Samoa
This article was added by the user . TheWorldNews is not responsible for the content of the platform.

Taofia Toese se alii mai Samoa faia uiga mataga i se tamaitai talavou

PAGO PAGO - AMERIKA SAMOA

E 25 tausaga le matua o se ali’i talavou mai Samoa ae o loo alala i Malaeimi ua taofia nei i le Toese i Tafuna, ina ua mae’a ona pu’e faapagota o ia Leoleo i le masina na te’a nei, e mafua mai i tu’uaiga o lona faia lea o uiga mataga i se tamaitai talavou e 16 tausaga le matua.

E pei ona e le malo i le latou tagi, o le alii ua molia, le susuga a Falaula Seumanu ma le tama’ita’i na aafia, e auai i laua i se mafutaga faaleuo i le va o le ali’i ma le tama’ita’i mo ni nai masina, a o le i alia’e mai lenei mataupu.

O le masina na te’a nei na pu’e faapagota ai e Leoleo le susuga a Faalogo i lalo o se poloaiga a le Fa’amasinoga, ma ua taofia nei o ia i le Toese i Tafuna e faatalitali ai le isi ana iloiloga.

E 15 moliaga mamafa ua tu’uaia ai e le malo le ali’i ua molia. O ia moliaga e aofia ai moliaga e 6 o le faia o amioga faasotoma, faapea ai ma moliaga e 6 o le faiaiga ma se tamaitai e talavou i lalo o le Tulafono, o le vaega B lea o solitulafono mamafa, lea e mafai ona ona faasala ai se tasi i le Toese mai le 5 e oo atu i le 15 tausaga le umi, ma moliaga e 3 o le tagofia o itutinosa o se tamaitai e talavou i lalo o le tulafono, o le vaega D o solitulafono mamafa.

E $50,000 le vaega tupe lea ua fa’atulaga e tatala ai i tua Seumanu. Afai ae tatala o ia i tua, ua poloaina o ia e le Fa’amasnoga e aua nei toe vaaia o ia o taumafai e fesoota’i le tamaitai na aafia i soo se auala, poo se isi fo’i o lona aiga, e le mafai fo’i ona ia toe taumafai e latalata i ai pe alu ai fo’i i lona fale. 

A ia avea o ia o se tagatanu’u lelei e tausisi i tulafono a le malo i taimi uma, ma ia auai i soo se taimi e valaau ai lana mataupu.

E le i manatu le ua molia e fa’ataunuu lana ulua’i iloiloga, ae na filifili o ia e tu’u sa’o atu loa lana mataupu i luma o le Faamasinoga Maualuga mo isi ana iloiloga o lo o mulimuli mai ai.

O le 2 vaiaso na te’a nei na tula’i ai le alii ua molia i luma o le Faamasinoga Maualuga ma ia teena ai le tagi a le malo faasaga ia te ia. O le masina o Ianuari o le tausaga fou lea ua fa’atulaga e toe valaau ai lenei mataupu.

TAGI A LE MALO

O lenei mataupu  na tofu atu i le Ofisa o Leoleo i Fagatogo ina ua aga’i atu i ai le Tina o le tamaitai na aafia ma faila sana tagi faasaga i le alii ua molia, ona o le faalavelave na tula’i mai i le va o ia ma lana tama teine e 16 tausaga le matua.

Na taua atili e le Tina i Leoleo Suesue e faapea, la te le iloaina ma le Tama o le aiga se faafitauli o lo o tula’i mai i le la tama teine, peita’i o se faafitauli na tula’i mai i le latou fale i se tasi o Aso Sa ina ua toeitiiti lava matapogia le tamaitai, na mafua ai loa ona alia’e lenei mataupu.

O le mae’a ai ona tau aao e Leoleo Suesue o faamatalaga e uiga i lenei mataupu, na latou fesiligia ai loa ni isi o loo aafia i lenei mataupu, e aofia ai le tamaitai na aafia faapea ai ma le ali’i ua molia i lenei mataupu. Sa i ai faatasi le tamaitai na aafia ma lona Tina i le taimi na fesiligia ai o ia.

Na taua e le Tina i Leoleo Suesue e faapea, o lenei mataupu na faatoa alia’e i le taeao o le aso Sa mulimuli o le masina o Setema na te’a nei, ina ua tau matapogia lana tama, ma manatu ai loa e ave o ia i le Falema’i i Fagaalu e vaai le foma’i. O le suega sa faia e le Foma’i na faamaonia ai, o lana tama teine ua ma’itaga.

Na maua le avanoa e fesiligia ai e Leoleo Suesue le tamaitai na aafia e uiga i lenei mataupu, atoa ai ma le mafua’aga o lona ma’itaga. Sa molimauina e le Tina faamatalaga sa tuuina atu e lana tama i Leoleo Suesue. 

Na taua e le tamaitai na aafia e faapea, o le la mafutaga ma Faalogo na amata mai i le masina o Fepuari o le tausaga nei. Na mafai ona manatua e le tamaitai na aafia nisi o mea sa tutupu i le taimi o le la mafutaga ma lana uo, e aofia ai mafutaga i taimi o le aoga atoa ai ma mafutaga i tua i le aiga e aofia ai se taimi o le leva o le po ma taimi o mafutaga a le Autalavou.

