isi ali’i na mulimuli ane molia i le tagofia o le ‘ava malosi ae lei atoa le 21 tausaga.

A o talanoa Leoleo i le ave ta’avale ma faailoa i ai le mafua’aga ua ala ai ona taofia lana ta’avale, na maitauina e Leoleo se tasi o le pasese o loo minoi solo ma taumafai e tago i le taga o lona ofu. O lea pasese, o le susuga lea a Kalasa Mapu, le ua molia i lenei mataupu.

Na fesili Leoleo ia Mapu pe i ai se mea ua tupu ua ala ai ona minoi solo, ae na tali Mapu, e leai. Na toe faaauau talanoaga a Leoleo ma le ave ta’avale, peita’i sa toe maitauina fo’i le minoi solo o le susuga a Mapu, ma ua avea ai loa ana gaioiga ma itu ua popole ai ali’i Leoleo, ma manatu ai, atonu o loo umia se Mapu se a’upega e ono lamatia ai lo la saogalemu.

Na faatonu e Leoleo le susuga a Mapu e sau i fafo ma le ta’avale peita’i na musu Mapu. Na toe faatonu faalua e Leoleo Mapu ae na tumau pea lava le musu o le ua molia e sau i fafo ma le ta’avale. O le mafua’aga lea na fetagofi atu ai loa Leoleo ma tatala le faitotoa ae toso ai i fafo Mapu mai le ta’avale, loka ona lima ae tu’u i totonu o le ta’avale a Leoleo, ona toe faaauau lea o le talanoaga ma le ave ta’avale. 

A o le i tuuina atu Mapu i totonu o le ta’avale Leoleo, na siaki muamua lona tino poo ia umia ni a’upega. I totonu o le taga o lona ofu sa laei, na maua ai e Leoleo ni tamai taga pepa iila o lo o i ai vaega o lau mamago o le mafiuana. Sa maua ai fo’i e Leoleo se paipa tioata o loo i ai vaega o le pauta faasaina o le aisa.

Na faatonu fo’i e Leoleo i latou e to’atolu sa i totonu o le ta’avale ina ia agai mai i fafo, ma maua ai le avanoa e siaki uma ai e Leoleo tino o i latou nei mo ni aupega. E leai ni a’upega poo ni fualaau faasaina na maua i le isi vaega e to’atolu e aofia ai ma le ave ta’avale. 

Na auina uma i latou nei e to’afa i le Ofisa o Leoleo i Tafuna mo suesuega, faatasi ai ma le ta’avale na taofia fo’i e Leoleo mo isi suesuega. 

A o le i fesiligia e Leoleo i latou uma nei e to’afa e aofia ai ma Mapu, na muamua su’e e Leoleo le ta’avale ma maua ai apa pia o loo tatala ma inu i totonu o le ta’avale. Na faaauau suesuega a Leoleo i totonu o le ta’avale ma latou maua ai se paipa tioata o loo i ai vaega o le pauta faasaina o le aisa, sa nana i le pito i le faitoto’a na nofo ai le ali’i talavou.

Na faamaonia e le ave ta’avale i Leoleo, o apa pia ia a le ali’i talavou e 20 tausaga le matua. Ina ua fesiligia le ali’i talavou e faatatau i apa pia na maua o loo tatala i totonu o le ta’avale, na ia ta’utino i Leoleo, o ia e ana apa pia.

Na faamaonia atili e le ali’i talavou lea i Leoleo, o ia faatoa 20 ona tausaga ao lea ua faamaonia lona tagofia o le ‘ava malosi. 

Ina ua fesiligia e Leoleo le ali’i talavou e fa’atatau i le paipa tioata na maua i ai vaega o le pauta faasaina o le aisa, lea na nana i le pito o le faitoto’a i le itu sa nofo ai, na taua e le ali’i talavou i Leoleo e faapea, ina ua taofi e Leoleo le ta’avale, na te’i ina ua tu’u atu e Mapu le paipa tioata ia te ia ma faatonu o ia e nana le paipai le pti o le faitoto’a. Sa ia usita’i i le faatonuga a Mapu ma ia nana ai loa le paipa.

Ina ua fesiligia e Leoleo ia le ave ta’avale ma le isi pasese o le ta’avale, na faamaonia ai e i laua ia e to’alua, o Mapu e ana fualaau faasaina sa maua i totonu o le ta’avale. 

A o faagasolo suesuega a Leoleo e uiga i lenei mataupu, na latou maua ai se tusi saisai na sainia e le Faamasinoga i le masina o Ianuari o le tausaga nei e pu’e faapagota ai Mapu, ona o le fa’alavelave e pei ona ia faaaoga ai se u’amea e faaoo ai manu’a i se isi ali’i.

Ina ua fesiligia e Leoleo ia Mapu e uiga i fualaau faasaina na maua i le taga o lona ofu sa fai faapea ai totonu o le ta’avale, na ioeina ai e Mapu, o ia e ana fualaau faasaina sa maua i le ta’avale.

Sa ia taua e faapea, ina ua taofi e Leoleo le latou ta’avale, sa popole lona mafaufau, e le gata o loo ia te ia fualaau faasaina, ae o loo i ai fo’i se faalavelave na aafia ai o ia i le amataga o le tausaga, ina ua ia faaaoga se u’amea e faaoo ai manu’a i se isi ali’i.

TAGI O LE FAAOOLIMA FAASAGA IA MAPU

O le po o le aso 13 o Aperila, 2020 na talosagaina ai e se alii le Ofisa o Leoleo i Tafuna mo se fesoasoani, ona o se ali’i na manu’a tigaina lona ulu ina ua faaoolima i ai se isi alii i se u’amea. Na taunuu Leoleo i le nofoaga na tula’i mai ai le faalavelave ma faamaonia mai ai e tagata sa i ai i le fiafia o le Aso Fanau, o le ali’i o Tipasa Mapu na ia fa’aaoga se uamea e faaoo ai manu’a i le ulu o le ali’i na aafia.

Na fiu Leoleo e tau saili le susuga a Mapu ua le toe maua lava. 

Ina ua fesiligia e Leoleo ia Mapu e faatatau i le faalavelave lea na ia faaoolima ai i le ali’i na manu’a, na ioeina ai e Mapu tu’uaiga faasaga ia te ia. 

Na taua e Mapu e faapea, o le alii na manu’a na mafua ai le vevesi ina ua faatonu e le alii lea o ia e alu ese ma le vaega o loo paka ai ta’avale. O lona ita i le ali’i lea na mafua ai loa ona savali i tua o le fale ma uu mai ai le fasi u’amea sa pipi’i i le pa, ma savali atu loa ma sasa ai le ulu o le ali’i na aafia ma manu’a ai.

Na taua e le ali’i na aafia i Leoleo, na mafua ona ia fai ia Mapu e alu ese ma le vaega sa paka ai ta’avale, ona sa ia vaaia le taumafai o Mapu e talepe se tasi o ta’avale sa paka ai. O ta’avale ia a tagata na valaaulia i le aiga o le Aso Fanau.