I se tasi o po i le masina o Aperila o le tausaga nei e pei ona taua e le tamaitai na aafia i Leoleo Suesue, na tula’i mai ai se faalavelave i le va o ia ma lana uo (le alii ua molia) i le Fale Tuufua o loo i autafa o le latou fale i Malaeimi. Na manatua e le tamaitai le taimi na fesootai atu ai lana uo ia te ia i le telefoni pe mafai ona alu atu la te eva ae sa tali i ai e onosa’i se’i momoe uma le latou aiga. 

Pe tusa o le itula e 12 i le tulua o po ina ua momoe lona aiga, na tuua ai loa e le tamaitai le fale ae alu atu i le Fale Tuufua o loo faatali mai ai lana uo ma la tafafao loa. E silia i le 3 itula le umi o lea tafaoga. Na amata lava i talanoaga ae na faai’u ina ua la feusua’i. Sa ia taua i Leoleo Suesue lona malie atoatoa i feusuaiga sa faia i lea po ma lana uo. Pe tusa o le itula e 3:00 i le vaveao na ia toe fo’i ai loa i le fale ae aga’i atu fo’i lana uo i lona fale.

O le faalavelave lona lua e pei ona taua e le tamaitai na aafia i Leoleo Suesue na tulai mai i le masina o Me o le tausaga nei lava, ina ua alu ma la eva ma lana uo i totonu o le Fale Tuufua i tafatafa o le latou fale, ma i’u ina la feusua’i ai ma lana uo. Ae na faateia o ia ina ua vaaia e lana uo le tau fai ola mai o moli o le latou fale, ma vaaia ai lona Tama ua savali mai i fafo o le fale. Na alu i le atoa lana uo ae o le taimi lea na tu ai i luga ma savali atui le fale. 

Sa fesili atu lona Tama ia te ia poo fea sa i ai i le leva o le po ae na tali i ai sa alu e fa’aaoga le bathroom. 

O le mae’a ai ona fesiligia e Leoleo Suesue o le tamaitai na aafia, na latou fesiligia ai loa le ali’i ua molia e uiga i lenei mataupu. A o le i fesiligia e Leoleo Suesue le alii ua molia, sa latou faailoa i ai, e le o taofia faapagota o ia i le taimi lea, e mafai fo’i ona ia fo’i atu i lona aiga i soo se taimi lava e mana’o i ai.

Ina ua fesiligia le ua molia, sa ia ta’utino ai i Leoleo Suesue, e moni tu’uaiga i le i ai lea o se mafutaga faaleulugali’i i le va o ia ma le tamaitai na a’afia.

O le taimi lava na ta’utino ai le ua molia e tusa ai o tu’uaiga faasaga ia te ia, na taofi ai loa e Leoleo Suesue le faatalatalanoaga ae fautuaina loa o ia i ona aia tatau i lalo o le tulafono, e aofia ai le aia tatau e le tau faia ai sana faamatalaga. Na faailoa e le ua molia i Leoleo Suesue lona malamalama i ona aia tatau ma ua ia manatu fo’i e fa’aagafua ona aia tatau ae tuuina atu lana faamatalaga e tusa ai o le faalavelave sa tula’i mai i le va o ia ma lana uo tamaita’i.

Na faamatala e le ua molia e faapea, o le masina o Fepuari o le 2022 na amata mai ai le la mafutaga ma le tamaitai na aafia seia oo mai i le masina o Oketopa. I totonu o le va lea, sa la feusua’i ai mo le tele o taimi i totonu o le Fale Tuufua o loo i tafatafa o le fale o le tamaitai, poo totonu fo’i o lona potu.

O nisi o po e fesoota’i atu ai le tamaitai ia te ia pe mafai ona la tafafao i le po, ae o nisi fo’i taimi e fesoota’i ai o ia i le tamaitai mo se avanoa la te tafafao ai i le leva o le po. Faatoa la mafuta lava i le leva o le po, aemaise lava i le taimi ua momoe uma ai le aiga o le tamaitai, o nisi o taimi la te eva ai i le Fale Tuufua ae o isi fo’i taimi o totonu lona potu.

O taimi uma lava la te feusuta’i ai, la te malilie uma ai lava e faatino nei gaioiga. Na ta’utino e le ua molia e leai se taimi na ia faamalosia ai le tamaitai na aafia, ae sa malie fo’i i ai o ia.

Na toe fesiligia e Leoleo Suesue le tamaitai na aafia e tusa ai o lenei mataupu, i le mae’a ai lea ona latou fesiligia o le alii ua molia. Na taua e le tamaitai na aafia i Leoleo Suesue e faapea, e i ai isi faamatalaga na musu e faailoa i le latou ulua’i talanoaga, ona sa iai ona lagona ma i lona Tina sa faalogologo i le latou talanoaga.

Na faamaonia e le tamaitai na aafia i Leoleo faamatalaga uma a le ua molia e tusa ai o le la mafutaga. Sa ia taua e faapea, e faatele ona la momoe ma faiaiga ma le ua molia, toeitiiti lava fo’i po uma lava la te eva ma mafuta ai ma le ua molia. Sa ia malie ai fo’i i taimi uma la te faiaiga ai ma lana uo.